حاكاتونعا قازاق ءتىلىن ۇيرەتۋگە ارنالعان پلاتفورمالار, جاساندى ينتەللەكت نەگىزىندەگى چات-بوتتار, ويىندار مەن ءموبيلدى قوسىمشالار باعىتىندا ءوز جوبالارىن قورعاعان ءبىلىم-يننوۆاتسيا ليتسەيى, نازارباەۆ زياتكەرلىك مەكتەبىنىڭ 10, 11, 12-سىنىپ وقۋشىلارىنان, ۇستازدارىنان, جوو ستۋدەنتتەرىنەن, IT ماماندارىنان قۇرالعان 11 كوماندا قاتىستى.
– بۇل حاكاتون – قازاق ءتىلىن تسيفرلىق كەڭىستىكتە دامىتۋدىڭ ناقتى قادامدارىنىڭ ءبىرى. ءبىز بۇگىنگى ءىس-شارادا كورگەن جوبالار تەك تەحنولوگيالىق جاڭالىق ەمەس, سونىمەن قاتار قازاق مادەنيەتى مەن ءداستۇرىن جاڭا فورمادا تانىستىرۋدىڭ ءبىر ءتاسىلى. ءاربىر كوماندانىڭ جۇمىسى – قازاق ءتىلىنىڭ زاماناۋي كونتەكستە قالاي ءومىر سۇرە الاتىنىن كورسەتەتىن تاجىريبە. مىسالى, جاساندى ينتەللەكت نەگىزىندەگى چات-بوتتار نەمەسە ءموبيلدى قوسىمشالار ارقىلى بالالار مەن ەرەسەكتەر قازاق ءتىلىن قىزىقتى ءارى ءتيىمدى ۇيرەنە الادى. بۇگىنگى قاتىسۋشىلاردىڭ شىعارماشىلىق ويى, جاڭا تەحنولوگيانى قولدانۋ شەبەرلىگى جانە مادەني قۇندىلىققا دەگەن قۇرمەتى – ۇلتتىڭ رۋحاني كودىن ساقتاي وتىرىپ, ونى تسيفرلىق داۋىرگە بەيىمدەۋدىڭ كورىنىسى. حاكاتون بارىسىندا جوبالاردى باعالاۋ عانا ەمەس, يدەيالاردىڭ قوعامعا اسەر ەتۋ الەۋەتىن, ولاردى ناقتى ىسكە اسىرۋ مۇمكىندىگىن دە قاراستىردىق. بۇل – جاڭا باستامالار مەن كرەاتيۆتى شەشىمدەردىڭ شىنايى جارىس الاڭى, ءارى جاس ۇرپاققا ءوز قابىلەتتەرىن كورسەتۋگە, تاجىريبە جيناۋعا مۇمكىندىك بەرەدى. وسىنداي جوبالاردىڭ ارقاسىندا قازاق ءتىلىن ۇيرەنۋدى تەك مىندەتتى ءىس رەتىندە ەمەس, قىزىقتى ءارى تارتىمدى ۇدەرىس رەتىندە ۇسىنامىز. جاس كوماندا مۇشەلەرى ءوز يدەيالارىن قورعاپ, تەحنيكالىق شەشىمدەرىن كورسەتۋ ارقىلى ءبىلىم مەن يننوۆاتسيانىڭ ۇندەستىگىن دالەلدەدى. ءاربىر جوبا قازاق مادەنيەتىن جاڭا قىرىنان اشىپ, ونى زاماناۋي تەحنولوگيالارمەن ۇشتاستىرۋعا باعىتتالعان. بولاشاقتا بۇل باستاما وبلىس دەڭگەيىندە عانا ەمەس, رەسپۋبليكالىق ماسشتابتا دا كەڭەيىپ, قازاق ءتىلىن تسيفرلىق ورتادا كەڭىنەن ناسيحاتتاۋعا جول اشادى, – دەيدى وبلىستىق لينگۆيستيكالىق ورتالىعىنىڭ ديرەكتورى قۋاندىق كەنجەبەك ۇلى.
قاتىسۋشىلاردىڭ جۇمىستارىن كاسىبي ءتىل ماماندارى مەن IT سالاسىنىڭ وكىلدەرىنەن قۇرالعان قازىلار مەن ساراپشىلار توبى جوبا يدەياسى مەن تەحنيكالىق ىسكە اسىرۋ مۇمكىندىگى نەگىزىندە باعالادى. سونىمەن حاكاتون قورىتىندىسىندا 1-ورىندى Brutal Fairies كومانداسى ء(ادىلحان اليشەر, نۇرداۋلەت اناربەكوۆ, مەداحمەت اسىلمۇرات), 2-ورىندى COR كومانداسى (نيازبەك ەلنار, ءاليا تولىمحانوۆا, راحىم رايىم ۇلى, اياجان تاڭىربەردى), 3-ورىندى Anyz Game كومانداسى ء(ادىل قايرات ۇلى, ميراس الماس ۇلى, راۆيل مارات ۇلى, اقبوتا نۇرعاليەۆا) يەلەندى. ال باس جۇلدە رۋحAI كومانداسىنا (ەركەجان سەرىكقاليەۆا, ماقسات جەتەنباەۆ, ەركەبۇلان ماراتوۆ, روللان سارسەمباەۆ) تابىستالدى. ءى, ءىى, ءىىى ورىن يەگەرلەرى Home Credit Bank دەمەۋشىلىگىمەن اقشالاي سىيلىقتارعا يە بولدى. گران-پري يەگەرلەرى قازاق ءتىلىنىڭ دامۋىنا باعىتتالعان جوبانى جۇزەگە اسىرۋ ءۇشىن اباي وبلىسىنىڭ لينگۆيستيكالىق ورتالىعىمەن ىنتىماقتاستىق كەلىسىمشارتقا قول قويادى. بارلىق جەڭىمپاز رەسپۋبليكالىق «تاربيە باسى – تال بەسىك» فورۋمىنا قاتىسىپ, عىلىم جانە جوعارى ءبىلىم مينيسترلىگىنىڭ ءتىل ساياساتى كوميتەتى, «حالىقارالىق قازاق ءتىلى قوعامى» جانە ش. شاياحمەتوۆ اتىنداعى ء«تىل-قازىنا» ورتالىعى وكىلدەرىمەن كەزدەسەدى دەپ جوسپارلانىپ وتىر. وسىلايشا, جۇلدەلى ورىن يەگەرلەرى الداعى ۋاقىتقا جوسپارلانعان رەسپۋبليكالىق فورۋمدا ءوز جوبالارىن تانىستىراتىن بولدى.
اباي وبلىسى
