زاماناۋي مەكتەپ 1 200 وقۋشىعا ارنالعان. جالپى اۋماعى 13 مىڭ شارشى مەتردەن اساتىن ءبىلىم ورداسىندا 61 ءپان كابينەتى بار. ولاردىڭ قاتارىندا ديزاين جانە تەحنولوگيا, تاماقتانۋ مادەنيەتى, ۆيزۋالدى ونەر, ءۇي مادەنيەتى, روبوتوتەحنيكا, STEM جانە مۋزىكا كابينەتتەرى قامتىلعان. مەكتەپ قاجەتتى قۇرال-جابدىقتارمەن تولىق قامتاماسىز ەتىلىپ, وقۋشىلاردىڭ شىعارماشىلىق جانە زياتكەرلىك قابىلەتتەرىن دامىتۋعا بارلىق مۇمكىندىك جاسالعان.
سالتاناتتى ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي قاتىسىپ, ۇستازدار مەن وقۋشىلاردى جاڭا وقۋ ورداسىنىڭ اشىلۋىمەن قۇتتىقتادى.
- مەملەكەت باسشىسىنىڭ تاپسىرماسىنا سايكەس وڭىرىمىزدە جاڭا ۇلگىدەگى زاماناۋي مەكتەپتەر بوي كوتەرىپ جاتىر. بۇل – بالالاردىڭ ساپالى ءبىلىم الۋىنا, كاسىبي باعدارىن ەرتە ايقىنداۋعا مۇمكىندىك بەرەدى. وسىنداي يگى باستامالار ارقىلى جاڭاوزەن قالاسى مەن اۋىلدار اراسىنداعى ءبىلىم ساپاسىنىڭ تەڭدىگىن قامتاماسىز ەتۋگە جول اشىلادى, - دەدى ايماق باسشىسى.
مەكتەپ ەرەكشە ءبىلىمدى قاجەت ەتەتىن بالالار ءۇشىن دە قولايلى جاعدايمەن قامتىلعان. سەنسورلىق بولمە مەن ينكليۋزيۆتى ءبىلىم بەرۋدى قولداۋ كابينەتى جۇمىس ىستەيدى, مۇمكىندىگى شەكتەۋلى بالالار ءۇشىن ارنايى جەدەلساتى ورناتىلعان.
وقۋشىلاردىڭ قاۋىپسىزدىگى باستى نازاردا, عيماراتتا 126 بەينەكامەرا ورناتىلىپ, اۋلاسىندا بالالارعا ارنالعان ويىن جانە سپورت الاڭدارى سالىنعان.
ايتا كەتەيىك, بۇعان دەيىن وڭىردە «كەلەشەك مەكتەپتەرى» جوباسى اياسىندا 10 مىڭنان استام وقۋشىعا ارنالعان 11 مەكتەپ اشىلعان بولاتىن. جىلدىڭ سوڭىنا دەيىن اقتاۋ قالاسىندا تاعى ءبىر مەكتەپتى پايدالانۋعا بەرۋ جوسپارلانىپ وتىر.
