فوتو: اشىق دەرەككوز
قازىرگى ۋاقىتتا ۇكىمەت قاراۋىندا جاتقان تۇجىرىمداما ءۇش نەگىزگى باعىت بويىنشا ىسكە اسىرىلماق:
1.كوشى-قوندى تسيفرلىق باقىلاۋ
جاڭا جۇيەنىڭ وزەگى – Migration.enbek.kz پلاتفورماسى بولماق. بۇل بىرىڭعاي تسيفرلىق جۇيە ەڭبەك, ىشكى ىستەر, سىرتقى ىستەر, عىلىم جانە جوعارى ءبىلىم مينيسترلىكتەرىنىڭ دەرەكتەرىن بىرىكتىرەدى. بۇل ينتەگراتسيا ميگرانتتاردىڭ كەلۋىنەن باستاپ, ولاردىڭ جۇمىسقا ورنالاسۋى مەن الەۋمەتتىك جاعدايىنا دەيىنگى پروتسەستەردى تولىق باقىلاۋعا, سونداي-اق الداعى ۇردىستەردى ءدال بولجاۋعا مۇمكىندىك بەرەدى.
«بۇدان باسقا, enbek.kz جۇيەسىن ۇلتتىق ءبىلىم بەرۋ بازاسىمەن جانە باسقا دا اقپاراتتىق رەسۋرستارمەن ينتەگراتسيالاۋ جوسپارلانۋدا, بۇل تۇلەكتەردىڭ, قونىس اۋدارۋشىلاردىڭ جانە مەملەكەتتىك باعدارلامالارعا قاتىسۋشىلاردىڭ جۇمىسقا ورنالاسۋى تۋرالى مونيتورينگتى قامتاماسىز ەتەدى», دەلىنگەن حابارلامادا.
2. ىشكى كوشى-قون جانە وڭىرلىك تەپە-تەڭدىك
تۇجىرىمداما وڭىرلەر اراسىنداعى ەڭبەك رەسۋرستارىنىڭ تەڭسىزدىگىن جويۋدى كوزدەيدى. ول ءۇشىن:
- ەلىمىزدىڭ سولتۇستىك, شىعىس جانە ورتالىق وبلىستارىنا قونىس اۋدارۋ ءۇشىن ارنايى وڭىرلىك كۆوتالار بولىنەدى.
- قونىس اۋدارۋشىلار مەن قانداستار ءۇشىن جەڭىلدىكپەن كرەديت بەرۋ, كووپەراتسيانى دامىتۋ جانە شاعىن بيزنەستى قولداۋ شارالارى ىسكە اسىرىلادى.
«وسى باعىتتى ىسكە اسىرۋ ەڭبەك رەسۋرستارىن وڭتايلى قايتا بولۋگە, جۇمىسپەن قامتۋ دەڭگەيىن ارتتىرۋعا جانە وڭىرلەردىڭ دەموگرافيالىق الەۋەتىن نىعايتۋعا ىقپال ەتەتىن بولادى», دەلىنگەن حابارلامادا.
3. سىرتقى كوشى-قون جانە وتانداستاردى قولداۋ
سىرتقى ساياساتتا شەتەلدە جۇرگەن قازاقستان ازاماتتارىنىڭ قۇقىقتارىن قورعاۋعا باسىمدىق بەرىلەدى. وسى ماقساتتا ەۋروپا مەن ازيا ەلدەرىمەن ەكىجاقتى كەلىسىمدەر جاساسۋ جانە شەتەلدەگى ەڭبەك ميگرانتتارىن مونيتورينگتەۋ پلاتفورماسىن قۇرۋ جوسپارلانعان.
سونىمەن قاتار, بىلىكتى شەتەلدىك ماماندار مەن ستۋدەنتتەردى تارتۋ, سونداي-اق تاريحي وتانىنا ورالعان قانداستاردى بەيىمدەۋدىڭ بىرىڭعاي ستاندارتى ازىرلەنىپ, «اتا جولى» كارتاسى جەتىلدىرىلەدى.
مينيسترلىك تۇجىرىمدامانى ىسكە اسىرۋ ءۇشىن 73 ءىس-شارا مەن 14 نىسانالى ينديكاتوردان تۇراتىن ءىس-قيمىل جوسپارىن دايىندادى. ايتا كەتەرلىگى, قۇجاتتى قابىلداۋ مەملەكەتتىك بيۋدجەتتەن قوسىمشا قاراجاتتى تالاپ ەتپەيدى.
