فوتو: istokphoto.com
مەرەكەنىڭ تىنىش, قاۋىپسىز ءارى وقىس وقيعالارسىز وتۋىنە باعىتتالعان بۇل شارالار 20 جەلتوقساننان 3 قاڭتارعا دەيىن جالعاسادى. اتالعان ءىس-شارالاردىڭ باستى ماقساتى – قوعامدىق جانە جول قاۋىپسىزدىگىن قامتاماسىز ەتۋ, قۇقىق بۇزۋشىلىقتاردىڭ الدىن الۋ جانە قوعامدىق ءتارتىپتى ساقتاۋ.
پوليتسيا باسقا دا قىزمەتتەرمەن بىرلەسىپ, كوشەلەردە, اۋلالاردا, ساۋدا ورىندارىندا جانە ادامدار كوپ جينالاتىن جەرلەردە پاترۋلدەۋدى كۇشەيتتى.
جاسوسپىرىمدەر مەن جاستار اراسىندا ءتۇسىندىرۋ جۇمىستارى جۇرگىزىلىپ جاتىر, جول قوزعالىسى ەرەجەلەرىنىڭ, كوشى-قون زاڭناماسىنىڭ ساقتالۋىنا باقىلاۋ جاسالىپ جاتىر, سوداي-اق الكوگولدىڭ, ەسىرتكىنىڭ جانە وزگە دە تىيىم سالىنعان زاتتاردىڭ زاڭسىز اينالىمىنا توسقاۋىل قويىلدى. ءدال جاڭا جىل قارساڭىندا وتشاشۋ مەن پەتاردالاردى دۇرىس قولدانباۋدىڭ سالدارىنان جاراقات الۋ, ءورت شىعۋ جانە جازاتايىم وقيعالار سانى كۇرت ارتادى.
وسىعان بايلانىستى پوليتسيا ورتكە قارسى قىزمەتپەن بىرلەسىپ, پيروتەحنيكالىق بۇيىمداردىڭ اينالىمىن باقىلاۋ بويىنشا جىل سايىن ارنايى ءىس-شارالار وتكىزەدى. بيىل ءتورت مىڭنان استام تەكسەرۋ جۇرگىزىلىپ, شامامەن بەس ءجۇز زاڭ بۇزۋشىلىق انىقتالدى, سەگىز مىڭنان استام سەرتيفيكاتتالماعان ءارى قاۋىپتى پيروتەحنيكالىق ءونىم تاركىلەندى.
«پيروتەحنيكالىق بۇيىمداردى تەك ارنايى جانە رەسمي ساۋدا ورىندارىنان عانا ساتىپ الۋ قاجەت. سايكەستىك سەرتيفيكاتىنىڭ بولۋىنا نازار اۋدارىڭىزدار, قولدانۋ نۇسقاۋلىعىن مۇقيات وقىپ شىعىپ, ءونىمنىڭ جارامدىلىق مەرزىمىن مىندەتتى تۇردە تەكسەرۋ قاجەت», دەلىنگەن حابارلامادا.
مەرزىمى وتكەن پيروتەحنيكانى قولدانۋعا, سونداي-اق ونى بالالاردىڭ ەرەسەكتەردىڭ باقىلاۋىنسىز پايدالانۋىنا قاتاڭ تىيىم سالىنادى.
