«قازگيدرومەت» رمك فيليالىنىڭ مالىمەتىنە سايكەس, 14 جەلتوقساندا وڭىردە كوكتايعاق, بۇرقاسىن, قاتتى قار, تۇمان بايقالادى, سونداي-اق وبلىستىڭ باتىسى مەن سولتۇستىگىندە جاڭبىر مەن قار تۇرىندەگى جاۋىن-شاشىن ءتۇسىپ جاتىر.
جەلدىڭ ەكپىنى سەكۋندىنا 15–20, كەي جەرلەردە 23–28 مەترگە دەيىن جەتەدى. وسىعان بايلانىستى اۆتوجولداردا كوكتايعاق پايدا بولىپ, بۇرقاسىن سالدارىنان جولداردىڭ جەكەلەگەن ۋچاسكەلەرى جابىلدى.
قولايسىز اۋا رايىنا بايلانىستى 14 جەلتوقساندا كەلەسى اۆتوجول ۋچاسكەلەرى جابىق:
– ورال – اتىراۋ تاس جولى;
– ۇلكەن شاعان – پەرەمەتنىي تاس جولى.
جابىلۋ سەبەبى – بۇرقاسىن.
ساعات 11.30-داعى مالىمەت بويىنشا قولايسىز اۋا رايىنا بايلانىستى وبلىستا بىرقاتار رەسپۋبليكالىق ماڭىزى بار اۆتوجول ۋچاسكەسىندە (كازتالوۆ – جانىبەك, ونەگە – سايقىن, ورال – رف شەكاراسى, بقو – اتىراۋ وبلىسى شەكاراسى, چاپاەۆ – قازتالوۆ) بارلىق كولىك ءتۇرى ءۇشىن قوزعالىسقا ۋاقىتشا شەكتەۋ ەنگىزىلدى.
بقو اكىمدىگىنەن تۇسكەن مالىمەتكە قاراعاندا, سونىمەن قاتار اۋا رايىنىڭ كۇرت ناشارلاۋىنا بايلانىستى وبلىستىڭ بىرقاتار اۋدانىندا ەلەكتر ەنەرگياسىنىڭ ۋاقىتشا ءوشۋى تىركەلدى. قازىرگى ۋاقىتتا ەنەرگەتيكا سالاسىنىڭ قىزمەتتەرى كۇشەيتىلگەن رەجيمدە جۇمىس ىستەپ, ەلەكتر جەلىلەرىن قالپىنا كەلتىرۋ شارالارىن جۇرگىزىپ جاتىر.
– وسىعان بايلانىستى باتىس قازاقستان وبلىسىنىڭ اكىمى ناريمان تورەعاليەۆ ەنەرگەتيكا سالاسىنا جاۋاپتى ورگانداردىڭ قاتىسۋىمەن جينالىس وتكىزىپ, احۋالدى جەكە باقىلاۋىنا الدى. وبلىس اكىمى وڭىرلىك ەلەكتر جەلىلەرى ۇيىمدارىنا, توتەنشە جاعدايلار قىزمەتتەرىنە جانە جەرگىلىكتى اتقارۋشى ورگاندارعا ەلەكترمەن جابدىقتاۋدى قالپىنا كەلتىرۋ جۇمىستارىن جەدەلدەتۋ جونىندە ناقتى تاپسىرمالار بەردى. تۇرعىندار توتەنشە جاعدايلار تۋىنداعان جاعدايدا «112» بىرىڭعاي بايلانىس نومىرىنە حابارلاسا الادى, - دەلىنگەن رەسمي مالىمەتتە.
تۇرعىنداردىڭ سوزىنە قاراعاندا, كازتالوۆ, جانىبەك جانە بوكەي ورداسى اۋداندارىندا جارىق وشكەن. بورانعا بايلانىستى جولدا قالعان كولىكتەر بار.
