ەلوردادا ەلەكتر قۋاتىنا ارنالعان تاريفتەردىڭ 2026-2030 جىلدارعا ارنالعان جاڭا باعاسى بەكىتىلدى. رەتتەۋشى ورگاننىڭ شەشىمىنە سايكەس, تاريف جىل سايىن كەزەڭ-كەزەڭىمەن ءوسىپ وتىرادى:
2026 جىلى – 1 كۆت/ساع ءۇشىن 8,86 تەڭگە (2025 جىلى – 7,53 تەڭگە);
2027 جىلى – 9,31 تەڭگە;
2028 جىلى – 9,71 تەڭگە;
2029 جىلى – 10,12 تەڭگە;
2030 جىلى – 10,56 تەڭگە.
وسىلايشا, تاريفتەردى جىل سايىن جوسپارلى تۇردە كوتەرۋ قاراستىرىلعان.«استانا-اەك» حابارلاعانداي, العاشقى باعا ءوسىمى 2026 جىلدىڭ ماۋسىم ايىندا بولۋى مۇمكىن.
«قازىرگى ۋاقىتتا «استانا-اەك» اق ەنەرگيامەن جابدىقتاۋ قىزمەتتەرىنىڭ ءتاريفىن كوتەرۋگە ءوتىنىم دايىنداپ جاتىر. تاريف دەڭگەيى تۋرالى اقپارات بۇقارالىق اقپارات قۇرالدارى ارقىلى تۇتىنۋشىلارعا جەتكىزىلەدى, سونداي-اق قوعامدىق تىڭداۋلار ۇيىمداستىرىلادى», دەپ حابارلادى كومپانيا وكىلدەرى.
كومپانيا تاريفتەردىڭ ءوسۋىن ەلەكتر جەلىلەرىنە جۇرگىزىلەتىن جاڭعىرتۋ جۇمىستارى مەن جۇيەگە تۇسەتىن كۇشتىڭ ارتۋىمەن ءتۇسىندىردى.
ايتا كەتەيىك, تاريف بويىنشا تۇپكىلىكتى شەشىم ءالى دە تالقىلانىپ, قوعامدىق تىڭداۋلار وتكەننەن كەيىن قابىلدانادى. ازىرگە تۇتىنۋشىلار ءۇشىن باعا وزگەرىسسىز قالادى.
نۇربولات امانبەك
