فوتو: azattyq.org
ادام ءومىرىن جالماعان قىزىل جالىن
بيىل 4 ماۋسىم كۇنى باتىس قازاقستان وبلىسى سىرىم اۋدانى جىمپيتى اۋىلىندا جەكەمەنشىك تۇرعىن ۇيدە ءورت شىعىپ, 5 بالا كوز جۇمدى. وبلىستىق توتەنشە جاعدايلار دەپارتامەنتىنىڭ مالىمەتىنشە, قىزىل جالىن شامامەن 30 شارشى مەتر اۋماقتى قامتىپ, ءۇي ىشىندەگى تۇرمىستىق زاتتار مەن جيھازدار ورتكە ورانعان. وقيعا ورنىنا جەتكەن ءورت ءسوندىرۋ قىزمەتى ۇيدەن ەس-ءتۇسسىز جاتقان بەس بالانى الىپ شىعىپ, جەدەل اۋرۋحاناعا جەتكىزگەنمەن بۇلدىرشىندەردى امان الىپ قالۋ مۇمكىن بولماعان. قايتىس بولعان بالالاردىڭ ەڭ ۇلكەنى – 6, ەڭ كىشىسى – 3 جاستا بولعان. ولار 2019, 2020, 2021, 2022 جانە 2023 جىلى تۋعان. ال اۋدان اكىمدىگى تاراتقان اقپاراتقا سايكەس, وتباسى بۇل ءۇيدى جالعا الىپ تۇرعان.
9 قازان كۇنى پاۆلودار وبلىسىنداعى شارۋا قوجالىعىندا ءورت شىعىپ, قىزىل جالىن 6 ادامنىڭ ءومىرىن جالمادى. ءورت وڭىردەگى سولنەچنىي كەنتىنەن 7 كم قاشىقتىقتا ورنالاسقان شارۋا قوجالىقتارىنىڭ بىرىندە بولعان. شارۋا قوجالىققا قۇتقارۋشىلار كەلگەندە تۇرعىن ءۇي تولىعىمەن ورتكە ورانعانىن كورگەن. ءورتتىڭ سالدارىنان شاتىر جارتىلاي قۇلاپ, ءورت ىرگەلەس قۇرىلىستارعا دا تارالىپ, جالپى اۋدانى 920 شارشى مەترگە جايىلعان. ءورت كەزىندە ۇيدە 7 ادام بولعان. ولاردىڭ ءبىرى 1972 جىلى تۋعان ەر ادام ءوز بەتىنشە سىرتقا شىعىپ ۇلگەرگەن. قالعان 6 ادام وقيعا ورنىندا جان تاپسىرعان.
18 قاراشا تۇركىستان وبلىسى جەتىساي اۋدانى العاباس اۋىلىندا ءبىر اۋليەتتىڭ 12 مۇشەسى ءورت سالدارىنان قازا تاپتى. ونىڭ ىشىندە توعىزى – كامەلەتكە تولماعان بالا. ولار 2009, 2010, 2012, 2015, 2017, 2019, 2021 جانە 2024 جىلى دۇنيەگە كەلگەن. ورتەنىپ جاتقان ۇيدەن ءوز كۇشىمەن شىققان 1986 جىلى تۋعان ەر ادامنىڭ دەنەسىنىڭ 12%-ى كۇيگەن, ونىڭ جاعدايى اۋىر دەپ باعالانعان. 1991 جىلى جانە 2018 جىلى تۋعان تاعى ەكى ادامنىڭ دەنەسىنىڭ تيىسىنشە – 30%-ى, 11%-ى كۇيگەن ەدى. سول ۋاقىتتا ولار اۋرۋحانانىڭ جانساقتاۋ بولىمىنە جاتقىزىلىپ, جاساندى تىنىس الۋ اپپاراتىنا قوسىلعان بولاتىن. دەسە دە دارىگەرلەردىڭ جان-جاقتى جۇرگىزگەن مەديتسينالىق كومەگىنە قاراماستان 2018 جىلى تۋعان قىز اۋرۋحانادا باقيلىق بولدى.
بۇگىن استانادا «ديپلومات» تۇرعىن ءۇي كەشەنىنىڭ جانىندا مەيرامحانا ورتەندى
بازار مەن ساۋدا جەلىلەرىندەگى ءورت وقيعالارى
وسى جىلى ەل وڭىرلەرى مەن استانا, الماتى قالالارىندا بىرنەشە بازار مەن ساۋدا جەلىلەرىنەن ءورت شىقتى.
اقپان ايىندا استاناداعى «Saryarka» ساۋدا ورتالىعىنا جاپسارلاس سالىنعان 2 قاباتتى عيماراتتان ءورت شىقتى. ءورتتى سوندىرۋگە 10 تەحنيكا مەن 50 ادام جۇمىلدىرىلدى. قىزىل جالىن 100 م² اۋماقتى قامتىدى. توتەنشە جاعدايدان ەشكىم زارداپ شەككەن جوق.
18 شىلدە كۇنى ەلورداداعى «Alash Highway» بازارىندا ءىرى ءورت تىركەلدى. ءورت ءسوندىرۋ قىزمەتىنە كەش حابارلانعاندىقتان قىزىل جالىندى ءسوندىرۋ جۇمىستارى كۇردەلى ءوتىپ, 100-دەن اسا ءورت ءسوندىرۋشى جانە 60 تەحنيكا جۇمىلدىرىلدى. ماماندار ءورتتىڭ وزگە دە اۋماققا تارالۋىنا جول بەرمەدى. زارداپ شەككەندەر انىقتالمادى.
استانادا حالىق قاراسى ۇزىلمەيتىن «Asem» بازارىندا 6 قاراشا كۇنى ءورت شىقتى. ابىروي بولعاندا اتالعان توتەنشە جاعداي كەزىندە كەلۋشىلەر مەن ساۋداگەرلەر زارداپ شەككەن جوق.
18-ءشى قاراشادان 19-شى قاراشاعا قاراعان ءتۇنى استاناداعى «Big شانحاي» بازارىندا دا الاپات ءورت بولدى. وقيعا ورنىنا العاشقى بولىمشەلەر جەتكەندە ءورت ءورشىپ, قاباتارالىق جابىن ءىشىنارا قۇلاعان. قۇتقارۋشىلار ءورت قارقىنىنىڭ جوعارى بولعانىن, قاتتى ءتۇتىن دە ونى سوندىرۋدە ءبىرشاما قيىندىق تۋعىزعانىن اتاپ وتكەن. بازار اكىمشىلىگى ءورت تۋرالى حابارلاماعان. ءورتتى ءبىرىنشى جانە ءۇشىنشى قاباتتىڭ تەرەزەلەرىنەن شىققان قويۋ قارا ءتۇتىندى بايقاپ قالعان ءورت ءسوندىرۋ ءبولىمىنىڭ قىزمەتكەرلەرى وزدەرى انىقتاعان. ءورتتى سوندىرۋگە تجد جانە جەرگىلىكتى اتقارۋشى ورگاننىڭ 165 قىزمەتكەرى جانە شامامەن 62 بىرلىك تەحنيكاسى جۇمىلدىرىلعان.
28 ماۋسىم كۇنى وسكەمەندەگى جەرگىلىكتى تۇرعىندار اراسىندا «وڭتۇستىك بازار» اتالىپ كەتكەن ساۋدا قاتارلارىنان دا ءورت شىقتى. ءورت اۋەلى جاستىقتار ساقتالاتىن قويمادا تۇتانعان. ءورتتىڭ تەز تارالۋ قاۋپى باسىم بولعانمەن, مامانداردىڭ جەدەل ارەكەتىنىڭ ارقاسىندا قىزىل جالىن دەر ۋاقىتىندا اۋىزدىقتالدى.
11 تامىز كۇنى الماتىداعى سولتۇستىك اينالىم كوشەسىندەگى بازار اۋماعىندا تاڭعى ۋاقىتتا ءورت تۇتانعان. قىزىل جالىن 70 م² اۋماقتى شارپىعان. كەيىننەن ءورتتىڭ بازار ماڭىنداعى كونتەينەرلەر مەن اسحانادان شىققانى انىقتالدى.
قوقىس پوليگونىنداعى ورتكە بايلانىستى توتەنشە جاعداي جاريالاندى
15 قىركۇيەك كۇنى الماتىدان 35 شاقىرىم جەردە ورنالاسقان الاتاۋ قالاسىنداعى قوقىس پوليگونىنان ءورت شىقتى. الاپات ءورت 1 اپتاعا سوزىلىپ, ماماندار ءورتتى 7 كۇننەن كەيىن عانا وقشاۋلاي الدى. قالادا وسى ورتكە بايلانىستى تەحنوگەندىك سيپاتتاعى توتەنشە جاعداي جاريالاندى. ءورت 10 گەكتار اۋماقتى شارپىعان. ءورتتى سوندىرۋگە الماتى وبلىسى توتەنشە جاعدايلار دەپارتامەنتى, الماتى قالاسى, شىمكەنت قالاسى, قاراعاندى, جامبىل, تۇركىستان وبلىستارىنىڭ, اباي جانە جەتىسۋ وبلىستارىنىڭ توتەنشە جاعدايلار دەپارتامەنتتەرىنىڭ كۇشتەرى مەن قۇرالدارى, № 28237, 52859 جانە 68303 اسكەري بولىمدەرى, سونداي-اق تجم «قازسەلدەنقورعاۋ» مم ماماندارى جۇمىلدىرىلعان.
