فوتو: مادەنيەت جانە اقپارات مينيسترلىگى
ءبىر ايدا ەكى بايقاۋدىڭ جەڭىمپازى
ءابىلمانسۇر سىرمانوۆتىڭ «جيزەل» بالەتىندەگى البەرت ۆارياتسياسى 9-شى پەكيندىك بي مەكتەپتەرى اراسىنداعى بايقاۋ كورەرمەندەرىن دۇركىرەي قول سوقتىرىپ ءتانتى ەتكەن. 10 ەلدەن كەلگەن 60-قا جۋىق قاتىسۋشىنىڭ اراسىنان قازاق ۇلتتىق حورەوگرافيا اكادەمياسىنىڭ ستۋدەنتى ۇزدىك شىعىپ, قازىلار القاسىنان ەڭ جوعارى باعالاردى العان.
ال جاڭا جەڭىسىنە Budapest Ballet Grand Prix 2025 (ۆەنگريا) بايقاۋىندا قول جەتكىزدى. حالىقارالىق قازىلار القاسى ءا.سىرمانوۆتىڭ ەرەكشە تالانتى مەن ونەرگە دەگەن ادالدىعىن اتاپ, وعان ەۋروپانىڭ جەتەكشى بالەت جوبالارىنا شاقىرتۋ ۇسىنىپ, وقۋ جانە تاعىلىمدامالارمەن ماراپاتتادى.
دايىندىق وتە اۋىر بولعان
ونىڭ ايتۋىنشا, بايقاۋلارعا دايىندىق وڭاي بولماعان. توقتاۋسىز جاتتىعۋلار, ءار پوزيتسيانى مۇقيات شىڭداۋ, كەشكە دەيىن قايتالاناتىن ۆارياتسيالار – كۇندەلىكتى ءتارتىپ. كەي كۇندەرى بۇلشىقەتتەرى ءتىپتى باعىنباي قالعان مەزەتتەرى دە بولعان.
ءابىلمانسۇر سىرمانوۆتىڭ ۇستازى قازاق ۇلتتىق حورەوگرافيا اكادەمياسىنىڭ وقىتۋشىسى اسەت مىرزاقۇلوۆ.
ء«بىز بايقاۋعا دايىندىقتى بارىنەن ەرتە, تامىز ايىندا باستادىق. ءۇش اي دايىندالدىق. قازىر وعان فيزيكالىق تا, پسيحولوگيالىق تا دەمالىپ, قالپىنا كەلۋ كەرەك. ءبىر ايدا ەكى بايقاۋ – ءارتىس ءۇشىن وتە قيىن. قۇداي قالاسا, ساۋىردە پەرم قالاسىندا وتەتىن «ارابەسكي» حالىقارالىق ۇلكەن بايقاۋىنا دايىندالامىز. بۇل – بالەت الەمىندەگى ەڭ بەدەلدى جارىستاردىڭ ءبىرى», دەيدى اسەت مىرزاقۇلوۆ.
24.kz مالىمەتىنشە, قازاق ۇلتتىق حورەوگرافيا اكادەمياسى بۇگىندە جاس دارىنداردىڭ ۇستاحاناسىنا اينالدى. ولار قازاقستان اتىن الەمدىك ساحنالاردا لايىقتى تانىتىپ, كورەرمەندەردىڭ جۇرەگىن جاۋلاپ ءجۇر. بيىل وسى التىن ۇيانىڭ 10 جىلدىق مەرەيتويى.
