وبلىس اكىمدىگىنىڭ مالىمەتىنشە, جەلتوقسان ايىندا «تالدىقورعان – قالباتاۋ – وسكەمەن» كۇرە جولىنىڭ 309 شاقىرىمى قابىلدانىپ, قىزمەت كورسەتىلەتىن جولدىڭ ۇزىندىعى 2 002 شاقىرىمعا دەيىن ارتادى. ال وبلىس اۋماعىندا قار باسۋ قاۋپى بار 51,3 شاقىرىم ۋچاسكە انىقتالعان. وعان تاۋلىك بويى پاترۋلدىك كەزەكشىلىك ۇيىمداستىرىلماق.
«وبلىستىق ماڭىزى بار اۆتوموبيل جولدارىنىڭ جالپى ۇزىندىعى 1 593 شاقىرىم, 22 ۋچاسكەدەن تۇرادى. قىسقا قاجەتتى ماتەريالدار مەن 98 تەحنيكا دايىندالعان. توتەنشە جاعدايلار كەزىندە جەدەل شارالار قابىلداۋ ءۇشىن جوعارى وتىمدىلىگى بار تەحنيكالار, 7 جىلىتۋ پۋنكتى, قوسىمشا 91 جىلىتۋ ورنى قاراستىرىلعان», دەيدى وبلىس اكىمدىگىنىڭ ءباسپاسوز قىزمەتى.
رەسپۋبليكالىق ماڭىزى بار جولداردى كۇتىپ ۇستاۋ ساپاسىن ارتتىرۋ ماقساتىندا كوكتايعاققا ارنالعان جەتى جاڭا انگار-بازا سالىنعان. ولار سەمەي, اياگوز قالالارى, ارشالى, قالباتاۋ, ءۇرجار, قىزىلكەسىك جانە بەسقاراعاي ەلدى مەكەندەرىندە ورنالاسقان.
وبلىس اكىمى بەرىك ءۋاليدىڭ توراعالىعىمەن وتكەن كەڭەيتىلگەن اپپاراتتىق كەڭەستە دە ءوڭىردىڭ اۆتوموبيل جولدارىنىڭ قىسقى مەرزىمگە دايىندىعى قارالدى. جيىن بارىسىندا ءوڭىر باسشىسى سالاعا جاۋاپتى ورىنباسارى سەرىك تولەنبەرگەنوۆكە, اۋدان, قالا اكىمدەرىنە وبلىستىق جانە رەسپۋبليكالىق ماڭىزى بار جولداردى قىسقى كۇتىپ ۇستاۋ ءۇشىن تەحنيكانىڭ جەتكىلىكتىلىگىنە تولىق تالداۋ جۇرگىزۋدى, قار باسۋ قاۋپى جوعارى جەرلەرگە قوسىمشا تەحنيكا بەكىتىپ, تاۋلىك بويى پاترۋلدىك قىزمەتتى ۇيىمداستىرۋدى تاپسىردى. سونىمەن قاتار وڭىردەگى جىلىتۋ جانە تاماقتاندىرۋ پۋنكتتەرىنە باسا نازار اۋدارىپ, ءتيىستى باسقارمالارعا الداعى قىس مەزگىلىندە جەدەل جاردەم, ءورت جانە باسقا قىزمەتتەردىڭ جۇمىسىنا توسقاۋىل بولاتىن جاعدايدىڭ بارلىعىن ۋاقتىلى جويۋدى قاتاڭ باقىلاۋعا الۋ قاجەتتىگىن ايتتى.
«ۇسىنىلعان باياندامالار قىسقا دايىندىقتىڭ جۇيەلى تۇردە جۇرگىزىلىپ جاتقانىن, جول-كولىك قاۋىپسىزدىگىن قامتاماسىز ەتۋ ءىس-شارالارىنىڭ ناقتى تيىمدىلىگىن كورسەتىپ وتىر. دەگەنمەن تەحنيكالىق جابدىقتاۋ, قار باسۋ قاۋپى جوعارى ۋچاسكەلەردەگى قاۋىپتەر, جىلىتۋ مەن تاماقتاندىرۋ پۋنكتتەرىنىڭ قارجىلاندىرىلۋى سياقتى ماسەلەلەردە ناقتى باقىلاۋ قاجەت. بارلىق ءتيىستى قۇرىلىمداردىڭ ۇيلەسىمدى جانە ۋاقتىلى ارەكەتى قىس مەزگىلىندەگى قاۋىپسىزدىكتىڭ باستى كەپىلى», دەدى وبلىس اكىمى.
قازىر وڭىردە قىسقا دايىندىق شەڭبەرىندە 3 100 مەتر قار توقتا-تۋ قالقاندارى ورناتىلىپ, 303 ۋاقىتشا جول بەلگىسى قويىلدى.
اباي وبلىسى
