ءىسساپار احمەت ياساۋي ۋنيۆەرسيتەتى, عىلىم ورداسى, Astana IT University جانە گارۆارد ۋنيۆەرسيتەتىنىڭ كونسورتسيۋمدىق كەلىسىمى نەگىزىندە جۇزەگە اسىپ وتىر. قازاقستاندىق دەلەگاتسيا قۇرامىنا احمەت ياساۋي ۋنيۆەرسيتەتى عىلىم دەپارتامەنتىنىڭ ديرەكتورى, PhD حايرۋللا ماساديكوۆ, Nazarbayev University الەۋمەتتانۋ جانە انتروپولوگيا كافەدراسىنىڭ پروفەسسورى, PhD ۇلان بيعوجين كىردى.
نەگىزگى ماقسات – قازاقستاننىڭ تاريحي قولجازبالارىن رەەسترلەۋ, عىلىمي كاتالوگتاۋ جانە تسيفرلاندىرۋ بويىنشا الەمدىك تاجىريبەنى زەردەلەۋ, سونداي-اق گارۆارد ۋنيۆەرسيتەتىنىڭ جانە دەۆيس ورتالىعى عالىمدارىمەن تىعىز بايلانىس ورناتۋ, جەتەكشى ساراپشىلارمەن پىكىر الماسۋ جانە عىلىمي ماسەلەلەردى تالقىلاۋ, ورتاق عىلىمي ءىس-شارالار ۇيىمداستىرۋ ماسەلەسىنە توقتالۋ.
عالىمدار گارۆاردتىڭ دەۆيس ورتالىعى مەن حوۋتون, ۆايدەنەر كىتاپحانالارىنىڭ ماماندارىمەن كەزدەسىپ, سيرەك قولجازبالار قورىمەن, كاتالوگتاۋ جانە تسيفرلاندىرۋدىڭ زاماناۋي تاسىلدەرىمەن تانىستى. HOLLIS جۇيەسى ارقىلى ورتالىق ازياعا قاتىستى يسلام دەرەككوزدەرىنىڭ بازاسىمەن جۇمىس جۇرگىزدى. كەزدەسۋلەر بارىسىندا بىرلەسكەن سەمينارلار, ۆوركشوپتار, عىلىمي جوبالار جانە شاعاتاي ءتىلىن وقىتۋ باعىتىندا جاڭا سەرىكتەستىك, قازاقستانعا گارۆارد عالىمدارىنىڭ ساپارىن ۇيىمداستىرۋ مۇمكىندىكتەرى قارالدى.
سونىمەن قاتار گارۆارد عالىمدارى عىلىمي جوبا اياسىندا شاعاتاي ءتىلىنىڭ ونلاين سوزدىگىن ازىرلەۋ تۋرالى باستاما ۇسىندى. بۇل حالىقارالىق دەڭگەيدەگى بىرەگەي عىلىمي ءونىم بولماق. ءىسساپار قازاقستان عالىمدارىنا سيرەك قولجازبالارمەن جۇمىس ىستەۋدىڭ زاماناۋي ادىستەرىن مەڭگەرۋگە, حالىقارالىق عىلىمي جەلىنى كەڭەيتۋگە, جوبا ناتيجەلەرىن جاڭا دەڭگەيدە ىسكە اسىرۋعا مۇمكىندىك بەرەدى.
