بايقاۋدىڭ ماقساتى – وسكەلەڭ ۇرپاقتى كىتاپ وقۋعا, حالقىمىزدىڭ رۋحاني اسىل مۇراسىنا دەگەن سۇيىسپەنشىلىگىن وياتۋ وقۋشىلاردىڭ شىعارماشىلىق پەن زياتكەرلىك قابىلەتىن دامىتىپ, قازاق حالقىنىڭ باتىرلىق ەپوستارىن ناسيحاتتاۋ. جىر دوداسىنىڭ ىرىكتەۋ كەزەڭى قىركۇيەك ايىندا وتكەن ەدى. جوبانىڭ اۆتورى اباي ورازدىڭ ايتۋىنشا, ءوڭىردى ارالاپ كىتاپقۇمار, زەردەلى جەتكىنشەكتەردى ىزدەگەن. سايىسقا ۇلىتاۋ وبلىسىنان 4–16 جاس ارالىعىنداعى 118 بالا قاتىستى. بايقاۋدىڭ تالابى بويىنشا قاتىسۋشىلار «الپامىس باتىر» جىرىنىڭ مازمۇنىن تولىق ءبىلىپ, ءوز جاسىنا ساي جىردان ءۇزىندى جاتقا ايتۋى قاجەت. سونداي-اق جىرداعى كونەرگەن, تاريحي سوزدەردىڭ ماعىناسىن اشىپ, مازمۇنعا بايلانىستى قويىلعان سۇراقتارعا جاۋاپ بەرەدى.
«الپامىس باتىر» جىرىنىڭ ءتۇرلى نۇسقاسى بار. سوندىقتان سايىسقا قاتىسۋشىلار 1990 جىلى «جالىن» باسپاسىنان شىققان ء«تورت باتىر» كىتابىنا كىرگەن «الپامىس باتىر» جىرىن جاتتادى. جاس ەرەكشەلىگىنە سايكەس جىر جاتتاۋ ءتورت توپقا ءبولىندى: 4–7 جاس (50–80 جول), 8–11 جاس (100–130 جول), 12–15 جاس (150–170 جول), 16–20 جاس (200–230 جول). جەتكىنشەكتەر ونەرىن بەلگىلى قالامگەر, قازاقستاننىڭ ەڭبەك سىڭىرگەن قايراتكەرى بايانعالي ءالىمجانوۆ باستاعان قازىلار القاسى باعالادى.
بايقاۋ بارىسىندا ءار جاس شاماسىنداعى بالالار وتە بەلسەندىلىك تانىتتى. ولار جىردى ايتقاندا وبرازعا كىرىپ, تۇرلەندىرىپ, تىڭداۋشىلارىن ۇلكەن اسەرگە بولەدى. ايتالىق, جاڭاارقالىق ءالي امانجان اتتى بالا «الپامىس باتىر» جىرىن تولىق جاتتاپ, جۇرتتى تاڭعالدىردى. ەڭ كىشكەنتاي قاتىسۋشى ساتباەۆ قالاسىنان كەلگەن ءتورت جاسار ايزەرە ابىلقاسىمعا كورەرمەن سۇيسىنە قارادى. 5–7 جاس قاتىسۋشىلار اراسىندا بالشايىم كورشىحان, عالىمجان بايشات, قاۋقار باشپاي, كوركەم داستان ەسىمدى بالالار بالداي تىلىمەن, ساق جاۋىنگەرىنىڭ كيىمىن كيىپ ساحناعا جارقىراپ شىعىپ, ەلدى اۋزىنا قاراتتى.
سونداي-اق مادەني شارادا بەلگىلى جىرشى بايانعالي ءالىمجانوۆ «ماناس» جىرىنان ءۇزىندى ايتسا, تانىمال ءانشى سەرىك وسپانوۆ اقتامبەردى تەرمەسىن توگىلتتى.
بايقاۋدىڭ جەڭىمپازدارى مەن جۇلدەگەرلەرىنە ءى, ءىى, ءىىى دارەجەلى ديپلوم, سونداي-اق ىنتالاندىرۋ سىيلىقتارى بەرىلدى. جۇلدە جاس ەرەكشەلىگىنە سايكەس تاعايىندالدى. وڭىردەگى مەتسەناتتار مەن ۇلتتىق ونەردى قولداۋشى ازاماتتار قوسىمشا جۇلدە تاعايىندادى.
ۇلىتاۋ اۋدانىنىڭ شەڭبەر اۋىلىنان كەلگەن يسا شامبۇلحان (8 جاس) مەن تاڭشولپان دۋلاتقىزى (16 جاس) باس بايگە يەلەندى. بالالاردى باپتاعان ءار مەكتەپتەن كەلگەن جەتەكشىلەر دە ولجالى ورالدى. ولارعا بايانعالي ءالىمجانوۆ ءوز قولتاڭباسىمەن «400 ءتاتتى تاقپاق» پەن «ابىلايحان مەن باتىرلار» كىتابىن تارتۋ ەتتى.
ۇلىتاۋ وبلىسى
