2025 جىلى ۆەلوسپورت فەدەراتسيا ايتارلىقتاي اۋقىمدى جۇمىس اتقارىپ, ەل ىشىندە دە, حالىقارالىق ارەنادا دا جوعارى ناتيجەلەر كورسەتتى. قازاقستاندىق ۆەلوسپورتشىلار ءىرى حالىقارالىق جارىستاردان 36 مەدال جەڭىپ الدى. ونىڭ ىشىندە 14 التىن, 12 كۇمىس, 10 قولا جۇلدە بار. مالايزيا مەن تايلاندتا وتكەن ازيا چەمپيوناتتارىندا ترەك, شوسسە جانە پارا-ۆەلوسپورت باعىتىنداعى ۇلتتىق قۇرامالار بىرنەشە مارتە جۇلدەگەر اتاندى.
جارقىن جەتىستىكتەردىڭ ءبىرى – باحرەيندە وتكەن جاسوسپىرىمدەر اراسىنداعى III ازيا ويىندارى. قازاقستاننىڭ جاس سپورتشىلارى بۇل جارىستا 2 التىن جانە 1 كۇمىس مەدال ولجالادى. قازاقستان ۆەلوسيپەد سپورتى فەدەراتسياسىنىڭ پرەزيدەنتى رايىمبەك باتالوۆ بيىل جىلدى ەڭ تابىستى ماۋسىمداردىڭ ءبىرى دەپ اتادى.
«ۆەلوسپورتتاعى جەتىستىكتەرىمىز ەلىمىزدە بولاشاق چەمپيونداردىڭ شووعىرى ءوسىپ كەلە جاتقانىن ايقىندادى. ماۋنتينبايك, ترەك جانە شوسسە باعىتتارىندا جىل بويى ەلىمىزدىڭ ءار وڭىرىندە 20 ۇلتتىق چەمپيونات پەن كۋبوك جارىستارى ءوتتى. شىمكەنت, قوستاناي, تاراز, سەمەي, استانا جانە قوناەۆ قالالارىندا ءدۇبىرلى سايىستار ءوتىپ, قاتىسۋشىلار سان ارتتى. بۇل وتاندىق ۆەلوسپورت تاريحىنداعى ەڭ قارقىندى جانە مازمۇندى ماۋسىمداردىڭ ءبىرى بولدى», دەدى ر.باتالوۆ.
ۆەلوسپورت فەدەراتسياسى بيىل دا اۋىلدىق جەرلەردەگى سپورت مەكتەپتەرىن قولداۋ باعدارلاماسىن جۇزەگە اسىردى. شالعايداعى بالالار مەن جاسوسپىرىمدەر سپورت مەكەمەلەرى جاڭا ۆەلوسيپەد بولشەكتەرىمەن, سپورتتىق فورمامەن جانە وقۋ-جاتتىعۋ پروتسەسىنە قاجەتتى تەحنيكالىق جابدىقتارمەن تولىقتى. بۇل باستاما اۋىل بالالارىنىڭ ۆەلوسپورتقا قولجەتىمدىلىگىن ارتتىرىپ, تالانتتى جاستاردىڭ شىڭدالۋىنا سەرپىن بەردى.
فەدەراتسيانىڭ بيىلعى جىلى اتقارعان جۇمىسىن تۋريزم جانە سپورت ۆيتسە-ءمينيسترى سەرىك جاراسباەۆ جوعارى باعالادى.
«ەلىمىزدە ۆەلوسپورت سەرپىندى دامۋدىڭ جاڭا كەزەڭىنە كوتەرىلدى. مەملەكەت باسشىسى ۇكىمەتكە بارلىق جاعداي جاساپ, سالانى قولداۋدى كۇشەيتۋدى تاپسىردى. ونىڭ ناقتى ناتيجەسىن بۇگىندە كورىپ وتىرمىز. الدا ءالى دە اتقارار شارۋا جەتەرلىك. كەلەسى جىلى ازيا ويىندارى, ودان كەيىن وليمپياداعا دايىندىقتى باستايمىز. ەگەر كۇش-جىگەرىمىزدى بىرىكتىرىپ, جۇيەلى ازىرلىك جۇرگىزسەك ناتيجەمىز جاقسارادى. مينيسترلىك تاراپىنان جان-جاقتى قولداۋ كورسەتۋگە دايىنبىز», دەدى .
جىل سايىن بەرىلەتىن «التىن دوڭگەلەك» ماراپاتى جاسوسپىرىمدەر ساناتىنداعى جىلدىڭ ۇزدىك سپورتشىسىنا بۇيىردى. 2009 جىلى ومىرگە كەلگەن الماتىلىق گلەب نوۆيكوۆ وسى اتاققا لايىق دەپ تانىلدى. قازاقستاننىڭ بىرنەشە دۇركىن چەمپيونى كەلەشەك وليمپيادا دوداسىندا توپ جارۋدى ارماندايدى.
ۆەلوسپورتتان ەلىمىزدىڭ ايەلدەر كومانداسى UAE Team ADQ-مەن ىنتىماقتاستىق تۋرالى كەلىسىم جاساستى. بۇل باستاما ايەلدەر ۆەلوسپورتىنىڭ جاڭا كەزەڭىن اشىپ, سپورتشىلارعا حالىقارالىق دەڭگەيدە دايىندالۋعا, بىرلەسكەن جاتتىعۋ باعدارلامالارىنا قاتىسۋعا جانە الەمنىڭ ۇزدىك ۆەلوشاباندوزدارىمەن تاجىريبە الماسۋعا مۇمكىندىك بەرەدى. سونداي-اق, 2026 جىلى جاپونيادا وتەتىن ازيا ويىندارىنا دايىندىقتى كۇشەيتەدى.
سالتاناتتى شارا بارىسىندا حالىقارالىق دودالاردا جەڭىسكە جەتكەن سپورتشىلار ءتۇرلى نوميناتسيامەن ماراپاتتالدى.
