فورۋمعا مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباي, عىلىم جانە جوعارى ءبىلىم ءمينيسترى ساياسات نۇربەك, وقۋ-اعارتۋ ءمينيسترى جۇلدىز سۇلەيمەنوۆا, MNU باسقارما توراعاسى تالعات نارىكباەۆ جانە ەلىمىزدىڭ جەتەكشى جوعارى وقۋ ورىندارىنىڭ رەكتورلارى قاتىستى. سونداي-اق جيىنعا ورتا ءبىلىم بەرۋ ۇيىمدارىنىڭ وكىلدەرى, ساراپشىلار قاۋىمداستىعى مەن مەملەكەتتىك ورگانداردان كەلگەن 300-دەن اسا ادام جينالدى. ءبىلىم بەرۋدەگى اكادەميالىق ادالدىقتى قامتاماسىز ەتۋ تاقىرىبىندا قىزۋ تالقىلاۋلار ءوتتى.
2021 جىلى مەملەكەت باسشىسى ۇكىمەتتىڭ كەڭەيتىلگەن وتىرىسىندا جوعارى وقۋ ورىندارىندا اكادەميالىق ادالدىقتى بۇزۋ دەرەكتەرى تىركەلىپ, جەمقورلىققا جول بەرىلگەن جاعدايدا ولاردى ليتسەنزيادان ايىرۋ سەكىلدى قاتاڭ جاۋاپكەرشىلىك ەنگىزۋدى تاپسىرعان ەدى. مەملەكەتتىك قىزمەت ىستەرى اگەنتتىگىنىڭ توراعاسى د.جازىقبايدىڭ ايتۋىنشا, بۇگىندە 103 جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمىنداعى 4 191 باكالاۆريات ءبىلىم بەرۋ باعدارلاماسىنا ادالدىق, جەمقورلىققا قارسى مادەنيەت, قۇقىقتىق ساۋات جانە كاسىبي ەتيكاعا ارنالعان پاندەر ەنگىزىلگەن.
«7 جوعارى وقۋ ورنىندا كومپلاەنس-مامانداردى دايارلاۋ باستالدى. ال 52 مىڭنان اسا مەملەكەتتىك قىزمەتشى ادەپ جانە ادالدىق قۇندىلىقتارىن ورنىقتىرۋ بويىنشا ونلاين وقىتۋدان ءوتتى. «قۇقىق» باعىتى بويىنشا 63 باعدارلامادا جەمقورلىق قۇقىقبۇزۋشىلىقتاردى سارالاۋ, حالىقارالىق ستاندارتتار, تاۋەكەلدەردى باعالاۋ, كادرلىق قاۋىپسىزدىك جانە قۇقىق قولدانۋ ماسەلەلەرىن قامتيتىن كەشەندى كۋرستار بار. ماگيستراتۋرا مەن دوكتورانتۋرا دەڭگەيلەرىندە دە بۇل باعىت كەڭىنەن دامۋدا. ماسەلەن, 250-دەن اسا ءبىلىم بەرۋ باعدارلاماسى جەمقورلىققا قارسى ساياساتتى, كومپلاەنس, كريمينولوگيانى جانە ادەپ ستاندارتتارىن جۇيەلى وقىتۋعا باعىتتالعان», دەدى اگەنتتىك توراعاسى.
سونداي-اق عىلىم جانە جوعارى ءبىلىم ءمينيسترى س.نۇربەك الدىمەن پروفەسسورلىق-پەداگوگيكالىق قۇرامعا تۇسىندىرمە جۇمىستارىن جۇرگىزۋ قاجەتتىگىن ايتتى. وسى ورايدا ايتا كەتەتىن تاعى ءبىر ماسەلە, جۋىردا مينيستر كوپتەگەن ازامات الەۋمەتتىك جەلىلەردەگى جەكە حابارلامالار ارقىلى ديپلومداردىڭ تۇپنۇسقالىعى ماسەلەسىنە قاتىستى الاڭداۋشىلىق بىلدىرەتىنىن ايتىپ, Telegram ارناسىندا بۇل ماسەلە جۇيەلى تۇردە تولىق رەتتەلگەنىن رەسمي حابارلادى. عىلىم جانە جوعارى ءبىلىم مينيسترلىگى 1991 جىلدان بەرى بەرىلگەن بارلىق ديپلومنىڭ بىرىڭعاي دەرەكتەر بازاسىن قالىپتاستىرعان. بۇل – زاڭسىز قۇجات اينالىمىنىڭ الدىن الۋعا باعىتتالعان ماڭىزدى قادام.
«ديپلومداردىڭ مازمۇنىنا قويىلاتىن بىرىڭعاي تالاپتار مەن ولاردىڭ سەريالارى بەكىتىلدى. ال قۇجاتتاردىڭ ءوزى ەندى ارنايى قورعالعان مودۋل ارقىلى بىرەگەي ءنومىر مەن QR-كود بەرۋ جولىمەن راسىمدەلەدى. جۇيەگە تەك جوعارى وقۋ ورىندارىنىڭ رەسمي جاۋاپتى قىزمەتكەرلەرى قول جەتكىزە الادى. بۇل ديپلومدى قولدان جاساۋعا جول بەرىلمەيدى, جۇمىس بەرۋشى قۇجاتتىڭ تۇپنۇسقالىعىن وڭاي تەكسەرە الادى, ادال ەڭبەك ەتكەن تۇلەكتەردىڭ ەڭبەگى ناقتى قورعالاتىنىن بىلدىرەدى», دەدى مينيستر.
بۇل دا – اكادەميالىق اشىقتىقتىڭ ءبىر كورىنىسى. ال قازىر 22 جوو-عا ەنگەن اكادەميالىق ادالدىق ليگاسىن 2018 جىلى M.Narikbayev University مەن Almaty Management University قۇرعان. MNU باسقارما توراعاسى ت.نارىكباەۆتىڭ ايتۋىنشا, بۇل – ەلىمىزدەگى جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ ەرىكتى بىرلەستىگى. ليگا اكادەميالىق ادالدىقتىڭ 10 نەگىزگى قاعيداسىن ىلگەرىلەتۋ مەن ىسكە اسىرۋ ارقىلى ەلدەگى ءبىلىم بەرۋ ساپاسىن جاقسارتۋ ميسسياسىن اتقارادى. ليگا كەڭەسى ادالدىق ستاندارتىن ازىرلەۋمەن اينالىسادى.
اكادەميالىق ادالدىق ليگاسىنا العاش كىرگەن وقۋ ورنىنىڭ ءبىرى – س.وتەباەۆ اتىنداعى اتىراۋ مۇناي جانە گاز ۋنيۆەرسيتەتى. ۋنيۆەرسيتەت رەكتورى گۇلزادا شاكۋليكوۆانىڭ ايتۋىنشا, ليگا ارقىلى قۇرىلعان مەتودولوگيا, ءبىلىم بەرۋدى باعالاۋعا باعىتتالعان ستاندارتتار قازىر جاقسى ناتيجە بەرىپ جاتىر.
ءىس-شارا بارىسىندا مەملەكەتتىك قىزمەت ىستەرى اگەنتتىگى, عىلىم جانە جوعارى ءبىلىم, وقۋ-اعارتۋ مينيسترلىكتەرى جانە اكادەميالىق ادالدىق ليگاسى اراسىندا ءبىلىم بەرۋدە اكادەميالىق ادالدىقتى قامتاماسىز ەتۋ جونىندەگى مەموراندۋمعا قول قويىلدى. سونىمەن قاتار مەموراندۋمدى ىسكە اسىرۋدىڭ 2026–2027 جىلدارعا ارنالعان جول كارتاسى بەكىتىلدى.
