فوتو: ۇكىمەتتىڭ ءباسپاسوز قىزمەتى
ۇكىمەت باسشىسى قازاقستاندى ورتالىق ازياداعى نەگىزگى كولىك تورابىنا اينالدىرۋ تۋرالى پرەزيدەنت تاپسىرماسىن ەسكە سالىپ, ساۋدا-لوگيستيكالىق حابتاردى قۇرۋ ترانسشەكارالىق ەكونوميكالىق بايلانىستاردى دامىتۋدىڭ ماڭىزدى ستراتەگيالىق باعىتى ەكەنىن اتاپ ءوتتى.
«قازىر ترانزيتتىك باعىتتار مەن ينۆەستيتسيالار ءۇشىن باسەكەلەستىك كۇشەيىپ كەلەدى. وسىعان وراي بىزگە جەرۇستى كولىك ينفراقۇرىلىمىن, ونەركاسىپتىك كووپەراتسيا مەن ساۋدا جەلىلەرىن جەدەل دامىتۋ قاجەت», دەدى ولجاس بەكتەنوۆ.سونداي-اق ولجاس بەكتەنوۆ ترانسشەكارالىق حابتاردى دامىتۋ ىسىندە جۇيەلى كوزقاراس پەن سالاداعى جوبالاردىڭ جۇزەگە اسىرۋ بارىسىن تۇراقتى مونيتورينگ جاساۋ ماڭىزىنا توقتالدى.
«اتالعان جوبالار كاپيتال مەن جاڭا وندىرىستەردى تارتۋ ورتالىقتارىنا اينالادى. وسىعان بايلانىستى جۇمىس قارقىنىن كۇشەيتىپ, بارلىق تاراپتىڭ ءوزارا ءىس-قيمىلىن جاقسارتۋ قاجەت. ساۋدا مينيسترلىگى مۇددەلى مەملەكەتتىك ورگانداردىڭ جۇمىسىن ءتيىمدى ۇيلەستىرۋى كەرەك», دەدى ۇكىمەت باسشىسى.
ۇكىمەت ترانزيتتىك جانە لوگيستيكالىق ينفراقۇرىلىمدى دامىتۋ ۇشىن بيزنەسكە قولايلى جاعداي جاساپ, ترانسشەكارالىق حابتاردىڭ ينۆەستيتسيالىق تارتىمدىلىعىن ارتتىرۋدى دا كوزدەپ وتىر.
«اتاپ ايتقاندا, ينجەنەرلىك ينفراقۇرىلىمنىڭ دايىندىعىن قامتاماسىز ەتۋ, ارنايى ەكونوميكالىق ايماقتار قۇرۋ, راسىمدەردىڭ اشىقتىعى جانە مەملەكەتتىك ورگاندار مەن اكىمدىكتەردىڭ جەدەل ارەكەت ەتۋى سياقتى ماسەلەلەردى شەشۋگە باسىمدىق بەرگەن ءجون», دەپ تاپسىردى پرەمەر-مينيستر.
