توكيوداعى جارىستا سۋردو دزيۋدودان حامزا عۇلاما (-66 كگ), شاديار قۋاندىق (-73 كگ), ەركەبۇلان قانافين (-81 كگ) جانە ءامينا فايزۋلينا (-70 كگ) التىن مەدال جەڭىپ السا, ايداربەك توقتاربەك (-100 كگ) كۇمىس جۇلدەگەر اتاندى. ال سابىرجان حاپيزوۆ (+100 كگ), التىنبەك كاكىتاەۆ (-60 كگ), ايىم جەتپىسباەۆا (-48 كگ) جانە اننا كارموروۆا (-78 كگ) قولا مەدال يەلەندى.
بۇگىن قازاقستاننىڭ ەرلەر كومانداسى دزيۋدودان كوماندالىق جارىستا جەڭىمپاز اتانسا, ايەلدەر قۇراماسى كۇمىس جۇلدەگە قول جەتكىزدى.
سۋردو جەڭىل اتلەتيكا سايىسىندا فاينا مەيىرمانوۆا بيىكتىككە سەكىرۋدەن 1.79 مەتر ناتيجەمەن سۋردليمپيادا رەكوردىن جاڭارتىپ, چەمپيون اتاندى. سونداي-اق ونسايىس بويىنشا نۇرسۇلتان كۇلدەەۆ 5 725 ۇپاي جيناپ, قولا مەدال ەنشىلەدى.
ەسكە سالا كەتەيىك, بيىلعى سۋردليمپيادا 15-26 قاراشا كۇندەرى جاپونيانىڭ توكيو قالاسىندا ءوتىپ جاتىر. بۇل – ءتورت جىلدا ءبىر رەت ۇيىمداستىرىلاتىن ەستۋ قابىلەتى بۇزىلعان سپورتشىلار اراسىنداعى ەڭ بەدەلدى حالىقارالىق دودا. بايراقتى باسەكەدە 81 ەلدەن كەلگەن 3 000-عا جۋىق سپورتشى 21 سپورت ءتۇرى بويىنشا 209 ديستسيپلينادا جۇلدەلەردى ساراپقا سالىپ جاتىر. قازاقستان قۇراماسىنان 78 سپورتشى 8 سپورت ءتۇرى بويىنشا باق سىناۋدا.
بۇعان دەيىن الماتىداعى وليمپياداعا دايارلىق ورتالىعىندا قازاقستان ۇلتتىق قۇراماسىن سۋردليمپياداعا شىعارىپ سالۋ ءراسىمى وتكەن بولاتىن. ءىس-شاراعا تۋريزم جانە سپورت ءمينيسترى ەربول مىرزابوسىنوۆ پەن ۇلتتىق سۋردليمپيادا كوميتەتىنىڭ پرەزيدەنتى سەرىك ساپيەۆ قاتىستى.
سالتاناتتى ءراسىم بارىسىندا مينيستر ۇلتتىق قۇراماعا قازاقستاننىڭ مەملەكەتتىك تۋىن تاپسىرىپ, سپورتشىلارعا ساتتىلىك پەن جارقىن جەڭىستەر تىلەدى.
ايتا كەتەيىك, بۇگىندە ەلىمىزدە سپورتشىلاردىڭ كاسىبي دايىندالۋىنا جان-جاقتى جاعداي جاسالعان. 2029 جىلعا دەيىن 113 جاڭا سپورت نىسانىن سالۋ جانە 26 نىساندى قايتا جاڭارتۋ جوسپارلانعان. الماتى وبلىسىنداعى زاماناۋي رەسپۋبليكالىق وليمپياداعا دايارلىق ورتالىعىندا ءبىر مەزەتتە 2 300 سپورتشى وليمپيادا جانە سۋردليمپيادا سپورت تۇرلەرى بويىنشا جاتتىعا الادى. سونداي-اق «100 جىلدام سالىناتىن ءمودۋلدى سپورت نىسانى» جوباسى قارقىندى جۇزەگە اسۋدا. كەيىنگى ءبىر جىلدا وڭىرلەردە 25 جاڭا سپورت كەشەنى پايدالانۋعا بەرىلدى.
