فوتو: e-history.kz
جىل باسىندا قازاق حالقى مۇحتار ماعاۋيننەن ايىرىلىپ قالدى. 84 جاسىنا دەيىن قالامىن تاستاماعان, قازاق ادەبيەتىنىڭ كوكجيەگىن كەڭەيتكەن كلاسسيك جازۋشى.
ىلە-شالا ابايتانۋ عىلىمىنىڭ كورنەكتى وكىلى, حاكىمنىڭ شىعىستىق دۇنيەتانىمىن زەرتتەگەن مەكەمتاس مىرزاحمەت ۇلى دۇنيەدەن وزدى. عاسىر جۇرەك عالىمنىڭ 94 جاسىنا قاراعان شاعىندا توقتادى.
21 اقپاندا دۋلات يسابەكوۆ كوز جۇمدى. ونىڭ «اپكە», «قارعىن», «گاۋھارتاس» سىندى شىعارمالارى قازاق پروزاسىنا جاڭا لەپ اكەلگەن ەدى.
ءساۋىر ايىندا كورنەكتى عالىم, فولكلورتانۋشى, اكادەميك سەيىت قاسقاباسوۆ قايتىس بولدى. ول اۋىز ادەبيەت جانرعا جىكتەپ, عىلىمي جۇيەسىن جاسادى.
قازاق پروزاسى مەن دراماتۋرگياسىنا ەرەسەن ەڭبەك سىڭىرگەن اكىم تارازيدەي الىپ بايتەرەك تە قۇلادى.
مامىردا كوك تۇرىكتەر سارىنىن قايتا جاڭعىرتقان اقىن تەمىرحان مەدەتبەك 79 جاسىندا باقيلىق بولدى. ول قازاق پوەزياسىنا باعزى رۋح پەن ىلكى فورمانى اكەلدى.
68 جاسىندا قازاقستاننىڭ ەڭبەك سىڭىرگەن قايراتكەرى اكتەر قايرات كەمالوۆ ۇلى ساپارعا اتتاندى. كوپشىلىك ونى «قازاق حاندىعى» تەلەسەريالىنداعى كەرەي حان وبرازىمەن جاقسى تانىدى.
4 تامىزدا عارىشكەر تالعات مۇساباەۆ 74 جاسىندا ومىردەن ءوتتى. ول عارىشقا ءۇش مارتە ۇشقان قازاق بولاتىن.
پوەزيا, دراماتۋرگيا, مۋزىكا سالاسىنا وراسان ەڭبەك ەتكەن يسرايل ساپارباي دا بۇ دۇنيەمەن قوش ايتىستى. حالىق ونى «مەن قازاق قىزدارىنا قايران قالام» ولەڭىمەن بىردەن تانيتىن.
سونىمەن قاتار قازاق حالقى اقىن كۇلاش احمەتوۆامەن, اكتريسا داريعا تىلەنديەۆامەن, ادەبيەتتانۋشى ماقسات ءتاج-مۇرات جانە ادەبيەت سىنشىسى, ستسەناريست, رەجيسسەر عالىم دوسكەنمەن قوش ايتىستى.
ۇلى تۇلعالاردىڭ تاۋداي اماناتى ەندى كەلەر ۇرپاققا ميراس بولعاي.
