فوتو: اشىق دەرەككوز
ءماجىلىس كۋلۋارىندا سويلەگەن سانجار ءادىلوۆتىڭ ايتۋىنشا, قازىرگى ۋاقىتتا «ساپاسىز قۇرىلىس» جانە «ومىرگە قاۋىپ توندىرەتىن قىزمەت كورسەتۋ» باپتارى بويىنشا ءىس قوزعالعان.
«قازىرگى ۋاقىتتا ادىلەت مينيسترلىگىنىڭ ماماندارى بىرنەشە سوت ساراپتاماسىن جۇرگىزىپ جاتىر. سونىمەن قاتار, استانا اكىمدىگى مەن بەيىندى مينيسترلىك بىرلەسىپ ارنايى زەرتتەۋ جۇرگىزۋدە. ءبىز بۇل تەكسەرۋلەردىڭ قورىتىندىسىن جاقىن كۇندەرى كۇتىپ وتىرمىز», دەدى ول.
سونىمەن قاتار ءىىم وكىلى وقيعا ورنىنا كەلگەن قۇتقارۋشىلاردىڭ ارەكەتىنە قاتىستى ساۋالعا جاۋاپ بەردى. ونىڭ سوزىنشە, قۇتقارۋشىلار بەكىتىلگەن نورماتيۆتىك-قۇقىقتىق اكتىلەر مەن بۇيرىقتارعا ساي ارەكەت ەتكەندىكتەن, ولاردىڭ جۇمىسىنا قۇقىقتىق باعا بەرىلمەيدى.
8 قاراشادا استاناداعى تاۋەلسىزدىك داڭعىلى, 24B مەكەنجايىنداعى توعىز قاباتتى عيماراتتىڭ قاسبەتىنەن كىرپىش جابىنى قۇلادى. سالدارىنان بەس ادام جاراقات الىپ, №1 جالپى اۋرۋحاناعا جەتكىزىلگەن. 18 قاراشادا جاراقات العان فەلدشەر ۇلدانا مىرزۋان كوز جۇمدى. سول كۇنى, 18 قاراشادا, قاسىم-جومارت توقاەۆ ۇلدانا مىرزۋاندى «ەرلىگى ءۇشىن» مەدالىمەن ناگرادتادى.
بۇل ءىس مينيسترلىكتىڭ تىكەلەي باقىلاۋىندا.
