بيىلعى ماراپاتتاۋ ءراسىمى كولىك جانە لوگيستيكا سالاسىنىڭ اۋقىمى كەڭەيىپ, ماڭىزى ارتقانىن تاعى ءبىر مارتە كورسەتتى. ۇيىمداستىرۋ كوميتەتىنىڭ مالىمەتىنشە, 2025 جىلى بايقاۋعا 100-دەن استام ءوتىنىم تۇسكەن. وعان تمد ەلدەرى, ەاەو مەملەكەتتەرى, قىتاي, بىرىككەن اراب امىرلىكتەرى جانە باسقا دا ەلدەردىڭ كومپانيالارى مەن ساراپشىلارى قاتىسقان.
جەڭىمپازدار 21 نوميناتسيا بويىنشا انىقتالدى. ولاردىڭ قاتارىندا ينفراقۇرىلىم, تسيفرلاندىرۋ, كادر دايارلاۋ, قوعامدىق باستامالار جانە سالانىڭ تۇراقتى دامۋىنا باعىتتالعان جوبالار بار. بۇل پرەميانىڭ تەك تەحنولوگيا مەن بيزنەسكە عانا ەمەس, ادام كاپيتالى مەن الەۋمەتتىك جاۋاپكەرشىلىككە دە ءمان بەرەتىنىن كورسەتەدى.
Magistral Awards پرەمياسى كولىك مينيسترلىگىنىڭ, «قازاقستان تەمىر جولى» ۇلتتىق كومپانياسىنىڭ, «KAZLOGISTICS» كولىك وداعىنىڭ جانە ن. يسينگارين اتىنداعى كولىك باستامالارىن قولداۋ قورىنىڭ ۇيىمداستىرۋىمەن ءوتتى.
سالتاناتتى جيىندا ەۋرازيالىق ەكونوميكالىق كوميسسيانىڭ قۇتتىقتاۋ ءسوزى وقىلدى. وندا كولىك پەن لوگيستيكا بۇگىندە ايماق ەلدەرى ەكونوميكاسىنداعى ستراتەگيالىق رەسۋرسقا اينالىپ وتىرعانى ايتىلدى. قازىرگى كەزدە جاڭا باعىتتار قالىپتاسىپ, تسيفرلىق شەشىمدەر ەنگىزىلىپ, ۇلتتىق ستراتەگيالار ءوزارا ۇيلەستىرىلىپ جاتقانىن اتاپ ءوتتى. مۇنىڭ ءبارى ءبىرتۇتاس ەۋرازيالىق كەڭىستىك قۇرۋعا جول اشىپ وتىر دەگەن وي ايتىلدى.
ماراپاتتاۋ بارىسىندا قازاقستاننىڭ كولىك سالاسىنا جاۋاپتى وكىلدەرى مەن قوعام قايراتكەرلەرى دە ءسوز سويلەدى. ولاردىڭ قاتارىندا كولىك ۆيتسە-ءمينيسترى جانىبەك تايجانوۆ, سەنات دەپۋتاتى ەۆگەني بولگەرت, ءماجىلىس دەپۋتاتى مۇرات ابەنوۆ, «قازاقستان تەمىر جولى» كومپانياسى باسقارما توراعاسىنىڭ ورىنباسارى مارات شاكەنوۆ, بۇۇ عالامدىق كوممۋنيكاتسيالار دەپارتامەنتىنىڭ وكىلى جانە بۇۇ قازاقستانداعى اقپارات بيۋروسىنىڭ باسشىسى ۆلاستيميل سامەك بولدى.
سالانىڭ دامۋىنا ۇلەس قوسىپ جۇرگەن سپيكەرلەر كولىك ينفراقۇرىلىمىنىڭ ەكونوميكا مەن وڭىرارالىق بايلانىستارداعى ءرولىن اتاپ ءوتتى. سونىمەن قاتار كولىك دالىزدەرىنىڭ قاۋىپسىزدىگى, تسيفرلاندىرۋ جانە حالىقارالىق ارىپتەستىكتىڭ ماڭىزىنا ەرەكشە توقتالدى.
پرەميانىڭ باستاماشىسى ءارى TLK Media كومپانياسىنىڭ باس ديرەكتورى جاننا يسينگارينا جوبانىڭ كەيىنگى 4 جىلدا ۇلكەن جولدان وتكەنىن ايتتى. ونىڭ سوزىنشە, العاشقى كەزدە بۇل باستاما ۇلتتىق دەڭگەيدە باستالعانىمەن, بۇگىندە حالىقارالىق كاسىبي مويىنداۋ الاڭىنا اينالعان.
«بۇل جوبا العاش قۇرىلعاندا ءبىز سالالىق قاۋىمداستىقتى بىرىكتىرۋدى ماقسات ەتتىك. بۇگىن پرەميا شەكارا اسىپ, حالىقارالىق دەڭگەيدە مويىندالعان كاسىبي پلاتفورماعا اينالدى. بۇل كولىك پەن لوگيستيكا سالاسىندا ەڭبەك ەتىپ جۇرگەن مىڭداعان ماماننىڭ ەڭبەگىنە بەرىلگەن باعا دەپ بىلەمىن», دەدى ول.
2025 جىلى پرەميانىڭ مازمۇندىق باعىتى دا كەڭەيە ءتۇستى. ءداستۇرلى سالالىق جەتىستىكتەرمەن قاتار ەكولوگيالىق جاۋاپكەرشىلىك, ۇرپاقتار ساباقتاستىعى جانە جاستار باستامالارىنا ايرىقشا نازار اۋدارىلدى. ۇيىمداستىرۋشىلار بۇل باعىتتاردى ەۋرازياداعى كولىك جۇيەسىنىڭ تۇراقتى دامۋى ءۇشىن ماڭىزدى فاكتورلار دەپ اتاپ ءوتتى.
