فوتو: اشىق دەرەككوز
Data Hub ارناسىنىڭ مالىمەتىنشە, تەك قاراشا ايىندا ەل تۇرعىندارى پلاستيكالىق حيرۋرگيا ءۇشىن 2 277 ءوتىنىم قالدىرعان. بۇل قىزمەت ءتۇرى بۇعان دەيىن سۇرانىستىڭ تومەن بولۋىمەن سيپاتتالسا, وتكەن ايدا جاعداي تۇبەگەيلى وزگەردى.
اناليتيكتەردىڭ ايتۋىنشا, قاراشادا پلاستيكالىق وپەراتسيالار ءۇشىن يگەرىلگەن قارجى كولەمى 2,1 ملرد تەڭگەگە جەتكەن. بۇل كورسەتكىش قازان ايىمەن سالىستىرعاندا ءوتىنىم سانى بويىنشا 33 ەسە, ال جالپى سوما بويىنشا 39 ەسە كوپ.
باعدارلاما ىسكە قوسىلعاننان بەرى پلاستيكالىق وپەراتسيالارعا جىبەرىلگەن وتىنىمدەردىڭ جيىنتىق سانى قاراشاعا دەيىن 1,6 مىڭنان اسپاعان ەدى.
ماماندار مۇنداي وزگەرىستى ستوماتولوگيالىق قىزمەتكە ءوتىنىم قابىلداۋدىڭ توقتاتىلۋىمەن بايلانىستىرادى.
ايتا كەتەيىك, 15 قىركۇيەكتەن باستاپ «وتباسى بانك» ءتىس ەمدەۋگە ارنالعان وتىنىمدەردى قابىلداۋدى توقتاتقان بولاتىن. بۇعان دەيىن بۇل باعىت زەينەتاقى تولەمدەرىن مەديتسينالىق ماقساتتا پايدالانۋ بويىنشا ەڭ تانىمال سالا بولعان, الايدا زاڭسىز فاكتىلەر انىقتالعاننان كەيىن شەكتەۋ ەنگىزىلدى.
بىراق بۇداي كەيىن كوز ەمدەتۋگە سۇرانىس كۇرت ارتىپ, كۇدىك تۋدىرعان جاعدايلار كوبەيىپ, بۇل باعىتقا دا شەكتەۋلەر قويىلدى. سوعان قاراماستان قاراشا ايىندا وفتالمولوگيالىق قىزمەت بويىنشا 9,8 مىڭ ءوتىنىم ورىندالىپ, 8,4 ملرد تەڭگە يگەرىلگەن.
Data Hub وكىلدەرى ءتىس ەمدەتۋ بويىنشا قايتارىمداردىڭ ءالى دە جالعاسىپ جاتقانىن, ال پلاستيكالىق وپەراتسيالارعا قاتىستى مۇنداي جاعداي ازىرگە وتە از ەكەنىن اتاپ ءوتتى.
