قالا اكىمى ەرنات ءبازىل قالانىڭ الداعى دامۋ جوسپارىمەن تانىستىرىپ, جىل ىشىندە اتقارىلعان جۇمىستارعا توقتالدى. ونىڭ ايتۋىنشا, بيىل وبلىس ورتالىعىندا بىرنەشە وندىرىستىك نىسان ىسكە قوسىلدى. 200-گە جۋىق تۇرعىن ءۇي پايدالانۋعا بەرىلىپ, جاڭا تۇرعىن ءۇي اۋماعى قالىپتاستى.
سونىمەن قاتار ۇزاق ۋاقىت نازاردان تىس قالعان بۇرىنعى اسكەري قالاشىقتاعى الەۋمەتتىك ماسەلەلەر كەزەڭ-كەزەڭىمەن شەشىلە باستادى.
بيىل «ۇلان» شاعىن اۋدانىندا 20 كوپقاباتتى ءۇيدىڭ قاسبەتى جوندەلىپ, بالكوندارى جاڭارتىلدى. اۋلالارعا زاماناۋي ويىن الاڭدارى ورناتىلدى.
قالا تۇرعىنى گۇلنۇر توقتابەكوۆانىڭ ايتۋىنشا, ءۇش جىل بۇرىن بۇل اۋماقتا ينفراقۇرىلىم بولماعان. قازىر تۇرعىندار ءۇشىن بارلىق جاعداي جاسالىپ, اسكەري قالاشىقتىڭ كەلبەتى ايتارلىقتاي وزگەرگەن.
سونىمەن قاتار تالدىقورعاندا گازبەتون, كەراميكا جانە ەلەكتر جابدىقتارىن شىعاراتىن زاۋىتتار, سونداي-اق كونديتەرلىك ءونىم وندىرەتىن تسەح اشىلدى. اككۋمۋلياتور زاۋىتىندا جاڭا وندىرىستىك جەلى ىسكە قوسىلدى.
زاۋىتتىڭ وندىرىستىك ديرەكتورى تالعات قوناقباەۆ كاسىپورىندا تەلەكوممۋنيكاتسيا, مەديتسينالىق مەكەمەلەر, جەل ەلەكتر ستانتسيالارى مەن ءىرى ءوندىرىس ورىندارىنا ارنالعان اككۋمۋلياتور باتارەيالارى شىعارىلاتىنىن ايتتى. ءوندىرىس تولىق جاڭارتىلىپ, تسيفرلاندىرۋ جۇيەسى ەنگىزىلگەن.
قالادا ەسكىرگەن ينجەنەرلىك جەلىلەر جاڭارتىلىپ جاتىر. بيىل جۇزدەن استام كوشەگە اسفالت توسەلىپ, «جاستار-3» اتتى جاڭا شاعىن اۋدان سالىندى.
قالا اكىمىنىڭ مالىمەتىنشە, بارلىعى 790 تۇرعىن ءۇي سالۋ جوسپارلانعان. وتكەن جىلى 56 ءۇي پايدالانۋعا بەرىلسە, بيىل 206 ءۇيدىڭ قۇرىلىسى تولىق اياقتالىپ, «وتباسى بانك» ارقىلى تۇرعىندارعا ۇسىنىلادى. سونداي-اق 9-ىقشام اۋداندا ەكى ءىرى تۇرعىن ءۇيدىڭ قۇرىلىسى تامامدالۋعا جاقىن.
الداعى جىلى «باتىس» جانە «قۇلاگەر» شاعىن اۋداندارىندا مەكتەپتەر سالىنىپ, جاڭا تۇرعىن ءۇي ايماقتارىنىڭ نەگىزى قالانباق.
قالا باسشىسى 11, 12 جانە 13-ىقشام اۋدانداردا ينجەنەرلىك ينفراقۇرىلىم جۇمىستارى باستالعانىن ايتىپ, ولار كەلەسى جىلى اياقتالاتىنىن جەتكىزدى. سونىمەن قاتار رەسپۋبليكالىق بيۋدجەت ەسەبىنەن ءورت ءسوندىرۋ دەپوسى, جاڭا تۇرعىن ۇيلەر مەن ءىرى قازاندىق سالۋ جوسپارلانعان. بۇل اۋماقتىڭ دامۋى الداعى ەكى-ءۇش جىلعا باعىتتالعان.
2027 جىلدان باستاپ قاراتال وزەنىنىڭ وڭ جاعالاۋىن دامىتۋ جۇمىستارى قولعا الىنادى. وندا تۇرعىن ۇيلەرمەن قاتار مەديتسينالىق جانە الەۋمەتتىك نىساندار سالۋ كوزدەلىپ وتىر.
