ءدارىستىڭ القيسساسىندا ايتىلعانداي, جيىن «تازا قازاقستان» ەكولوگيالىق اكتسياسى اياسىندا ءوتىپ جاتقان كەزەكتى ءىس-شارالاردىڭ ءبىرى بولاتىن. نەگىزگى دىتتەگەن ماقسات – كەلەشەك جاستارعا قورشاعان ورتانى قورعاۋ, ونى ۇنەمى تازا ۇستاپ, ۇقىپتى قاراۋ ءتارىزدى قاراپايىم قاعيداعا ارنالعان ەدى. بىراق جاستاردى دا, ءتىپتى ءبىزدى دە قىزىقتىرىپ قويعانى – لەكتوردىڭ «بۇگىن ءبىز ورمان دۇنيەسىنىڭ قىر-سىرىن ايتامىز» دەگەنى-تۇعىن.
اۋەلى «سەمەي ورمانى» تابيعي رەزەرۆاتىنىڭ ماماندارى ستۋدەنتتەرگە ورمان القاپتارىن ساقتاۋ, ورتتەن قورعاۋ ياكي قالپىنا كەلتىرۋ, قاۋىپتەردىڭ الدىن الۋ جونىندە جان-جاقتى تۇسىندىرمە بەردى. دارىستە قورشاعان ورتانى قورعاۋدىڭ زاماناۋي جاڭا تاسىلدەرى, ورمان ەكوجۇيەسىن قالپىنا كەلتىرۋدىڭ عىلىمي جەتىستىكتەرى, سونداي-اق تابيعاتقا جاۋاپكەرشىلىكپەن قاراۋدىڭ تاجىريبەلەرى ايتىلدى. ەركىن فورماتتا وتكەن دارىستە ماماندار ستۋدەنتتەردىڭ دە سۇراقتارىنا ىركىلىسسىز جاۋاپ بەرىپ, ورمان شارۋاشىلىعىنداعى كاسىبي قىزمەتتىڭ قىر-سىرىن اشىپ كورسەتتى.
ءوز كەزەگىندە, «سەمەي ورمانى» تابيعي رەزەرۆاتىنىڭ ورمان ءوسىرۋ ينجەنەرى ايدانا سابىرجان وڭىردەگى ەكولوگيالىق باستامالار تۋرالى ايتىپ بەردى. ستۋدەنتتەر ءۇشىن مامانداردان تىكەلەي اقپارات الۋ ۇلكەن تاجىريبە بولدى. ولار ورمان شارۋاشىلىعىندا قىزمەت ەتۋدىڭ ەرەكشەلىكتەرى, ەكولوگيالىق قاۋىپتەردىڭ الدىن الۋ ءىس-قيمىلدارى جانە تابيعاتتى قالپىنا كەلتىرۋ جۇمىستارى جونىندە سۇراقتارىنا جاۋاپ الدى.
«ورمان شەبەرى» ماماندىعىندا ءبىلىم الىپ جاتقان ستۋدەنت اقەركە تالعات ءدارىستىڭ ستۋدەنتتەر ءۇشىن اسا ماڭىزدى بولعانىن ايتتى.
«ەكولوگيانى تەك كىتاپتان وقۋ باسقا, ال ونى كۇندەلىكتى قورعاپ جۇرگەن مامانداردان تىڭداۋ مۇلدەم بولەك دەڭگەي. وسىنداي ءىس-شارالاردى ءجيى وتكىزىپ تۇرعان ءجون, سەبەبى بۇل ورماننىڭ «دەنساۋلىعى» مەن سانيتارلىق جاعدايىن جاقسارتۋعا ىقپال ەتەدى. بۇگىن كوشەت وتىرعىزۋ كورسەتكىشتەرىنىڭ ءوسىپ جاتقانىن ءبىلدىم. بولاشاقتا وسى سالادا ءوزىمدى سىناپ كورگىم كەلەدى. ەكولوگياعا ءوز ۇلەسىمدى قوسا الامىن دەپ سەنەمىن», دەدى اقەركە تالعات.
كوللەدج بەن «سەمەي ورمانى» رەزەرۆاتى اراسىنداعى سەرىكتەستىك اياسىندا الداعى ۋاقىتتا دا ەكولوگيالىق باعىتتاعى لەكتسيالار, پراكتيكالىق كەزدەسۋلەر جانە ستۋدەنتتەردىڭ تابيعات قورعاۋ ءىس-شارالارىنا قاتىسۋ مۇمكىندىكتەرى قاراستىرىلماق.
ءىس-شارا ۇيىمداستىرۋشىلارىنىڭ ايتۋىنشا, مۇنداي كەزدەسۋلەر جاستاردىڭ تابيعاتقا دەگەن سانالى كوزقاراسىن قالىپتاستىرۋعا جانە «تازا قازاقستان» باعدارلاماسىنىڭ وڭىردە ءتيىمدى جۇزەگە اسۋىنا ءوز ۇلەسىن قوسپاق. جيىن سوڭىندا مامانداردان «سەمەي ورمانى» رەزەرۆاتىندا ارقارىلىپ جاتقان جۇمىستاردىڭ جاي-جاپسارىن سۇراپ كوردىك.
«سەمەي ورمانى» رەزەرۆاتىندا «تازا قازاقستان» اكتسياسى وتە ۇلكەن اۋماقتا جانە كەشەندى تۇردە جۇرگىزىلەدى. جوعارىدا ايتىلعانداي, ءبىز ءتيىستى مەكەمەلەرمەن بىرلەسە وتىرىپ, كوشەت وتىرعىزۋ, قۇستارعا ۇيالار سالۋ, اۋماقتاردى قوقىستان تازارتۋ سياقتى ەكولوگيالىق جۇمىستاردى اتقارىپ كەلەمىز. 2025 جىلى «سەمەي ورمانى» اۋماعىندا كوشەت وتىرعىزۋ جۇمىستارى كەڭ كولەمدە جۇرگىزىلدى. كوكتەمدە قاراعاي كوشەتتەرى وتىرعىزعان, جالپى 4 810 گەكتار القاپ قامتىلدى. كۇزگى ماۋسىمدا 475 گەكتار اۋماققا جابىق تامىرلى كوشەت وتىرعىزىلدى. جالپى ەسەپپەن العاندا, ءبىر جىل ىشىندە 2 ملن-نان استام كوشەت وتىرعىزىلدى. «سەمەي ورمانى» رەزەرۆاتىنىڭ باستى مىندەتتەرىنىڭ ءبىرى – مەملەكەت باسشىسىنىڭ اباي وبلىسىندا 2021-2027 جىلدار ارالىعىندا 2 ملرد كوشەت وتىرعىزۋ جونىندەگى تاپسىرماسىن جۇيەلى تۇردە ورىنداۋ. وسى باعىتتا ۇزدىكسىز جۇمىس اتقارىلىپ كەلەدى. قازىرگى ۋاقىتتا رەزەرۆات اۋماعىندا 21 مىڭ گەكتاردان استام جەرگە 100 ملن-نان ارتىق كوشەت وتىرعىزىلدى. سوندىقتان «تازا قازاقستان» تەك ءبىر رەتتىك اكتسيا ەمەس, بۇل – ءار ازاماتتىڭ تابيعاتقا دەگەن جاۋاپكەرشىلىگىن كۇشەيتۋگە باعىتتالعان ۇزاق مەرزىمدى مادەني قالىپ. ورمان – ءبىزدىڭ ورتاق بايلىعىمىز, سوندىقتان ونى قورعاۋ ءار بۋىننىڭ مىندەتى», دەدى ايدانا سابىرجان.
اباي وبلىسى
