جوبا ۇلتتىق قاۋىپسىزدىك كوميتەتى شەكارا قىزمەتىنىڭ اسكەري-پاتريوتتىق قىزمەت باسقارماسى باستاماسى نەگىزىندە «Balapan» تەلەارناسىمەن بىرلەسىپ جۇزەگە اسىرىلعان.
«شەكاراشى بالاقاي» – قازاقستانداعى اسكەري تاقىرىپتاعى دەبيۋتتىك انيماتسيالىق جوبا. مۋلتحيكايا جاس ۇرپاقتىڭ بويىندا وتانسۇيگىشتىك رۋحتى قالىپتاستىرۋ, مەملەكەتتىك شەكارانى قورعاۋدىڭ ماڭىزىن ءتۇسىندىرۋ جانە اسكەري قىزمەتكە دەگەن قۇرمەتتى ارتتىرۋدى كوزدەيدى.
ءىس-شارا بارىسىندا ۇقك شەكارا قىزمەتى ديرەكتورىنىڭ ورىنباسارى, گەنەرال-مايور تولەۋجان ءجۇنىسوۆ جوبانىڭ ماڭىزدىلىعىنا توقتالىپ, اسكەري-پاتريوتتىق تاربيەنىڭ جاس ۇرپاق ءۇشىن ەرەكشە ءرول اتقاراتىنىن اتاپ ءوتتى. ونىڭ ايتۋىنشا, بۇگىندە شەكارا قىزمەتى جۇيەسىندە 380 اسكەري-پاتريوتتىق كلۋب قارقىندى جۇمىس ىستەيدى. وندا 5 700-دەن استام تاربيەلەنۋشى ءبىلىم الىپ جاتىر.
«شەكاراشى بالاقاي» سياقتى جوبانىڭ دۇنيەگە كەلۋى ءبىز ءۇشىن ۇلكەن قۋانىش. بۇل – تەك مۋلتحيكايا عانا ەمەس, بالالارعا تۇسىنىكتى تىلدە وتانعا قىزمەت ەتۋ, شەكارا كۇزەتشىلەرىنىڭ ەڭبەگىن قۇرمەتتەۋ جانە ەل الدىنداعى جاۋاپكەرشىلىكتى سەزىنۋ قۇندىلىقتارىن جەتكىزەتىن زاماناۋي قۇرال. شەكارا قىزمەتى ءۇشىن اسكەري-پاتريوتتىق تاربيە ارقاشان ەرەكشە نازاردا, جانە ءبىز بۇل باعىتتىڭ جاڭا, قولجەتىمدى ءارى اسەرلى فورماتتا دامىپ جاتقانىنا قۋانىشتىمىز», دەدى شەكارا قىزمەتى ديرەكتورىنىڭ ورىنباسارى.
ءىس-شارا بارىسىندا قوناقتار مۋلتحيكايانى تاماشالاپ, جوبانىڭ باستاماشىلارى جانە ونى جۇزەگە اسىرعان شىعارماشىلىق توپ وكىلدەرىمەن كەزدەستى.
اتالعان ءىس-شاراعا اسكەري-پاتريوتتىق كلۋبتاردىڭ تاربيەلەنۋشىلەرى, وقۋشىلار, سونداي-اق مەملەكەتتىك ورگاندار مەن رەسپۋبليكالىق باق وكىلدەرى قاتىستى. قاتىسۋشىلار مۇنداي جوبالاردىڭ جاس ۇرپاقتىڭ پاتريوتتىق تاربيەسىندەگى ماڭىزى زور ەكەنىن اتاپ ءوتتى.
