قايرات ساتىبالدىنىڭ ۇلىنا تيەسىلى «بايسات» بازارى ساتىلىمعا شىعارىلدى

اۋكتسيون E-Qazyna پورتالىندا 26 جەلتوقسان كۇنى استانا ۋاقىتىمەن ساعات 11:00-دە وتەدى.

«بايسات» بازارىنىڭ باستاپقى باعاسى 26 ملرد 706 ملن تەڭگە بولىپ بەلگىلەندى.

ايتا كەتەيىك, «بايسات» كوتەرمە-بولشەك ساۋدا ورتالىعى» جشس-دەگى ۇلەس العاش رەت قاراشا ايىندا ساتىلىمعا قويىلعان ەدى. الايدا سول كەزدە ساۋدا باستالار ساتتە وبەكت بويىنشا تىركەلگەن قاتىسۋشىلار بولماعاندىقتان اۋكتسيون وتپەي قالعان.  جالپى اۋماعى 4 221,4 شارشى مەتر بولاتىن ءۇش نىساننان جانە 1,4 گەكتار جەردەن تۇراتىن «بايسات» بازارىنىڭ بۇل بولىگى ءبىر-بىرىمەن اففيليرلەنگەن ەكى كومپانيانىڭ – «قازگەرستروي» بىرلەسكەن كاسىپورنى» جشس مەن Astana Finansial Group جشس-ءنىڭ مەنشىگىندە بولعان. 2024 جىلدىڭ قاڭتارىندا الماتى پروكۋراتۋراسى بۇل ۇلەستى مەملەكەت مەنشىگىنە قايتاردى. بۇعان دەيىن قايرات ساتىبالدى سوتقا دەيىنگى تەرگەۋ اياسىندا «بايسات» بازارىنىڭ نەگىزگى بولىگىن مەملەكەتكە ءوز ەركىمەن قايتارعان ەدى. سونداي-اق ول 650 ملرد تەڭگەنى مەملەكەتكە قايتارعان.

2022 جىلدىڭ ناۋرىزىندا قايرات ساتىبالدى شەتەلگە ۇشىپ كەتپەك بولعان كەزدە ۇستالدى.

وعان قاتىستى قىلمىستىق ءىس قوزعالىپ, كەيىن بىرنەشە باپ بويىنشا كىنالى دەپ تانىلدى. سوت ونى التى جىلعا باس بوستاندىعىنان ايىرۋ جازاسىنا كەسىپ, مۇلكىن تاركىلەدى, سونداي-اق 10 جىل بويى مەملەكەتتىك قىزمەتتە جانە ۇلتتىق كومپانيالاردا لاۋازىمدى قىزمەت اتقارۋ قۇقىعىنان ايىردى. دالەلدەنگەن ايىپتاۋلاردىڭ قاتارىندا «قازاقتەلەكوم» اق-نا 12 ملرد تەڭگەدەن استام ماتەريالدىق زالال كەلتىرۋ جانە «كولىك قىزمەتى ورتالىعى» اق مۇلكىن ىسىراپ ەتۋ بار.

ۇكىم شىعارىلار الدىندا ساتىبالدى مەدياتسيا اياسىندا ەكى كەلىسىمگە قول قويىپ, ءوز كىناسىن مويىنداپ, كەلتىرىلگەن زالالدى وتەگەن. سونداي-اق ونىڭ بۇرىنعى جۇبايى گۇلميرا ساتىبالدىعا قاتىستى ۇكىم جاريالانعان ەدى. وتكەن جىلدىڭ مامىر ايىندا ول التى جىلعا باس بوستاندىعىنان ايىرىلعان, كەيىن جازاسى ۇزارتىلدى.