وڭىرلەردى وڭتايلاندىرۋ كەزىندە سەمەي شىعىس قازاقستان وبلىسىنا قوسىلىپ, ارادا شيرەك عاسىر وتكەندە ۇلى اباي ەسىمىمەن قايتا قۇرىلعانعا دەيىن بۇل سالا توقىراپ, ستاديوندار قاڭىراپ بوس قالدى. مەملەكەت باسشىسى قاسىم-جومارت توقاەۆتىڭ اباي وبلىسىن قۇرۋ تۋرالى شەشىمىنەن كەيىن وبلىسپەن قاتار «ەلىماي» كومانداسى دا ەڭسەسىن تىكتەي باستادى.
وتكەن عاسىردىڭ 90-جىلدارىنداعى «ەلىماي» كومانداسى ەلىمىزدىڭ كəسىبي فۋتبولىندا بىرقاتار رەكورد ورناتتى. سول ۋاقىتتا سەمەيلىك فۋتبولشىلار ەلىمىزدىڭ ءۇش دۇركىن چەمپيونى اتاندى (1994, 1995, 1998). ءبىر ماۋسىمدا ءبىرىنشى بولىپ (1995) ۇلتتىق بىرىنشىلىكتىڭ التىنىن, سونداي-اق قازاقستان كۋبوگى مەن سۋپەركۋبوگىن يەلەندى. بۇگىندە «ەلىماي» ەل بىرىنشىلىگىنىڭ ۇزدىكتەرى قاتارىندا. سۇيىكتى كومانداسىنا دەگەن حالىقتىڭ ىقىلاسى دا ەرەكشە. بيىلعى ءدۇبىرلى دودالاردا ورتالىق ستاديون جانكۇيەرلەرگە لىق تولدى. ءتىپتى سىيماي, اۋزى-مۇرنىنان شىعىپ قالعان ساتتەر كوپ بولدى. بۇگىندە سەمەيلىكتەرگە ءəربىر ماتچ ۇلكەن مەرەكەگە اينالادى. ەڭبەكتەگەن بالادان ەڭكەيگەن قارياعا دەيىن ايتۋلى فۋتبول ويىنىن كۇتىپ, كاسسالاردا ۇزىن-سونار كەزەك تۋدىرادى. سوندىقتان دا بۇل جاڭالىقتى ەستىگەن سەمەيلىكتەردىڭ بوركى اسپاندا قالىقتاپ ءجۇر ءالى.
پرەزيدەنتتىڭ قولداۋىمەن باستالعان «ابايعا قۇرمەت» اكتسياسى اياسىندا ەلىمىزدىڭ بىرنەشە ءوڭىرى سەمەي قالاسىنا ءبىر نىساننان سالىپ بەرۋگە ءوز ۇسىنىستارىن بەردى. ماڭعىستاۋ وبلىسى دوستىق ءۇيىنىڭ ىرگەتاسىن قالادى. شىمكەنت قالاسى شىعارماشىلىق ورتالىعى مەن مادەنيەت ءۇيىن, تۇركىستان وبلىسى كورمە ورتالىعىن, استانا قالاسى «كەلەشەك مەكتەبىن», اقتوبە وبلىسى جەكپە-جەك ورتالىعىن, پاۆلودار وبلىسى ۇستەل تەننيسى ورتالىعىن, سولتۇستىك قازاقستان وبلىسى رامىزدەر الاڭىن, قىزىلوردا وبلىسى «اناعا تاعزىم» ورتالىعىن, باتىس قازاقستان وبلىسى جەلىلىك ساياباق سالۋدى, شىعىس قازاقستان وبلىسى ەرتىس جاعالاۋىن اباتتاندىرۋدى جوسپارلاپ وتىر. وسىنداي يگى باستامالار اياسىندا سەمەي قالاسىندا 25 مىڭ ورىندىق ستاديوننىڭ قۇرىلىسى باستالدى.
جاقىندا وبلىس اكىمى بەرىك ءۋالي جاڭا «Smart City» شاعىن اۋدانىنا بارىپ, ستاديوننىڭ قۇرىلىس بارىسىمەن تانىستى. قاداسىن قاقتى.
«ستاديوننىڭ قۇرىلىس جۇمىسى باستالدى. وسى جۇمىستى باسەڭدەتپەي, جالعاستىرۋ قاجەت. قارجىسى كەزەڭ-كەزەڭىمەن بولىنەتىن بولادى. بۇل – سەمەيلىكتەردىڭ كوپتەن كۇتكەن جاڭالىعى. سەمەي – قازاق فۋتبولىنىڭ وتانى. قالا تۇرعىندارى فۋتبولدى جاقسى كورەدى. سول سەبەپتى دە وسىنداي ستاديون كەرەك. كوپتەن بەرى ايتىلىپ ءجۇر. نىسان ازىرگە استانا, الماتى, اقتوبەدەن كەيىنگى سىيىمدىلىعى جاعىنان قۇرىلىسى جوسپارلانعان ستاديونداردىڭ اراسىندا ءتورتىنشى ورىن الادى. ۋەفا-نىڭ ماتچتارىن قابىلداۋعا مۇمكىندىك تۋادى, ولاردىڭ ستاندارتىنا ساي كەلەدى. بۇل جاڭا شاعىن اۋداندا ءالى دە كوپتەگەن نىسان بوي كوتەرەدى. جاقىن ارادا ماڭعىستاۋلىقتار العاش بولىپ قورشاۋ قويىپ, جۇمىستارىن باستايىن دەپ وتىر. ەڭ باستىسى, ۇكىمەت تاراپىنان كەلىسىم بار. قۇجاتتار راسىمدەلگەننەن كەيىن جۇمىس باستالادى», دەدى ءوڭىر باسشىسى.
وبلىس اكىمدىگى ءباسپاسوز قىزمەتىنىڭ مالىمەتىنشە, «تۋعان جەرگە تۋىڭدى تىك» ينۆەستيتسيالىق فورۋمى اياسىندا سەمەي قالاسى اكىمدىگى مەن «KAZ Minerals» توبى اراسىندا مەموراندۋم جاسالىپ, 25 مىڭ كورەرمەنگە ارنالعان ستاديون سالۋ جوسپارلانعان. سونىمەن قاتار اتالعان كومپانيا «ەلىماي» فۋتبول كلۋبىنا جان-جاقتى دەمەۋشىلىك جاساپ كەلەدى. ستاديوننىڭ جالپى اۋماعى – 20 گەكتار. قازىرگى ۋاقىتتا 25 مىڭ ورىندىق ستاديوننىڭ قۇرىلىسىن جۇرگىزەتىن مەردىگەر ۇيىممەن ۇشجاقتى كەلىسىمشارت جاسالىپ, اۋماق قورشالىپ, جەردى قازۋ, تەگىستەۋ جۇمىسى باستالدى.
جوباعا سايكەس, اۋماقتا اسفالت جولدار مەن الاڭدار قاراستىرىلعان. ارحيتەكتۋرالىق-جوسپارلاۋ, ينجەنەرلىك-قۇرىلىمدىق شەشىمدەردى ازىرلەۋ بارىسىندا ايماقتىڭ تابيعي-كليماتتىق, گەولوگيالىق ەرەكشەلىكتەرى تولىق ەسكەرىلدى. ستاديون قۇرىلىسى ەكى جىل شاماسىندا سالىنىپ بىتەدى.
«قازىرگى قازاق فۋتبولىنا ەڭ كەرەگى – ينفراقۇرىلىم. جاڭا ستاديوندار سالىپ, بالالارعا ساپالى اكادەميالار ۇيىمداستىرىلۋى كەرەك. 30 جىلدان استام بۇل جۇمىس ءسوز كۇيىندە قالىپ كەلدى. پرەزيدەنت تاپسىرماسىنىڭ ارقاسىندا كەيىنگى كەزدەرى ىلگەرىلەۋ بايقالادى. سەمەيدە ءاۋ باستا ستاديون 10 مىڭ ورىندىق بولادى دەلىنگەن. بىراق جاڭا اكىم بەرىك ءۋاليدىڭ باستاماسىمەن سىيىمدىلىعى 25 مىڭعا ۇلعايتىلدى. بۇل – وتە دۇرىس باستاما. اكىم قازاق فۋتبولىنىڭ وتانى سانالاتىن ءوڭىر حالقىنىڭ الا دوپقا دەگەن قىزىعۋشىلىعى جوعارى ەكەنىن جاقسى بايقاپ وتىر. «ەلىماي» دەگەن ات ماعان قاتتى ۇنايدى. قازاقتىڭ كومانداسى ەكەنىن بىردەن بايقاتادى. ەندى كوماندا اتىنا ساي بولىپ, ەۋروكۋبوكتا ءساتتى ونەر كورسەتسە دەيمىن. ستاديون قۇرىلىسى ۋاقىتىندا اياقتالىپ, جانكۇيەرلەردىڭ كوزقۋانىشىنا اينالادى دەپ ۇمىتتەنەمىن», دەيدى فۋتبول ساراپشىسى بەك تولەۋوۆ.
ونىڭ ايتۋىنشا, «ەلىماي» كلۋبىنىڭ بيىلعى ماۋسىمداعى ويىنىن ەكىگە ءبولىپ قاراۋعا بولادى. كوماندا تامىزعا دەيىن الا-قۇلا وينادى. سوسىن عالىمجان كەنجەبەك, رامازان ورازوۆ سىندى ۇلتتىق قۇراما ۇزدىكتەرى كەلىپ, ەڭسە تىكتەدى. كۇزگە قاراي «اقتوبەدەن» وزىپ, ەۋروكۋبوكقا جولداما الدى. ياعني «ەلىمايدىڭ» بيىلعى ماۋسىمداعى ناتيجەسىنە 4 دەگەن باعا قويۋعا بولادى. كەلەسى جىلعى جاۋاپكەرشىلىگى ەكى ەسە. كلۋب ىشكى چەمپيوناتتا جۇلدەگە تالاسۋى كەرەك. سوسىن ەۋروكۋبوكتا جوعارى ناتيجەگە ۇمتىلۋعا ءتيىس. ەگەر وسى ەكى تاپسىرمانىڭ بىردە-بىرەۋى ورىندالماسا, كوماندا باسشىلىعى, باپكەرى قىزمەتىنەن كەتكەنى دۇرىس.
بيىل ەلىمىزدىڭ پرەمەر-ليگاسىندا «ەلىماي» كلۋبى ماۋسىمدى جاقسى ناتيجەمەن اياقتادى. كوماندا 26 ويىننىڭ 14-دە جەڭىپ, 6 ويىندا تەڭ ءتۇسىپ, 6 ويىندا جەڭىلىس تاۋىپ, تۋرنير كەستەسىندە 4 ورىنعا تابان تىرەدى. ەرەكشە ايتار جايت, 25-تۋردا «تۇراندى» 6:3 ەسەبىمەن جەڭدى. سول جەڭىس «ەلىمايعا» ەۋروپا جولداماسىنا – UEFA كونفەرەنتسيالار ليگاسى ىرىكتەۋ كەزەڭىنە قاتىسۋ مۇمكىندىگىن سىيلادى. وسىلايشا, «ەلىماي» كلۋبى تاريحي ناتيجەگە قول جەتكىزدى. ءسويتىپ كلۋب العاشقى رەت ەۋروكۋبوكقا جولداما الىپ وتىر. جالپى, 2025 جىل كلۋبتىڭ العا ۇمتىلىسىن ايقىن كورسەتتى. سەمەي فۋتبولىنىڭ ابىرويىن اسقاقتاتىپ, جانكۇيەرلەرىنە كوپتەگەن جەڭىس سىيلادى. سول تۇرعىدا جاڭا ستاديون «ەلىماي» فۋتبولشىلارىنىڭ ىنتاسىن ارتتىرىپ, جىگەرىن جاني تۇسەدى دەپ سەنەمىز.
اباي وبلىسى
