وكق بريفينگى بارىسىندا اۋدان اكىمىنىڭ مىندەتىن اتقارۋشى جانات جۇنىسبەكوۆتىڭ ايتۋىنشا, اۋداندا «Alacem» تسەمەنت زاۋىتىن قوسا العاندا 9 ونەركاسىپ ورنى جۇمىس ىستەيدى. «Alacem» اۋدان ونەركاسىبىنىڭ 87,6%-ىن قامتاماسىز ەتىپ, 10 ايدا 1,2 ملن توننا تسەمەنت وندىرگەن. «جولامان قيىرشىق تاس زاۋىتى» 807 ملن تەڭگەنىڭ ءونىمىن شىعارىپ, ءوندىرىس كولەمىن 44,1%-عا ارتتىردى. ال مامىردا ىسكە قوسىلعان «تەحارەندا» جشس 77,3 ملن تەڭگەنىڭ بەتونىن ءوندىردى.
ج.جۇنىسبەكوۆتىڭ ايتۋىنشا, ونەركاسىپ ءوسىمى – بيزنەسكە قولايلى جاعداي مەن جاڭا جوبالاردى ىسكە اسىرۋدىڭ ناتيجەسى.
2026–2028 جىلدارعا ارنالعان ينۆەستيتسيالىق پۋلعا جالپى قۇنى 1,4 ترلن تەڭگە بولاتىن 9 جوبا ەنگىزىلگەن. ولار ىسكە اسقاندا 2500-دەن اسا ادام جۇمىسپەن قامتىلادى. ەڭ ءىرى جوبا – «شوعىرلاندىرىلعان قۇرىلىس تاۋ-كەن كومپانياسى» جشس: جىلىنا 50 ملن توننا رۋدا وڭدەپ, 860 مىڭ توننا مىس كونتسەنتراتىن جانە 5 مىڭ توننا مىس كاتودىن شىعارماق. جوبانىڭ قۇنى – 1,3 ترلن تەڭگە, 2200 جاڭا جۇمىس ورنى اشىلادى.
سونىمەن قاتار 2027 جىلى جىلدىق قۋاتى 110 مىڭ توننا سۇيىتىلعان تابيعي گاز وندىرەتىن «Qazaq LNG Almaty» زاۋىتى ىسكە قوسىلادى. تىكەلەي شەتەلدىك ينۆەستيتسيا كولەمى – شامامەن 70 ملن اقش دوللارى. قۇرىلىس كەزىندە 300, جۇمىس بارىسىندا 70 ادام ەڭبەكپەن قامتىلادى. بۇعان قوسا كۇن ەلەكتر ستانتسياسى, مال بورداقىلاۋ الاڭى, اكتاس جانە اسفالت زاۋىتتارىنىڭ جوبالارى قاراستىرىلعان.
تۋريزم دە قارقىن الىپ كەلەدى: بيىلعى جارتىجىلدىقتا كەلۋشىلەر سانى مەن كورسەتىلگەن قىزمەت كولەمى ەكى ەسە ارتتى. «التىنەمەل» ۇلتتىق پاركىنە 10 ايدا 31,3 مىڭ تۋريست كەلگەن.
اۋدان باسشىلىعى ينۆەستيتسيا تارتۋدى ءارى قاراي دا باستى باسىمدىق رەتىندە جالعاستىرا بەرەتىنىن جەتكىزدى.
