الماتى قالاسىنداعى ۇلتتىق كىتاپحانادا وتكەن ءىس-شاراعا پرەزيدەنتىنىڭ كەڭەسشىسى مالىك وتارباەۆ, اقىن-دراماتۋرگ, مەملەكەت جانە قوعام قايراتكەرى نۇرلان ورازالين, الماتى وبلىسى اكىمىنىڭ ورىنباسارى عاني مايلىباەۆ, الماتى قالاسى مادەنيەت باسقارماسىنىڭ باسشىسى دانيار اليەۆ, جۋرنالدىڭ العاشقى باس رەداكتورى, جازۋشى باتىق ءماجيت ۇلى, قازاقستاننىڭ حالىق جازۋشىسى سماعۇل ەلۋباەۆ, قوعام قايراتكەرى رىسبەك سارسەنباي, اقىن ءارى كومپوزيتور ساعاتبەك مەدەۋبەك ۇلى جانە وزگە دە تانىمال قالامگەرلەر قاتىستى.
كەش بارىسىندا قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ مەرەيتوي يەلەرىنە قۇتتىقتاۋ ءسوز ارناپ, جۋرنالدىڭ ادەبي كەڭىستىكتەگى رولىنە جوعارى باعا بەردى. مەرەكە قۇلكەنوۆ: «جيىرما جىل – ادەبي باسىلىم ءۇشىن از ۋاقىت ەمەس. وسى كەزەڭ ىشىندە جۋرنال مۇقاعالي ماقاتاەۆتىڭ پوەتيكالىق مۇراسىن كەڭىنەن ناسيحاتتاپ قانا قويماي, قازاق پوەزياسىنىڭ ءورىسىن كەڭەيتۋگە, جاس دارىنداردى تانىتۋعا, رۋحاني قۇندىلىقتاردى دارىپتەۋگە ەلەۋلى ۇلەس قوستى», دەدى ءوز سوزىندە.
مۇقاعاليمەن بىرگە قازاق راديوسىندا ديكتورلىق قىزمەت اتقارعان باقىتجان اتاكەلديەۆتىڭ وقىعان جىرلارى كەشتىڭ كوركەم بولمىسىن تەرەڭدەتە ءتۇستى. سونداي-اق اقىننىڭ ۇلى جۇلدىز ماقاتاەۆ پەن كەلىنى باقىتكۇل ايداروۆا جۋرنال ۇجىمىنا جۇرەكجاردى ىقىلاستارىن ءبىلدىرىپ, اق تىلەكتەرىن جەتكىزدى.
مەرەيتوي قۇرمەتىنە بەلگىلى ءانشى, «قۇرمەت» وردەنىنىڭ يەگەرى سۇلۋشاش نۇرماعامبەتوۆا اقىننىڭ «سارجايلاۋ» ءانىن ورىنداپ, كەشتىڭ ءسانىن كىرگىزدى.
ءىس-شارا سوڭىندا «مۇقاعالي» جۋرنالىنىڭ قازىرگى باس رەداكتورى, قازاقستاننىڭ ەڭبەك سىڭىرگەن قايراتكەرى, «قۇرمەت» وردەنىنىڭ يەگەرى دۇيسەن ماعلۇموۆ باسىلىمنىڭ بۇگىنگى باعىت-باعدارى مەن بولاشاقتاعى جوسپارلارىنا توقتالىپ, وقىرمانعا قىزمەت ەتۋدى جالعاستىرا بەرەتىنىن ايتتى.
ۇلتتىق كىتاپحانادا وتكەن بۇل مەرەيتوي زيالى قاۋىم, اقىن-جازۋشىلار, مادەنيەت جانە باق وكىلدەرىنىڭ باسىن قوسىپ, «مۇقاعالي» جۋرنالىنىڭ ەل رۋحانياتىنداعى ورنى مەن ميسسياسىن تاعى ءبىر مارتە ايعاقتاعان ەرەكشە كەش رەتىندە ەستە قالدى.
