جاڭا جولدىڭ اشىلۋ راسىمىنە وبلىس اكىمى ناريمان تورەعاليەۆ, «قازاۆتوجول» ۇك» اق باسقارما توراعاسى دارحان يماناشەۆ جانە كومپانيا قىزمەتكەرلەرى, مەردىگەر ۇيىم وكىلدەرى مەن جەرگىلىكتى تۇرعىندار قاتىستى.
«مەملەكەت باسشىسى ەلىمىزدىڭ كولىك-لوگيستيكا سالاسىن جاڭعىرتۋدى ايرىقشا تاپسىرىپ, بۇل باعىت ۇلتتىق ەكونوميكانى كۇشەيتۋدىڭ نەگىزگى تەتىكتەرىنىڭ ءبىرى ەكەنىن ۇنەمى ايتىپ وتىرادى. بۇگىن ىسكە قوسىلىپ وتىرعان ەكى دەڭگەيلى جولايرىعى – جول قوزعالىسىن قاۋىپسىز ءارى ۇزدىكسىز قامتاماسىز ەتۋگە ارنالعان زاماناۋي ينجەنەرلىك شەشىم. جاڭا جول تورابى كولىك اعىنىن رەتتەپ, قوزعالىستى ايتارلىقتاي جەڭىلدەتەدى. بۇل – وبلىستىڭ وزگە وڭىرلەرمەن جانە رەسەي فەدەراتسياسىمەن كولىك بايلانىسىن جاقسارتىپ, ەكونوميكالىق ىقپالداستىقتى تەرەڭدەتۋگە زور سەرپىن بەرەتىن ماڭىزدى قادام», دەدى ءوڭىر باسشىسى ناريمان تورەعاليەۆ.
«قازاۆتوجول» ۇلتتىق كومپانياسىنىڭ باسقارما توراعاسى دارحان يماناشەۆ تا اتقارىلعان جۇمىستىڭ ماڭىزىن اتاپ ءوتتى:
«بۇگىن اشىلعان ۋچاسكەلەر ءوڭىردىڭ كولىك قولجەتىمدىلىگىن تۇبەگەيلى وزگەرتەدى. ءاربىر جاڭا شاقىرىم – ەكونوميكانىڭ, شاعىن جانە ورتا بيزنەستىڭ, ءتۋريزمنىڭ دامۋىنا, حالىقتىڭ ءومىر ساپاسىنىڭ ارتۋىنا اشىلعان جاڭا مۇمكىندىك. سونىمەن بىرگە ءبىز بيىل قايتا جاڭعىرتۋ جۇمىستارى باستالعان «سىرىم» وتكىزۋ پۋنكتىن تولىقتاي جاڭارتىپ, ونى حالىقارالىق دەڭگەيدەگى زاماناۋي لوگيستيكالىق ورتالىققا اينالدىرۋدى باستادى», دەدى ول.
بۇل جول – «پودستەپنوە-فەدوروۆكا-رەسەي فەدەراتسياسى شەكاراسى» باعىتىندا جۇرگىزىلىپ جاتقان ءىرى قايتا جاڭعىرتۋ جۇمىسىنىڭ ماڭىزدى بولىگى. جوبانىڭ جالپى ۇزىندىعى – 144 شاقىرىم بولسا, بۇگىنگى تاڭدا 72 شاقىرىم جول تولىق جوندەلىپ, كولىك قوزعالىسى اشىلدى. بۇل جۇمىستى «قازاۆتوجول» اق جۇزەگە اسىردى.
قالعان 72 شاقىرىمدا قايتا جاڭعىرتۋ جۇمىسى كپو b.v. كومپانياسىنىڭ قولداۋىمەن جۇرگىزىلىپ جاتىر. جوبا 2026 جىلى تولىق اياقتالادى.
2025 جىلى باتىس قازاقستان وبلىسىندا رەسپۋبليكالىق ماڭىزى بار اۆتوموبيل جولدارىنىڭ 260 شاقىرىمى جوندەلىپ, تولىق اياقتالدى. ونىڭ ىشىندە «پودستەپنوە – فەدوروۆكا» اۆتوجولىنىڭ 72 شاقىرىمىن قايتا جاڭارتۋ, «ونەگە – بيسەن – سايقىن» باعىتىنىڭ 103 شاقىرىمىن كۇردەلى جوندەۋ, سونداي-اق حان ورداسى اۋىلىنا كىرەبەرىس جولىنىڭ 21 شاقىرىمى مەن اقتوبە – ورال اۆتوجولىنىڭ 64 شاقىرىمدىق جولعا ورتاشا جوندەۋ جۇمىستارى بار.
