«اباي ەلىنە ينۆەستورلار اعىلدى: 1 مەگافورۋم, 15 مەموراندۋم» دەگەن ماقالامىزدا (25.06.2025) ەلىمىزدەگى «Yokohama», «Triangle» كومپانيالارىنىڭ رەسمي ديستريبيۋتورى, بەلگىلى كاسىپكەر سىرىمبەك تاۋ مىرزانىڭ: «ابايدىڭ 180 جىلدىعىنا وراي بەيجىڭدە اباي ءۇيىن اشامىز. بۇعان قوسا, اباي ەلىندە ءوزىمىزدىڭ «پانا» قوناقۇي جەلىسىن اشۋدى جوسپارلاپ وتىرمىز. 500 ورىندىق ءماجىلىس زالى بولادى. بەس زاماناۋي, ستاندارتقا سايكەس مەيرامحانالار اشىلادى. ەكىنشى جوبامىز – «Semey Mall» اتالىپ كەتكەن قۇرىلىس. كوپ جىلدان بەرى كەزەك كۇتىپ تۇرعانى بەلگىلى. ەكى-ءۇش كۇننەن كەيىن قۇرىلىس جوباسىن باستايمىز», دەگەن ويماقتاي پىكىرى بار-تىن. مىنە, جازدا ايتىلعان جۇمىستاردىڭ العاشقى لەگى جىل سوڭىندا ناتيجە بەرە باستاعانىنا كۋامىز.
ءسويتىپ, سەمەي شاھارىندا بەس جۇلدىزدى قوناقۇي مەن مەيرامحانا كەشەنى اشىلدى. «سەمەي – قازاقتىڭ سانكت-پەتەربۋرگى» دەپ بەكەر ايتىلماسا كەرەك. راسىندا دا, اباي زامانىنداعى, كەيىنگى الاش ارىستارىنىڭ ءىزى قالعان تاريحي قالانىڭ كونە عيماراتتارى كوپ. 25 جىل قاراۋسىز, كۇتىمسىز قالعاندىقتان, ءبىراز تولەجىپ تۇرعانى بەلگىلى. ونىڭ ءبارىن ءسۇرىپ, جاڭا عيمارات سالۋعا بولار-اۋ, الايدا وسىنشا ارحيتەكتۋرالىق ەستەلىكتەردى بۇزۋ تاريحتى كۇرەۋمەن بىردەي سەكىلدى. وسى رەتتە اشىلىپ وتىرعان «Pana Unique Semey» بەس جۇلدىزدى قوناقۇي كەشەنىنىڭ عيماراتى 1890 جىلى اعايىندى مۋسيندەر سالعان قالاداعى العاشقى مەحانيكالاندىرىلعان ديىرمەن بولعان ەكەن. ودان باسقا دا ءتۇرلى قىزمەتتەر اتقارعان تاريحي نىسان ۋاقىتتىڭ تالاي سىناقتارىنا توزە بىلگەن, بۇگىن دە سىنى كەتسە دە, سىرى كەتپەگەن كونە عيمارات 5 ايدا قايتا جاڭعىرتىلدى. اۋەلگى ساۋلەتتىك كەلبەتى ساقتالا وتىرىپ, زاماناۋي قوناقۇي كەشەنىنە اينالدىرىلدى. بۇل جوبا قالا تاريحىن قۇرمەت تۇتىپ, جاڭا مازمۇنمەن دامىتۋدىڭ جارقىن ۇلگىسى دەۋگە ابدەن بولادى. ەرتىس وزەنىنىڭ جاعاسىندا ورنالاسقان 5 قاباتتى عيماراتتىڭ سىرتى قىزىل كىرپىشپەن كومكەرىلگەن.
قوناقۇي كەشەنى – جالپى قۇنى شامامەن 6,5 ملرد تەڭگەنى قۇرايتىن وڭىردەگى ءىرى ينۆەستيتسيالىق جوبالاردىڭ ءبىرى. جاڭعىرتۋ جۇمىستارى قىسقا مەرزىم ىشىندە اياقتالىپ, قۇرىلىس بارىسىندا 250 ادام ۋاقىتشا جۇمىسپەن قامتىلعان. كەشەن ىسكە قوسىلعاننان كەيىن 105 تۇراقتى جۇمىس ورنى اشىلادى. قوناقۇيدىڭ جالپى اۋدانى 8 300 شارشى مەتر, سىيىمدىلىعى 180 ورىن (91 ءنومىر). كەشەن قۇرامىندا «ساندىق», «تارى» مەيرامحانالارى مەن كوفەحاناسى, سونداي-اق «مادلەن», «يتاليانو» رەستوراندارى, SPA ورتالىعى مەن كونفەرەنتس-زال قاراستىرىلعان.
ەرەكشە كەشەننىڭ اشىلۋ سالتاناتىنا وبلىس اكىمى بەرىك ءۋالي, مۋسين ۇرپاقتارى, تۋريزم سالاسىنىڭ ماماندارى, كاسىپكەرلەر مەن ونەر قايراتكەرلەرى, جەرگىلىكتى زيالى قاۋىم وكىلدەرى قاتىستى.
وبلىس باسشىسى جوبا ءوڭىردىڭ الەۋمەتتىك-ەكونوميكالىق دامۋىنا, تۋريزم مەن قىزمەت كورسەتۋ سالاسىنىڭ وسۋىنە, كاسىپكەرلىكتى قولداۋعا, جەرگىلىكتى تۇرعىندار ءۇشىن جاڭا جۇمىس ورىندارىن قۇرۋعا سەرپىن بەرەتىنىن جەتكىزدى. سونىمەن قاتار بۇل باستاما تۋعان جەرگە ينۆەستيتسيا تارتۋ ارقىلى ءوڭىر الەۋەتىن ارتتىرۋدىڭ ايقىن ۇلگىسى ەكەنىن ايتتى.
– بۇگىن ۇلكەن تاريحي وقيعانىڭ كۋاگەرى بولىپ وتىرمىز. «Pana Unique Semey» – سەمەيدەگى ۇلكەن قوناقۇي كەشەنى. مۇنداي قوناقۇي قالامىزدا بۇرىن-سوڭدى بولعان ەمەس. 1890 جىلى بوي كوتەرگەن تاريحي عيماراتتىڭ ارحيتەكتۋرالىق ساۋلەتىن بۇزباي قالپىنا كەلتىرۋ – ينۆەستورلاردىڭ ۇلكەن جەڭىسى. سەمەي – قازاق جازبا ادەبيەتىنىڭ نەگىزىن قالاعان ابايدىڭ ەلى. اقىن-جازۋشىلارىمىز الاڭسىز شىعارمالارىن جازىپ, اياقتاۋ ءۇشىن قوناقۇيدەن ءبىر ءنومىر ارناساڭىز دەپ سىرىمبەت تاۋ مىرزاعا ءوتىنىش ايتقانبىز. سول ءوتىنىشىمىز قاناعاتتاندىرىلدى. ياعني ەلىمىزدەگى كەز كەلگەن اقىن-جازۋشى سەمەيگە كەلىپ, 10 كۇن قوناقۇيدە بولىپ, شىعارمالارىن جازۋعا مۇمكىندىك الىپ وتىر. وسى جوباعا اتسالىسقان ينۆەستورلار قايرات يتەمگەنوۆكە, سىرىمبەك تاۋعا العىس بىلدىرەمىز, – دەدى وبلىس اكىمى.
جالپى, وبلىستا جىل باسىنان بەرى ىسكە اسىرىلىپ جاتقان جوبالار سانى 29-دان 97-گە دەيىن ارتتى. تارتىلعان ينۆەستيتسيا كولەمى 2,2 ترلن تەڭگەدەن 3,5 ترلن تەڭگەگە دەيىن ءوستى. ولاردىڭ ىشىندە 50 جوبا ۇلتتىق تسيفرلىق ينۆەستيتسيالىق پلاتفورماعا ەنگىزىلگەن.
اكىمنىڭ ايتۋىنشا, ەسەپتى كەزەڭدە وبلىس ەكونوميكاسىنا 495,2 ملرد تەڭگە ينۆەستيتسيا تارتىلىپ, ناقتى كولەم يندەكسى 104,6%-دى قۇرادى (ونىڭ ىشىندە جەكە ينۆەستيتسيا – 355 ملرد تەڭگە, ناقتى كولەم يندەكسى – 98,1%). جىل سوڭىنا دەيىن 14,2 ملرد تەڭگەگە 280 جۇمىس ورنىن قۇرۋدى كوزدەيتىن تاعى 4 جوبا ىسكە اسىرىلادى. سەمەي قالاسىندا جاڭا شاعىن اۋداننىڭ جوباسى ازىرلەنىپ جاتىر. بۇل ينفراقۇرىلىم تۇرعىن ءۇي قۇرىلىسىن دامىتۋعا مۇمكىندىك تۋدىرىپ, جاقىن ارادا 270,5 مىڭ شارشى مەتر تۇرعىن ءۇي پايدالانۋعا بەرىلەدى.
ايتا كەتۋ كەرەك, اباي ەلىندە تەك سەمەي قالاسى عانا ەمەس, اۋدان, قالا ورتالىقتارىندا دا قوناقۇي, مەيرامحانا, ياعني قوعامدىق قىزمەت كورسەتۋ بيزنەسىن دامىتۋ ماقساتىندا ينۆەستيتسيا تارتىلا بەرەدى.
اباي وبلىسى
