بۇل فوتوسۋرەتتى كوكپەكتى اۋداندىق ولكەتانۋ مۋزەيىنەن كورىپ قالدىق. ادەتتە مۇنداي پاتشا زامانىنداعى كونە سۋرەتتەگى دالا شونجارلارىنىڭ اتى-ءجونى تولىقتاي انىقتالماي جاتاتىن. ال مۇندا ءبارى ناقتى جازىلىپتى.
سولدان وڭعا قاراي ءبىرىنشى قاتاردا: بولىستىڭ ۇلى ىبىراي ساتتىباەۆ, سۇلتان ءارى بولىس جەڭىس يبراگيموۆ, كوكپەكتى ورىس-قازاق مەكتەبىنىڭ وقۋشىسى تاشكەنباي جۇقىشەۆ, نايمان-سارجومارتتىڭ اعا سۇلتانى ءاليحان تىلەۋبەرديننىڭ (وبەر-وفيتسەر) ۇلى يسلام ءاليحانوۆ, بي جاعىباي دولانوۆ بەينەلەنگەن. ەكىنشى قاتاردا: وسكەمەن ۋەزى باستىعىنىڭ كىشى كومەكشىسى, حورۋنجي قۇلەكە شىڭعىسوۆ, تارباعاتاي بولىسى بۇتابايدىڭ جىبەرگەن ادامى بوتاباي سەگىزباەۆ, تارباعاتاي ەلىنىڭ جاقسىسى توگىس شايانباەۆ, كەندىرلىك بولىسىنان شىققان تورە جانسۇلتان جامانتاەۆ, تورە مۇقامەدسۇلتان دايىروۆ, زايسان پريستاۆى مايور تيحونوۆ, سونداي-اق قاراكەرەي قوجامبەت رۋىنىڭ ءبيى قوجامجار جايىقوۆ وتىر. ءۇشىنشى قاتاردا: ءتىلماش ەساۋل ۆلاسوۆ, ءتورتۋىل قارا ەرتىس ەلىنىڭ بولىسى ءماز بوقاتوۆ, بولىس دوسقان مايكوتوۆ, شىلىكتى بولىسىنىڭ ءبيى ءماجيت مونكين, پاتشا اكىمشىلىگىنىڭ شەنەۋنىگى كراسيلنيكوۆ, كوكپەكتى ورىس-قازاق مەكتەبىنىڭ وقۋشىسى بيلەۋشى بوسقىنباەۆ, ارعاناتى بولىستىعىنا كانديدات مىرزاحان مونتين بار.
سۋرەت پاتشالىق رەسەيدىڭ ورتالىعى سانكت-پەتەربۋرگ قالاسىندا 1873 جىلدىڭ قاڭتار ايىندا تۇسىرىلگەن. تۇسىرگەن – فوتوگراف لورەنتس.
تاريحشىلاردىڭ مالىمەتىنشە, سەمەي گۋبەرنياسىنىڭ اۋماعىنداعى زايسان, تارباعاتاي, كوكپەكتى وڭىرلەرىنەن 18 ادامنان تۇراتىن دەلەگاتسيا 1873 جىلدىڭ قاڭتارىندا سانكت-پەتەربۋرگكە بارىپ, يمپەراتور II الەكساندر قابىلداۋىندا بولادى. ءبىر قىزىعى, بارىن كيىنىپ, باقانىن قولىنا ۇستاپ بارعان دالا شونجارلارىنىڭ كيىم كيىسى, ءجۇرىس-تۇرىسى پەتەربۋرگ جۇرتشىلىعىن تاڭداندىرعان كورىنەدى. ءسويتىپ, بۇل ساپار حاندىق بيلىكتىڭ دەربەستىگى جويىلعاننان كەيىنگى قازاق ەليتاسىنىڭ پاتشا وكىمەتىنىڭ ساياسي جۇيەسىنە بەيىمدەلۋ كەزەڭىنىڭ ءبىر بەلگىسى بولىپ تاسپالانعان.
اباي وبلىسى
