– قازاقستان رەسپۋبليكاسىنىڭ اۋماعىنان ءۇشىنشى ەلدەرگە جانە ەۋرازيالىق ەكونوميكالىق وداق ەلدەرىنە 13 (ون ءۇش) مىڭ توننا كولەمىندە اكەتۋگە ساندىق شەكتەۋلەر (كۆوتالار) ەنگىزۋ ماقۇلداندى. 2025 جىلعى 3 جەلتوقساننان باستاپ 2025 جىلعى 31 جەلتوقسانعا دەيىن ءىرى قارا مال ەتىن اكەتۋگە ساندىق شەكتەۋلەر (كۆوتالار) ەنگىزۋ تۋرالى بۇيرىق قابىلداندى. بۇيرىق 2025 جىلعى 3 جەلتوقساندا كۇشىنە ەندى. بۇيرىقتى قابىلداۋداعى ماقسات ەلدىڭ ازىق-ت ۇلىك قاۋىپسىزدىگىن قامتاماسىز ەتۋ, مال شارۋاشىلىعى ونىمدەرىن وڭدەۋدى دامىتۋ, ىشكى نارىقتا ەتكە تاپشىلىقتى بولدىرماۋ, سونداي-اق سيىر ەتىنە باعانى تۇراقتاندىرۋ ءۇشىن قابىلداندى. ەنگىزىلگەن ءتاسىل وليگوپوليانى قالىپتاستىرۋعا نەمەسە باسەكەلەستىكتى شەكتەۋگە باعىتتالماعانىن اتاپ وتكەن ءجون, – دەپ جازىلعان جاۋاپتا.
ونىڭ سوزىنشە, بۇل كۆوتا سيىر ەتىن ءوندىرۋدىڭ وركەنيەتتى, اشىق جانە جاۋاپتى جۇيەسىن قۇرۋعا كومەكتەسەدى.
– بۇل ءتاسىل ۇساق مال سويۋ تسەحتارىنىڭ مالدى كورشى ەلدەرگە قايتا ساتۋ مۇمكىندىگىن جوققا شىعارادى (مال ساتىپ العان كومپانيالار جۇمىس ىستەدى, سودان كەيىن بورداقىلاۋسىز, ەتتى وزبەكستانعا ەكسپورتتادى). مۇنداي تاجىريبە بۇرمالانۋعا اكەلىپ سوقتىردى جانە سيىر ەتىنىڭ ىشكى باعاسىنىڭ ءوسۋ فاكتورلارىنىڭ بىرىنە اينالدى. وسىلايشا, كۆوتالاۋدى ەنگىزۋ مال وسىرۋمەن جانە بورداقىلاۋمەن اينالىسپايتىن, تەك جانۋارلاردى قايتا ساتاتىن ەكسپورتتاۋشى دەلدالداردى جويۋعا باعىتتالعان. ولاردىڭ قىزمەتى سيىر ەتىنىڭ نەگىزسىز قىمباتتاۋىنا اكەلەدى جانە سالانىڭ دامۋىنا ىقپال ەتپەيدى, – دەيدى مينيستر.
جاۋاپتا قابىلدانعان شارا ەۋرازيالىق ەكونوميكالىق وداق تۋرالى شارتتىڭ 29 جانە 47-باپتارىنا سايكەس كەلەتىنى, قازاقستاننىڭ حالىقارالىق مىندەتتەمەلەرىنە قايشى كەلمەيتىنى ايتىلعان.
