فوتو: gov.kz (اشىق دەرەككوز)
ورتالىق ازياداعى كوشباسشى
2025 جىلدىڭ قورىتىندىسى بويىنشا قازاقستان ۆيزاسىز ەلدەر سانى جاعىنان ورتالىق ازيادا ءبىرىنشى ورىنعا شىقتى. ەلىمىز بۇل كورسەتكىش بويىنشا قىرعىزستان, وزبەكستان, تاجىكستان جانە تۇرىكمەنستاندى باسىپ وزدى.
ICAO ستاندارتتارىنا 95,7% سايكەستىك
قازاقستان پاسپورتىنىڭ سەنىمدىلىگىن 2025 جىلعى 30 تامىز بەن 15 قىركۇيەك ارالىعىندا وتكەن اۆياتسيالىق قاۋىپسىزدىك ءاۋديتى دە راستادى. ناتيجەسىندە قازاقستان – 95,7% سايكەستىك كورسەتتى. الەمدىك ورتاشا كورسەتكىش – 72%, ەۋروپاداعى ورتاشا دەڭگەي – 87,9%. بۇل كورسەتكىشتەر قۇجاتتىڭ جالعان جاسالۋىنان جوعارى دەڭگەيدە قورعالعانىن جانە حالىقارالىق تالاپتارعا تولىق ساي ەكەنىن بىلدىرەدى.
جاڭا پاسپورت: كۇشەيتىلگەن قورعانىس پەن بارىس بەينەسى
2025 جىلعى 3 شىلدەدەن باستاپ قازاقستاندا پاسپورت پەن جەكە كۋالىكتىڭ جاڭارتىلعان ۇلگىلەرى بەرىلە باستادى. قۇجاتتاردا قورعانىس دەڭگەيى ايتارلىقتاي كۇشەيتىلدى. اتاپ ايتقاندا:
- قوسىمشا قورعانىس ەلەمەنتتەرى ەنگىزىلدى;
- ۆيزۋالدىق جانە تەحنولوگيالىق سيپاتتامالار كۇردەلەندىرىلدى;
- قورعانىس ەلەمەنتتەرىنىڭ ءبىرى رەتىندە بارس بەينەسى قولدانىلدى.
بۇل وزگەرىستەر جالعان قۇجاتتاردى تەز انىقتاۋعا جانە وتاندىق پاسپورتقا دەگەن سەنىمدى ارتتىرۋعا مۇمكىندىك بەرەدى.
بارىس نەلىكتەن تاڭدالدى؟
اسلان اتالىقوۆتىڭ ايتۋىنشا, بارىس – مەملەكەتتىڭ سيمۆوليكاسىمەن تىعىز بايلانىستى بەينە. ول كۇش, تۇراقتىلىق پەن تاۋەلسىزدىكتى بىلدىرەدى.
قارتتار پاسپورتتى ۇيدەن شىقپاي-اق الادى
ءىىم قىزمەتتەردىڭ قولجەتىمدىلىگىن ارتتىرۋعا ەرەكشە ءمان بەرىپ وتىر. ەگدە جاستاعى جانە قوزعالىسى شەكتەۋلى ازاماتتار ءۇشىن ۇيگە بارىپ قۇجات راسىمدەۋ قىزمەتى كورسەتىلەدى. سول ورايدا, كوشى-قون قىزمەتىنىڭ ماماندارى:
- ءموبيلدى جابدىقپەن ازاماتتىڭ ۇيىنە بارادى;
- فوتوعا ءتۇسىرىپ, قولتاڭبانى سول جەردە قابىلدايدى;
- حقكو-عا بارۋ قاجەتتىلىگىن جويادى.
2025 جىلى قۇجات راسىمدەگەن ەڭ جاسى ۇلكەن ازاماتتار – 1915 جىلى تۋعان, قوستاناي, اقتوبە وبلىستارىنىڭ ەكى تۇرعىنى. ەكەۋى دە 110 جاستا.
شەتەلدە پاسپورت الۋ – 30 كۇندە جۇزەگە اسادى
قازاقستاندا قۇجاتتاندىرۋ سالاسى بەلسەندى تۇردە تسيفرلاندىرىلىپ جاتىر. قازىرگى ۋاقىتتا:
- ەلەكتروندى ءوتىنىش 99 شەتەلدىك مەكەمەدە قابىلدانادى;
- قىزمەت 71 ەلدە قولجەتىمدى;
- شەتەلدە پاسپورت الۋ مەرزىمى 6 ايدان 30 كۇنگە دەيىن قىسقاردى.
2025 جىلعى كورسەتكىشتەر
جىل باسىنان بەرى كوشى-قون قىزمەتى – 1,9 ملن جەكە كۋالىكتى, 1,1 ملن قازاقستان پاسپورتىن, 303 مىڭ بالانىڭ پاسپورتىن راسىمدەگەن.
پاسپورت – مەملەكەتتىڭ بەدەلى
بۇگىندە قازاقستان پاسپورتى – تەك شەكارادان ءوتۋ قۇجاتى ەمەس, ول مەملەكەتتىڭ بەدەلىن, تەحنولوگيالىق دەڭگەيىن جانە حالىقارالىق سەنىمدىلىگىن كورسەتەتىن ماڭىزدى كورسەتكىشكە اينالدى. ۆيزاسىز ەلدەردىڭ كوبەيۋى, قورعانىستىڭ كۇشەيۋى جانە تسيفرلاندىرۋ قازاقستان ازاماتتارىنىڭ الەمگە اشىقتىعىن ارتتىرىپ وتىر.
