فوتو: nazarbayevfund.kz
Nazarbayev University دوكتورانتۋرانى قولداۋ باعدارلامالارىن كەڭەيتەدى. ۋنيۆەرسيتەتتىڭ 15 جىلدىعىنا وراي PhD باعدارلامالارىنا 200 تولىق گرانت بولىنەدى. بۇل الدىڭعى جىلدارمەن سالىستىرعاندا شامامەن ەكى ەسە كوپ. قوسىمشا قارجىلاندىرۋدى ۋنيۆەرسيتەتتىڭ ءوزى جانە NU Impact Foundation الەۋمەتتىك دامۋ قورى قامتاماسىز ەتەدى.
ۋنيۆەرسيتەت پرەزيدەنتى, پروفەسسور ۆاكار احمادتىڭ ايتۋىنشا, NU دوكتورانتۋرا تۇلەكتەرىن ساپالى دايارلاۋىمەن حالىقارالىق دەڭگەيدە بەدەل جيناعان.
«بىزدە الەمدىك دەڭگەيدەگى پروفەسسورلىق-وقىتۋشىلار قۇرامى مەن زاماناۋي زەرتتەۋ ينفراقۇرىلىمى بار. وسى مۇمكىندىكتەر تالانتتى ءارى تالاپتى جاستاردىڭ اكادەميالىق الەۋەتىن تولىق اشۋىنا جول اشادى. PhD گرانتتارىنىڭ ەكى ەسە ارتۋى – ەلىمىز بەن ءوڭىر ءۇشىن وزەكتى عىلىمي ماسەلەلەردى شەشۋگە باعىتتالعان زەرتتەۋلەردى دامىتۋعا دەگەن بەرىك ۇستانىمىمىزدىڭ كورىنىسى», دەدى ول.
قوسىمشا گرانتتار دوكتورانتۋرانىڭ بارلىق باعىتتارىنا بولىنەدى. اسىرەسە فيزيكا, كومپيۋتەرلىك عىلىمدار, ينجەنەريا جانە مەديتسينا سالالارىنا باسىمدىق بەرىلەدى.
دوكتور لۋيس ر. روحاس-سولورسانو ۋنيۆەرسيتەتتىڭ الداعى ماقساتىن دا اتاپ ءوتتى.
ء«بىز NU قابىرعاسىندا 1000-نان استام دوكتورانت پەن كاسىبي دوكتورلىق باعدارلامالار تىڭداۋشىلارى ءبىلىم العانىن قالايمىز. سول ءۇشىن الداعى جىلدارى دوكتورانتۋراعا قابىلداۋدى ۇلعايتىپ, جاڭا اكادەميالىق قۇرىلىم – دوكتورانتۋرا ينستيتۋتىن قۇرۋدى جوسپارلاپ وتىرمىز», دەدى ول.
ايتا كەتەيىك, Nazarbayev University جاس ۋنيۆەرسيتەتتەردىڭ جاھاندىق رەيتينگىندە 106-ورىندا تۇر. سونىمەن قاتار Times Higher Education بەدەلدى حالىقارالىق رەيتينگى بويىنشا ورتالىق ازيا مەن كاۆكاز ايماعىنداعى №1 عىلىمي-زەرتتەۋ ۋنيۆەرسيتەتى اتانىپ, الەمدەگى ۇزدىك جوعارى وقۋ ورىندارىنىڭ توپ 23 پايىزىنا ەنگەن.
