جاڭا جىل ءتۇنى قانداي ارەكەتتەر ءۇشىن ايىپپۇل سالىنادى؟

ءداستۇرلى تۇردە 31 جەلتوقساننان 1 قاڭتارعا قاراعان ءتۇنى ەل تۇرعىندارى دالادا سەرۋەندەپ, وتشاشۋلاردى تاماشالاپ, وتباسىلىق باسقوسۋلاردى وتكىزەدى. الايدا ەلىمىزدە جاڭا جىلدى ايىپپۇلسىز قارسى الۋ ءۇشىن قولدانىستاعى ەرەجەلەردى ەستەن شىعارماعان ءجون.

مەرەكەدە ايىپپۇل تولەگىڭىز كەلمەسە. . . 

كوپتەگەن قازاقستاندىقتار وتشاشۋدى دۇرىس پايدالانباعانى ءۇشىن 20-30 ايلىق ەسەپتىك كورسەتكىش (اەك) كولەمىندە ايىپپۇل سالىناتىنىن بىلەدى. بۇل 1 قاڭتاردان باستاپ 86 500-129 750 تەڭگەنى قۇرايدى. الايدا جاۋاپكەرشىلىك تەك وتشاشۋعا عانا قاتىستى ەمەس.

«كرىشا» پورتالىنىڭ ەسكە سالۋىنشا, مەرەكە تۇنگى تىنىشتىقتى ساقتاۋ تالاپتارىن جويمايدى. جۇمىس كۇندەرى شۋعا تىيىم سالۋ ۋاقىتى – 22:00-دەن 09:00-گە دەيىن, ال دەمالىس جانە مەرەكە كۇندەرى – 23:00-دەن 10:00-گە دەيىن.

تىنىشتىقتى بۇزۋعا قاتتى مۋزىكا, تەلەديداردىڭ داۋىسىن قاتتى قويۋ, ۇرىس-كەرىس, جانجال, سونداي-اق فەيەرۆەرك پەن پەتاردالاردى اتۋ جاتادى.

ەرەجە بۇزعاندارعا ايىپپۇل سالىنادى. پوليتسيا شاعىمداردى تىركەپ, ءتۇسىندىرۋ جۇمىستارىن جۇرگىزەدى جانە ايقىن زاڭبۇزۋشىلىق انىقتالعان جاعدايدا حاتتاما تولتىرادى:

• جەكە تۇلعالارعا – 5 اەك (21 625 تەڭگە);

• زاڭدى تۇلعالارعا – 20-دان 100 اەك-كە دەيىن (86 500432 500 تەڭگە);

• قايتالاپ بۇزعان جاعدايدا ايىپپۇل ەكى ەسەگە كوبەيەدى.

مىسالى, جاڭا جىل ءتۇنى سامالدىقتان ساليۋت اتقان تۇرعىن بىردەن ءۇش ايىپپۇل تولەۋى مۇمكىن:

• تىنىشتىقتى بۇزعانى ءۇشىن – 21 625 تەڭگە;

• پيروتەحنيكانى رۇقسات ەتىلمەگەن جەردە پايدالانعانى ءۇشىن – 86 500 تەڭگە;

• ءورت قاۋىپسىزدىگى ەرەجەلەرىن بۇزعانى ءۇشىن – 21 625 تەڭگە.

جالپى سوما – 129 750 تەڭگە (ەگەر بۇل ءبىرىنشى ءارى سوڭعى زاڭبۇزۋشىلىق بولسا).

ايىپپۇلدان قالاي قۇتىلۋعا بولادى؟

كورشىلەرگە قۇرمەتپەن قاراۋ, شامادان تىس شۋلاماۋ جانە فەيەرۆەركتەردى قاۋىپسىز ءارى رۇقسات ەتىلگەن جەرلەردە پايدالانۋ جەتكىلىكتى.

قازاقستاندا زاڭسىز شىرشا كەسكەندەرگە قانداي جازا قاراستىرىلعان؟

ايتا كەتەيىك, قازاقستاندا پيروتەحنيكانى زاڭسىز ساتقان ساتۋشىلارعا دا جاۋاپكەرشىلىك قاراستىرىلعان. 2025 جىلى ءتيىستى قۇجاتتارسىز پيروتەحنيكالىق بۇيىمداردى ساتۋ ءۇشىن 98 300 تەڭگە كولەمىندە ايىپپۇل كوزدەلگەن.