جامبىل وبلىسى اكىمدىگىندە پرەمەر-ءمينيستردىڭ ورىنباسارى قانات بوزىمباەۆتىڭ توراعالىعىمەن 2026 جىلعى ۆەگەتاتسيا كەزەڭىنە دايىندىق ماسەلەلەرىنە ارنالعان كەڭەس ءوتتى.
جيىنعا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ, اۋىل شارۋاشىلىعى ءمينيسترى ايداربەك ساپاروۆ, سۋ شارۋاشىلىعى ۇيىمدارىنىڭ, جەرگىلىكتى اتقارۋشى جانە قۇقىق قورعاۋ ورگاندارىنىڭ, سونداي-اق ايماقتىڭ شارۋا قوجالىقتارى وكىلدەرى قاتىستى.
كەزدەسۋدە وبلىستىڭ شارۋالارىنا ترانسشەكارالىق سۋدىڭ كەلۋى ازايۋىنا بايلانىستى تۋىنداعان قاۋىپتەر جانە سۋارۋ ماۋسىمىندا سۋ رەسۋرستارىن ۇتىمدى پايدالانۋ شارالارى ءتۇسىندىرىلدى. اتاپ ايتقاندا, وسىرىلەتىن اۋىل شارۋاشىلىعى داقىلدارىن ءارتاراپتاندىرۋ جانە سۋ ۇنەمدەۋ تەحنولوگيالارىنا كوشۋ.
«سۋ رەسۋرستارىنىڭ قولجەتىمدى كولەمىنىڭ ازايۋى جالعاسىپ وتىرعاندىقتان, الداعى ۆەگەتاتسيا كەزەڭىندە سۋ تاپشىلىعى قاۋپى بار. بۇل – ورتالىق ازيانىڭ بارلىق ەلى تاپ بولىپ وتىرعان تابيعي پروتسەسس. سۋ كەلۋ كولەمىنىڭ ازايۋ سالدارىن بارىنشا ازايتۋ ءۇشىن اۋىل شارۋاشىلىعى داقىلدارىن ءارتاراپتاندىرۋ مەن سۋ ۇنەمدەۋ تەحنولوگيالارىن ەنگىزۋدى جەدەلدەتۋ قاجەت. بۇل ءۇشىن مەملەكەت بارلىق جاعدايدى جاساپ جاتىر. بۇل تەك سۋ رەسۋرستارىن ۇنەمدەۋ ماسەلەسى عانا ەمەس, سونىمەن بىرگە ەلدىڭ سۋ جانە ازىق-ت ۇلىك قاۋىپسىزدىگى وسىعان تىكەلەي بايلانىستى. دايىندالۋعا ۋاقىت بار, جاۋاپتى ورگاندار مەن جەرگىلىكتى اتقارۋشى بيلىك جانە ديقاندار ونى ءتيىمدى پايدالانۋعا ءتيىس», دەدى پرەمەر-ءمينيستردىڭ ورىنباسارى قانات بوزىمباەۆ.
ەسكە سالا كەتەيىك, سۋدى ۇنەمدەۋ جانە زاماناۋي سۋارۋ جۇيەلەرىنە كوشۋگە ىنتالاندىرۋ ماقساتىندا ۇڭعىمالاردى بۇرعىلاۋ, ينفراقۇرىلىم تارتۋ جانە سۋ ۇنەمدەيتىن جابدىقتار ساتىپ الۋ شىعىندارىن وتەۋ ۇلەسى 50%-دان 80%-عا دەيىن كوتەرىلدى. سۋارۋ سۋىنا سارالانعان تاريف ەنگىزىلدى. سۋ ۇنەمدەۋ تەحنولوگيالارىن قولداناتىن شارۋا قوجالىقتارى ءۇشىن سۋ قۇنىن سۋبسيديالاۋ 60%-دان 85%-عا دەيىن ۇلعايدى.
2026-2028 جىلدارعا ارنالعان جالپى ترانسفەرتتەر شەڭبەرىندە سۋ ۇنەمدەۋ تەحنولوگيالارىن ەنگىزۋدى جانە ەگىنگە قاجەتتى سۋ قۇنىن سۋبسيديالاۋدى قولداۋعا بۇرىنعى ءۇش جىلدىق كەزەڭمەن سالىستىرعاندا ءتورت ەسە كوپ قاراجات ءبولىندى.
قابىلدانعان شارالار قازاقستاندا سۋ ۇنەمدەۋ تەحنولوگيالارىن قولدانىلاتىن ەگىستىك القابى كولەمىن جىل سايىن 150 مىڭ گەكتاردان استامعا ۇلعايتۋعا مۇمكىندىك بەردى. 2030 جىلعا قاراي رەسپۋبليكاداعى 1,3 ملن گەكتار سۋارمالى جەردى زاماناۋي سۋارۋ جۇيەلەرىمەن قامتۋ جوسپارلانىپ وتىر.
بۇگىندە جامبىل وبلىسىندا سۋ ۇنەمدەۋ تەحنولوگيالارى 66,5 مىڭ گەكتاردا قولدانىلىپ جاتىر. ونىڭ ىشىندە جاڭبىرلاتىپ سۋارۋ جۇيەسى – 19,3 مىڭ گەكتار, تامشىلاتىپ سۋارۋ – 44,6 مىڭ گەكتار, لازەرلىك تەگىستەگىشپەن – 2,6 مىڭ گەكتار.
سونداي-اق كەڭەستە اۋىل تۇرعىندارىنىڭ تابىسىن ارتتىرۋعا باعىتتالعان «اۋىل اماناتى» جوباسىنىڭ نەگىزگى تەتىكتەرى تالقىلاندى.
بيىل جوبانى ىسكە اسىرۋ بويىنشا جاڭا تاسىلدەر ازىرلەندى. اتاپ ايتقاندا, راسىمدەردى جەڭىلدەتىپ, باسىم باعىتتاردى قولداۋعا ارنالعان جاڭا قاعيدالار بەكىتىلىپ, قولدانىلىپ جاتىر. ەڭ الدىمەن, وڭدەۋ كاسىپورىندارىن جانە وسىرۋدەن باستاپ وتكىزۋگە دەيىنگى تولىق وندىرىستىك تسيكلدى قامتاماسىز ەتەتىن قىزمەت تۇرلەرىن, سونداي-اق كووپەراتيۆتەردى قولداۋ نەگىزگى باسىمدىقتار رەتىندە ايقىندالدى. قارجىلاندىرۋ ليميتتەرى ەنگىزىلەدى: قاراجاتتىڭ 40%-عا دەيىنگى كولەمى مال شارۋاشىلىعىنا, كەمىندە 20%-ى وڭدەۋ سالاسىنا باعىتتالادى. سونىمەن قاتار اۋىل شارۋاشىلىعى سالاسىنا جاتپايتىن جاڭا بيزنەس تۇرلەرى دە تىزىمگە ەنگىزىلدى.
2026-2028 جىلدارى جامبىل وبلىسىندا 1 مىڭنان استام جوبانى ىسكە اسىرۋعا 31 ملرد تەڭگەدەن استام قارجى ءبولۋ جوسپارلانىپ وتىر.
وڭىردە مال شارۋاشىلىعىنىڭ جوعارى كورسەتكىشتەرىنە قاراماستان, بورداقىلاۋ, سويۋ, ساقتاۋ, وڭدەۋ جانە لوگيستيكا ينفراقۇرىلىمى جەتكىلىكسىز. وسىعان بايلانىستى اكىمدىكتەرگە, ونىڭ ىشىندە شاعىن يندۋستريالىق ايماقتار قۇرۋ بويىنشا ءتيىستى تاپسىرمالار بەرىلدى.
نەگىزگى كەدەرگىلەردىڭ ءبىرى اۋىل تۇرعىندارىنىڭ ءبىر بولىگىندە جەتكىلىكتى كەپىلدىڭ بولماۋى بولىپ قالا بەرەدى. وسىعان بايلانىستى ۆيتسە-پرەمەر «دامۋ» كاسىپكەرلىكتى دامىتۋ قورىنا كەپىلدەندىرۋ تەتىگىن پايدالانۋ جونىندە, ونىڭ ىشىندە «اۋىل اماناتى» جوباسى اياسىندا ۇلتتىق ەكونوميكا مينيسترلىگىنە ۇسىنىستار ەنگىزۋدى تاپسىردى.
