بۇگىن «پرەزيدەنتكە حاتتار» Telegram ارناسىندا تانىمال جۋرناليست گۇلنار باجكەنوۆانىڭ پاتەرىندە, سونداي-اق Orda پورتالىنىڭ رەداكتسياسىندا ءتىنتۋ ءوتىپ جاتقانى بەلگىلى بولدى.
«باجكەنوۆاعا قاتىستى الماتىداعى بيزنەس-ورتالىقتىڭ يەسى مەن وڭىرلىك بالىق ينسپەكتسياسىنىڭ قىزمەتكەرى تاراپىنان جالعان اقپارات تاراتۋ بويىنشا بىرنەشە ارىز ءتۇستى», دەلىنگەن حابارلامادا.
باجكەنوۆاعا قاتىستى بىرنەشە مارتە جانە ادەيى جالعان اقپارات تاراتۋ فاكتىلەرى بويىنشا قىلمىستىق ءىس قوزعالعان.
«تەرگەۋ بارىسىندا ارىزدانۋشىلاردىڭ ۋاجدەرى مۇقيات تەكسەرىلىپ جاتىر. الدىن الا دەرەك بويىنشا, 2024 جىلعى جاريالانىمداردىڭ بىرىندە قۇقىق قورعاۋ ورگانى قىزمەتكەرىنىڭ پارا العان كەزدە ۇستالعانى تۋرالى جالعان اقپارات ادەيى تاراتىلعان. الايدا بۇل دەرەك شىندىققا جاناسپايتىنى ناقتى انىقتالدى. وسىلايشا, ب. تاراپىنان اتالعان جاريالانىمداعى قىزمەتكەردىڭ كاسىبي بەدەلىنە نۇقسان كەلىپ, قوعامدا ونىڭ جۇمىسىنا قاتىستى جالعان تۇسىنىك قالىپتاسقان.
تاعى ءبىر جاريالانىمدا م ۇلىكتىك داۋعا قاتىستى زالالدىڭ مولشەرى مەن سەبەپتەرى تۋرالى بۇرمالانعان ءارى شىندىققا سايكەس كەلمەيتىن اقپارات بەرىلگەن, بۇل قوعامدى جاڭىلىستىرىپ, ارىزدانۋشىنىڭ ىسكەرلىك بەدەلىنە ايتارلىقتاي نۇقسان كەلتىرگەن», دەپ جاۋاپ بەردى پوليتسيا.
سونداي-اق وتكەن جىلدارداعى باسقا دا ماتەريالدارعا قاتىستى جابىرلەنۋشىلەردىڭ ارىزدارى بويىنشا تەرگەۋ جۇرگىزىلىپ جاتىر. ولاردا دا جالعان نەمەسە قوعامدى اداستىراتىن مالىمەتتەر بولۋى مۇمكىن.
بۇدان بولەك, پوليتسيا دەپارتامەنتى ءتىنتۋ جۇرگىزىلگەنىن راستاپ, باجكەنوۆانىڭ ۇيىنەن, سونداي-اق Orda رەداكتسياسىنان قۇرىلعىلار تاركىلەنگەنىن حابارلادى.
«ازاماتشا ب.-نىڭ تۇرعىلىقتى جەرى مەن جۇمىس ورنىندا تەرگەۋ ءىس-قيمىلدارى جۇرگىزىلىپ جاتىر. جاريالانعان جالعان اقپاراتتىڭ دايىندالۋى مەن تارالۋىنىڭ ءمان-جايىن انىقتاۋ, سونداي-اق ولاردىڭ قايدان شىققانىن تەكسەرۋ ءۇشىن ەلەكتروندىق قۇرىلعىلار مەن ماتەريالدار الىندى. تەرگەۋ جالعاسادى. ءىستىڭ بارلىق ءمان-جايى زاڭ اياسىندا انىقتالادى», دەپ قوستى ۆەدومستۆو.
ايتا كەتەيىك, ازىرگە Orda رەداكتسياسى دا, گۇلنار باجكەنوۆا دا رەسمي مالىمدەمە جاساعان جوق.
باسىلىم سايتىندا گۇلشات باجكەنوۆا ء(جۋرناليستىڭ شىن ەسىمى) Orda-نىڭ نەگىزىن قالاۋشىسى, قۇرىلتايشىسى جانە باس رەداكتورى ەكەنى كورسەتىلگەن. سونداي-اق ول 2020 جىلى تىركەلگەن «OrdaMedia.kz» جشس ديرەكتورى.
