فوتو: اشىق دەرەككوز
ماحابباتتىڭ سيمۆولىنا اينالعان ەركىن دالانىڭ ەركە قۇستارىن العاش بايقاپ, فوتو-ۆيدەوعا تۇسىرگەن سەمەيلىك ارىپتەسىمىز مۇرات راقىمجان. ونىڭ ايتۋىنشا, مۇنداي كورىنىستى سەمەيدە بۇرىن-سوڭدى كورمەگەن.
– سەمەيدە تۇرعانىمىزعا وتىز جىلعا جۋىقتادى. ەرتىستە ءجۇزىپ جۇرگەن اققۋدى تۇڭعىش رەت كورۋىم. اۋەلدە بىرقازان شىعار دەپ ويلاپپىن. كامەرامەن جاقىنداتىپ كورسەم – اققۋ ەكەن. مۇز جۇقا بولعان سوڭ جاقىنداپ بارىپ جەم بەرۋگە تاۋەكەل ەتە المادىق. سودان بەرى جۇبايىم ەكەۋمىز الىستان باقىلاپ ءجۇرمىز, – دەيدى ول.
مۇرات راقىمجاننىڭ ايتۋىنشا, قوس اققۋ جاعالاۋدان قاشىقتا, تەرى زاۋىتى ماڭىندا, «پارۋس» ىقشاماۋدانى تۇسىندا ءجۇر. ۆيدەودا كورىنەتىن بالىقشىلار دا نەگىزگى ارنادا ەمەس, توعان بولىگىندە وتىرعاندىقتان, قاۋىپ ءتوندىرىپ وتىرعان جوق.
بۇگىن تاڭەرتەڭ حابارلاسىپ, اققۋلاردىڭ ءحالى قانداي ەكەنىن سۇرادىق.
– كەشەگى مەن كورگەن اققۋ موينىن باۋىرىنا باسىپ, مۇز ۇستىندە جاتىر. ەكىنشىسى سۋدا ءجۇزىپ ءجۇر. السىرەپ قالعان جۇبىنا جەم ىزدەپ جۇرسە كەرەك. سالدەن سوڭ سۋدان شىعىپ, سۇلق جاتقان سىڭارىنىڭ قاسىنا كەلىپ, ءتۇرتىنىپ يىسكەگەندەي بولدى. سەرىگى باسىن كوتەرگەن جوق. سىڭارىنىڭ دارمەنسىز كۇيىن تۇسىنگەن قايران عاشىق, قۇبىلا جاققا قاراي بەس-التى قادام جاساپ, مويىنىن تومەن قاراتىپ, تاعدىرىنا باس يگەندەي بولىپ, مۇلگىپ تۇر. ول ءبىز كەتكەنشە ورنىنان تاپجىلعان جوق, – دەيدى ول.
بۇدان سوڭ ءوزىم دە بارىپ, جاعالاۋدان باقىلاپ قايتتىم. راسىندا دا, قوس اققۋدىڭ ءبىرى اندا-ساندا قاناتىن قومداپ قوزعالعانىمەن, ەكىنشىسى مۇلدە قيمىلسىز. قۇستاردىڭ ءحالى مۇشكىل ەكەنى انىق بايقالادى.
مامانداردىڭ ايتۋىنشا, سەمەيدەگى بيولوگيالىق ورتالىق مۇنداي جانۋاردى ارنايى انىقتاماسىز قابىلدامايدى.
– ەگەر ەكى-ءۇش كۇن وسىلاي وتىرا بەرسە, اشتىق پەن سۋىقتان ءولىپ كەتۋى مۇمكىن. قازىر اققۋلار بويىنداعى ماي قورىن جۇمساپ جاتىر. ماي تاۋسىلعان سوڭ السىرەۋ كۇشەيەدى. قۇتقارۋ ءۇشىن قايىقپەن جاقىنداپ, جاعاعا شىعارۋ قاجەت. الدىمەن ءسابىز تۋراپ بەرگەن دۇرىس. كەيىن ۆەتەرينارلار اناليز الىپ, انىقتاما جاساسا, بيولوگيالىق ورتالىق قابىلداۋى ءتيىس, – دەيدى ۆەتەريناريا عىلىمدارىنىڭ كانديداتى ادىلقاسىم جاقىپباەۆ.
عالىمنىڭ سوزىنشە, اققۋلار ادەتتە سۋدىڭ ساياز جەرىنەن بالدىر مەن شاباق تەرىپ جەيدى. ال سۋىق كۇشەيىپ, مۇز قابىرشىقتانىپ قاتا بەرسە, ولاردىڭ جاعدايى ودان ءارى قيىندايدى.
مىنە, سەمەيدە اق جورعا بوران سوعىپ تۇر. ال الداعى كۇندەردە اۋا تەمپەراتۋراسى تومەندەيتىنى تۋرالى حابارلامالار كەلىپ جاتىر. اقىن كاكىمبەك سالىقوۆتىڭ سوزىمەن ايتساق, «سىرعيدى اققۋ ايدىندا, سىرعىمايدى, جاقىن بارىپ حال-جايىن كىم سۇرايدى؟».
