فوتو: istockphoto.com
ۇكىمەت باسشىسى وتاندىق فارماتسەۆتيكا سالاسىنا ينۆەستيتسيا تارتۋ ءۇشىن جاڭا كەلىسىمدەر جاسالىپ جاتقانىن, سونداي-اق, دارىلىك زاتتار مەن مەديتسينالىق بۇيىمدار وندىرىسىنە قاتىستى 9 ينۆەستيتسيالىق جوبا قولعا الىنعانىن اتاپ ءوتتى. دەنساۋلىق ساقتاۋ مينيسترلىگى ءۇش اي ىشىندە بارلىق ۇيىمداستىرۋ شارالارىن اياقتاپ, ينۆەستورلارمەن كەلىسىمدەرگە قول قويۋدى قامتاماسىز ەتۋى ءتيىس.
ء«دارى-دارمەككە باعا بەلگىلەۋدىڭ جاڭا تسيفرلىق جۇيەسى فارماتسەۆتيكالىق نارىقتاعى بارلىق قاتىسۋشىلار ءۇشىن بىرىڭعاي ەرەجەلەردى بەكىتتى. بيىل پرەپاراتتارعا باعانى تومەندەتۋدىڭ ارقاسىندا مەملەكەت دارىلەردى ساتىپ الۋدا 36 ملرد تەڭگەدەن استام قارجى ۇنەمدەدى. بۇل قاراجات حالىقتى قوسىمشا ءدارى-دارمەكپەن قامتاماسىز ەتۋگە باعىتتالادى», دەدى ولجاس بەكتەنوۆ.سونىمەن قاتار, پرەمەر-ءمينيستردىڭ ايتۋىنشا, ساتىپ الۋ باعالارىنىڭ تومەندەۋى وندىرۋشىلەر مەن جەتكىزۋشىلەرگە ۇناي بەرمەيتىنى تۇسىنىكتى.
«بىراق ءبىز ازاماتتارىمىزدىڭ مۇددەلەرىن باسشىلىققا الۋىمىز كەرەك. دارىلەر ءادىل باعامەن ساتىپ الىنادى. وتاندىق فارماتسەۆتيكالىق وندىرۋشىلەرگە ايتارىم, ءبىز سىزدەردى ءارى قاراي دا قولدايمىز. وعان ەشقانداي كۇمان بولماسىن. بىراق مەملەكەتتىك قولداۋ شارالارى ساپالى مەديتسينالىق ءونىمدى جەتكىزەتىن جانە باعانى جاساندى تۇردە وسىرمەيتىن نارىقتىڭ ادال قاتىسۋشىلارىنا عانا كورسەتىلەدى», دەدى پرەمەر-مينيستر.
دەنساۋلىق ساقتاۋ ءمينيسترى اقمارال ءالنازاروۆا 2026 جىلعا ارنالعان پرەپاراتتاردى ساتىپ الۋ جاڭارتىلعان جۇيە بويىنشا جۇرگىزىلىپ جاتقانىن مالىمدەدى.
ء«دارى-دارمەكتەردىڭ كەڭ ءتىزىمىنىڭ قۇنىن تومەندەتۋ ناتيجەسىندە ايتارلىقتاي بيۋدجەتتىك تيىمدىلىككە قول جەتكىزىلگەن. بىرقاتار جوعارى شىعىندى دارىلىك زاتتار بويىنشا باعالار 50%-دان 300%-عا دەيىن تومەندەدى. بۇل, ەڭ الدىمەن, ونكولوگيالىق پرەپاراتتارعا قاتىستى. مىسالى, يماتينيب ءدارىسى بويىنشا باعا 9450 تەڭگەدەن 2348 تەڭگەگە تومەندەدى, ال بەۆاتسيزۋماب ءدارىسىنىڭ باعاسى 360 مىڭنان 77 مىڭعا دەيىن تومەندەدى», دەلىنگەن حابارلامادا.
سونىمەن قاتار انتيبيوتيكتەر مەن يممۋنوبيولوگيالىق پرەپاراتتار بويىنشا دا ايتارلىقتاي ۇنەم جاسالعان: تسەفەپيمنەن – 174 ملن تەڭگە, ەكۋليزۋمابتان – 424 ملن تەڭگە ۇنەمدەلگەن.
ەڭ جوعارى بيۋدجەتتىك تيىمدىلىكتى قامتاماسىز ەتەتىن توپ-10 پرەپاراتقا بەۆاتسيزۋماب, يماتينيب, سورافەنيب جانە سۋنيتينيب سياقتى پرەپاراتتار كىردى. سونداي-اق ينسۋلين دەگلۋدەك, مەتوترەكسات, ەلترومبوپاگ, بۋدەسونيد جانە يوپروميد باعاسى ايتارلىقتاي تومەندەدى.
باعا تومەندەۋى بولشەك ساۋداعا دا اسەر ەتتى: 4 900 ءدارى-دارمەككە جاڭا شەكتى باعالار بەكىتىلىپ, قازان-قاراشا ايلارىندا تانىمال پرەپاراتتاردىڭ قۇنى ورتا ەسەپپەن 12%-عا ارزانداعان:
- «تسەفاپس» – 31%;
- «زيتماك» – 20%;
- «رەۆموكسيكام» – 32% تومەندەگەن.
مينيسترلىكتىڭ مالىمەتىنشە, وتاندىق وندىرۋشىلەر جاڭا تالاپتارعا تەز بەيىمدەلىپ, ءونىم باعالارىن قايتا قاراعان. ۇنەمدەلگەن قاراجات ءبىرىنشى كەزەكتە العاش رەت انىقتالعان پاتسيەنتتەردىڭ قاجەتتىلىكتەرىن وتەۋگە باعىتتالادى. جاڭا باعا بەلگىلەۋ مودەلى نارىقتى تۇراقتاندىرىپ, جەتكىزۋ قاۋىپسىزدىگىن كۇشەيتەدى جانە سىرتقى باعا اۋىتقۋلارىنا تاۋەلدىلىكتى ازايتادى. مينيسترلىك وسى باعىتتاعى ناتيجەلەردى بەكىتۋ جۇمىسىن جالعاستىرادى.
