حاكىم ابايدىڭ 180 جىلدىعىنا وراي اقىننىڭ تۋعان جەرى – اباي اۋدانىنىڭ جيدەباي قورىعى اۋماعىنداعى «TauKum» ەتنو اۋىل كەشەنىندە ۇيىمداستىرىلعان بۇركىتشىلەر باسەكەسىندە ەلىمىزدىڭ 9 وبلىسى مەن 3 قالاسىنان 70-كە جۋىق بۇركىت, 14 يتەلگى مەن 15 قارشىعا سايىسقا ءتۇستى. ەكى كۇنگە سوزىلعان تارتىستى سايىستا قۇماي تازى جارىسى دا بولدى.
ءتۋرنيردىڭ اشىلۋ سالتاناتىندا اباي اۋدانىنىڭ اكىمى مەيىرجان سماعۇلوۆ قاتىسۋشىلارعا ساتتىلىك تىلەدى. سونىمەن قاتار اباي وبلىسىنىڭ دەنە شىنىقتىرۋ جانە سپورت باسقارماسىنىڭ باسشىسى باقىت بەكبوسىنوۆ پەن باس تورەشى, رەسپۋبليكالىق قۇسبەگىلىك فەدەراتسياسىنىڭ ۆيتسە-پرەزيدەنت, باعدات مۇپتەكەقىزى سالبۋرىن سايىسىنىڭ ەرەكشەلىكتەرىنە توقتالدى.
«بۇل ءىس-شارانىڭ ماقساتى – بابادان ميراس بولعان ساياتشىلىق ءداستۇرىن جاڭعىرتۋ, تۋريزم تارتۋ, ۇلتتىق سپورت تۇرلەرىن كەڭىنەن ناسيحاتتاۋ جانە جاس بۋىنعا بيىك رۋح پەن ءتول مادەنيەتتىڭ ءمانىن جەتكىزۋ. جارىس بىرنەشە كەزەڭنەن تۇرادى, ۇزدىك قۇسبەگىلەر مەن تازى يەلەرى انىقتالاتىن بولادى», دەدى ول.
وسىلايشا, ۇلتتىق قۇندىلىقتارىمىزدى ۇلىقتاپ, سالت-داستۇرلەرىمىزدى دارىپتەۋگە ارنالعان ءىس-شارانىڭ جابىلۋ سالتاناتىنا وبلىس اكىمى, رەسپۋبليكالىق قۇسبەگىلىك فەدەراتسياسىنىڭ پرەزيدەنتى بەرىك ءۋالي قاتىستى. شىمكەنت قالاسىنىڭ مادەني كۇندەرى اياسىندا وبلىسىمىزعا كەلگەن دەلەگاتسيا وكىلدەرى دە ءوڭىر باسشىسىمەن بىرگە سايىستىڭ ماراپاتتاۋ راسىمىندە بولدى.
بۇركىتشىلەر سايىسىندا استانالىق ەراسىل سەرىكبەك قاراشولاق اتتى قۇسىمەن 1-ورىندى يەلەندى. قارشىعا باسەكەسىندە جامبىل وبلىسىنان كەلگەن بەرىكبولسىن باباجان جەڭىمپاز اتاندى. قۇسىنىڭ اتى – «قانجار». يتەلگى جارىسىندا باباجان باقداۋلەت «قاراكوز» اتتى قۇسىمەن جەڭىسكە جەتتى. ال «قۇماي تازى» دوداسىندا ءۇرجار اۋدانىنىڭ قاتىسۋشىسى راحات اقىلجانوۆ توپ جاردى.
سالتاناتتى جيىندا ءداستۇرلى ءانشى, جىرشى, قازاقستاننىڭ ەڭبەك سىڭىرگەن قايراتكەرى ايگۇل ەلشىباەۆا, قازاقستاننىڭ مادەنيەت قايراتكەرى ومىرقۇل اينيازوۆ ونەر كورسەتىپ, اننەن شاشۋ شاشتى.
اتالعان ءىس-شارا اياسىندا جاپونيادا وتكەن ححV سۋردليمپيادا ويىندارىندا دزيۋدودان قولا مەدال يەلەنگەن جەرلەسىمىز التىنبەك كاكىتاەۆقا اباي اۋدانى تۇرعىندارى اتىنان اۆتوكولىك, جاتتىقتىرۋشىسىنا سەرتيفيكات تابىس ەتىلدى.
اباي وبلىسى
