ول وبلىس ورتالىعىنىڭ ىرگەسىندەگى كەنجەكول اۋىلىندا 18 جىلدان بەرى تۇرىپ جاتىر. ايتۋىنشا, رەسەيدىڭ ءنوۆوسىبىر ولكەسىندە 1977 جىلى دۇنيەگە كەلگەن. تاعدىردىڭ جازۋىمەن ول ءۇش جاسقا تولعاندا وتباسى پاۆلودار قالاسىنىڭ جانىنداعى ميچۋرينو اۋىلىنا كوشىپ كەلەدى. بالالىق شاعىن وسىندا وتكىزگەن اندرەي دياگەل قىزىق بولعاندا كەڭەستىك ۇلگىدەگى تولقۇجاتتى دا الا الماعان. وعان تۋ تۋرالى كۋالىگىن جوعالتىپ الۋى سەبەپ بولعان.
– مەكتەپ بىتىرگەن سوڭ پاۆلودار قالاسىنا كەلىپ, پاتەر جالداپ تۇردىم. قولعا ىلىكككەن جۇمىستىڭ ءبارىن ىستەي بەردىم. قۇجاتىم جوقتىعىنا بايلانىستى اسكەرگە بارمادىم. ال 2007 جىلى كەنجەكول اۋىلىنا كوشىپ, ول جەردە بولاشاق جارىممەن تانىستىم. تۇڭعىش قىزىمىز دا سوندا دۇنيەگە كەلدى. ايەلىمىز ەكەۋىمىز نەكەمىزدى زاڭداستىرعىمىز-اق كەلگەن. الايدا ول ءۇشىن اۋەلى جەكە كۋالىك نەمەسە تولقۇجات رەسىمدەۋىم كەرەك بولدى. بىراق ونى رەسىمدەۋ ۇزاق جىلدارعا سوزىلدى, – دەيدى ول.
اندرەي ءوز ەركىمەن ەكى مارتە وبلىس ورتالىعىنداعى پاناسىز جاندارعا ارنالعان ارنايى قابىلداعىشقا بارىپ, 30 تاۋلىكتەن وتىرىپ قايتقان.
– سولاي جاساسام, قۇجاتىم تەز ارادا رەسىمدەلىپ كەتە مە دەپ ويلادىم. بىراق ءبارى مەن ويلاعانداي بولماي شىقتى. رەسەيلىك ازامات ەمەس ەكەنىمدى, 30 جىلدان استام ۋاقىت جىل بويى پاۆلودار ىرگەسىندە تۇرىپ كەلە جاتقانىمدى دالەلدەۋىم قاجەت بولدى. وسىلاي جۇرگەندە 2018 جىلى جەرگىلىكتى ۋچاسكەلىك پوليتسەي رەسەيدىڭ قاراسۋىق قالاسىنان تۋ تۋرالى كۋالىگىمنىڭ كوشىرمەسىن الدىردى. ودان سوڭ ارنايى قابىلداعىشتا تاعى وتىرىپ شىقتى. ودان دا ناتيجە بولمادى, – دەپ ەسكە الادى وتاعاسى.
بىردە ايەلى ەمدەلىپ جاتقان مەديتسينالىق ورتالىققا بارعاندا ونداعىلار مەملەكەتتىك مالىمەتتەر قورىندا اندرەي دياگەل تۋرالى بىردە-ءبىر مالىمەت جوق ەكەنىن حابارلايدى. بۇل جاعداي قۇجات رەسىمدەۋ ىسىنە بار ىنتا-شىنتاسىمەن كىرىسۋگە تۇرتكى بولعان ءتارىزدى. اقپان ايىندا جەرگىلىكتى اكىمدىك وكىلدەرى قۇجات جيناۋعا كومەكتەسىپ, ونىڭ كورشىلەرىن كۋاگەر رەتىندە تارتقان. ياعني وسىنشاما ۋاقىت ىشىندە ەر ادامنىڭ راسىندا وبلىس اۋماعىن مەكەندەپ كەلگەنىن, ەشقايدا شىقپاعانىن دالەلدەۋ قاجەت ەدى.
كۋاگەرلەر بارلىعىن ناقتىلاعان سوڭ ءساۋىر ايىندا وڭىرلىك كوشى-قون قىزمەتى باسقارماسى اندرەي دياگەلدى قازاقستاننىڭ ازاماتى دەپ تانىدى. ال مامىر ايىندا وعان جسن بەرىلدى. ناتيجەسىندە قر ازاماتتارىنا ارنالعان جەكە كۋالىك رەسىمدەۋگە مۇمكىندىك الادى.
– بيىلعى 17 قاراشادا كوپتەن ارمان بولعان كۋالىگىم قولىما ءتيدى. بەس بالام بار, ەڭ كىشى ۇلىم 6 ايعا تولدى. ولاردىڭ بارلىعى كەزىندە ايەلىمنىڭ تەگىن العان. ەندى بالالارىمدى ءوز تەگىمە جازدىرىپ الامىن, – دەگەن قۋانىشىن جەتكىزدى وتاعاسى.
اندرەي ءومىر بويى كافەل جەلىمدەۋمەن اينالىسىپ كەلگەن. وسى ۋاقىتقا دەيىن جۇمىس ۇسىنعان ازاماتتار ودان ەشبىر قۇجات سۇراپ كورمەگەن.
پاۆلودار وبلىسى
