65 كەلىگە دەيىن سالماق دارەجەسىندە شاديار پەرنەش سۋردليمپيادا چەمپيونى اتاندى. فينالدىق بەلدەسۋدە ول يراندىق كەيۆان ءروستاماباديدى 4:2 ەسەبىمەن جەڭىپ, قازاقستانعا وسى كۇرەس تۇرىندە جالعىز التىن مەدالدى الىپ كەلدى. شيەلەنىستى فينال سوڭىندا پەرنەش ءوز ەموتسياسىن جاسىرمادى. ونىڭ ايتۋىنشا, بۇل التىن – ءوزىنىڭ سپورتتىق جولىنداعى «ەڭ كوپ كۇتكەن ءارى ەڭ قىمبات» جەڭىسى.
57 كەلىگە دەيىن سالماقتا فينالعا شىققان عابيت ەسجانوۆ يراندىق موحامماد شياۆوشيمەن بەلدەسىپ, 6:15 ەسەبىمەن ەسە جىبەردى. وسى ناتيجەمەن ول سۋردليمپيادانىڭ كۇمىس جۇلدەگەرى اتاندى.
قازاقستان قورجىنىنا ءۇش قولا مەدال ءتۇستى:
• عاسىر تۇرعىنباي (74 كگ) الدىمەن بەيتاراپ سپورتشى الەكسەي كالەسنىيدى 22:8 ەسەبىمەن جەڭىپ, كەيىن دەنيس ترەگۋبەنكومەن بولعان قولا ءۇشىن بەلدەسۋدە 11:0 ناتيجەسىمەن باسىم ءتۇستى.
• سابىرجان رسالى (86 كگ) گرەك بالۋانى نيكولاوس ءيوسيفيديستى 16:5 ەسەبىمەن ۇتتى.
• قايراتحاان شونقۋ (125 كگ) ۇندىستاندىق گان شيامدى 12:1 ەسەبىمەن تەحنيكالىق باسىمدىقپەن جەڭىپ, قولا مەدال يەگەرى اتاندى.
97 كەلىگە دەيىن سالماقتاعى قولا بەلدەسۋىندە بەكسۇلتان مالايدار يراندىق ەرفان ساتتاريگە جول بەردى.
قر ۇلتتىق سۋردليمپيادا كوميتەتتىڭ ۆيتسە-پرەزيدەنتى ازامات قارلىعاشەۆ قازاقستان سپورتشىلارىنىڭ ناتيجەلەرىنە جوعارى باعا بەردى.
«بۇل سۋردليمپيادا قازاقستان ءۇشىن تاريحي ساتتەرگە تولى بولدى. بۇگىنگى جەڭىستەر كەزدەيسوق ناتيجە ەمەس, ءبىزدىڭ سپورتشىلاردىڭ جاڭا دەڭگەيگە كوتەرىلگەنىنىڭ دالەلى. جىگىتتەردىڭ كۇرەس مانەرى, مىنەزى, سەنىمدىلىگى ايقىن وزگەرگەنىن كورىپ وتىرمىز. بۇل بۇكىل ەل ءۇشىن ۇلكەن جەتىستىك. الداعى جارىستارعا دا سەرپىن بەرەتىنىنە سەنىمدىمىن», دەدى ول.
