بۇگىندە «Semei» تەلەارناسى تاۋلىگىنە 14 ساعات حابار تاراتادى. كورەرمەنگە 30-عا جۋىق اۆتورلىق باعدارلاما ۇسىنادى. جاڭالىقتار قىزمەتى كۇنىنە بەس رەت ەفيرگە شىعادى. اقپاراتتىق كەڭىستىكتە ارنا جۇمىسىن جاڭا دەڭگەيگە كوتەرۋ ماقساتىندا «Digital Semei» شىعارماشىلىق ءبولىمى اشىلىپ, جاڭا مەديانى دامىتۋ ءىسى باستالدى.
تەلەارنا العاش رەت قىتاي حالىق رەسپۋبليكاسىنان تىكەلەي اقپارات تاراتىپ, حالىقارالىق دەڭگەيدە ەفيرگە شىقتى. ۇلى ابايدىڭ 180 جىلدىق مەرەيتويى كەزىندە ارنا تىكەلەي ەفير ارقىلى جانە الەۋمەتتىك جەلىلەردە جەدەل اقپارات تاراتتى. سونىمەن قاتار بيىل كوپتەگەن دەرەكتى فيلم مەن «تازا قازاقستان» باعدارلاماسىنا بايلانىستى تاربيەلىك ءمانى بار بەينەروليكتەر ءتۇسىرىلدى. تەلەارنانىڭ مەرەيتويى اياسىندا سەمەي قالاسىنداعى ءبىر كوشەگە بەلگىلى ديكتور, قازاقستاننىڭ حالىق ءارتىسى انۋاربەك بايجانباەۆتىڭ ەسىمى بەرىلدى.
ءوڭىردىڭ ايناسىنا اينالعان تەلەارنانىڭ 60 جىلدىعىنا ارنالعان سالتاناتتى ءىس-شارا اباي اتىنداعى وبلىستىق كىتاپحانادا ءوتتى. وعان وبلىس اكىمى بەرىك ءۋالي, «Qazaqstan» ۇلتتىق تەلەارناسىنىڭ ديرەكتورى, بەلگىلى جۋرناليست بولات ءمۇرسالىم جانە ارداگەر جۋرناليستەرمەن قاتار قالانىڭ زيالى قاۋىم وكىلدەرى قاتىستى. جيىندا ءوڭىر باسشىسى تەلەارنا ۇجىمىن مەرەيلى مەرەيتويمەن قۇتتىقتادى.
«الپىس جىل – تەك ءبىر ۇجىمنىڭ عانا ەمەس, تۇتاس ءوڭىردىڭ تاريحىنا اينالعان زور بەلەس. ۋاقىتتىڭ سىنىنان وتكەن, ۇلتتىڭ ءۇنىن جەتكىزگەن رۋحاني ارنانىڭ مەرەكەسى. مەملەكەت باسشىسى قاسىم-جومارت توقاەۆتىڭ: «تۇپتەپ كەلگەندە, مەملەكەت تە, جۋرناليست تە ۇلت ءۇشىن قىزمەت ەتەدى, ەل تاعدىرىن شەشۋگە اتسالىسادى. ويتكەنى ۇلت ءباسپاسوزى مەن ۇلت مۇددەسى قاي كەزدە دە وزەكتەس بولعان. قازىر دە سولاي» دەگەن ءسوزى سەمەي تەلەارناسىنىڭ جولىنا, رۋحىنا ءدوپ كەلەدى. سول العاشقى حابارلاردان باستاپ بۇگىنگە دەيىن حالىقتىڭ ءۇمىتىن, ەلدىڭ تىنىسىن جەتكىزدى. ەل ءۇشىن جاڭا ءداۋىردىڭ باستاۋى بولدى. سول كەزدەن بەرى سەمەي تەلەارناسى – ۋاقىتتىڭ كۋاسى, ەلدىڭ ايناسى, رۋحتىڭ مىنبەرى بولىپ كەلەدى. بۇگىنگى مەرەيتوي – وتكەنگە تاعزىم, بولاشاققا سەنىم سىيلايدى! الپىسجىلدىق ابىرويلى تاريح ەل مەن ەلدى, ۇرپاق پەن ۇلتتى جالعاعان التىن كوپىر! «Semei» تەلەارناسى – سەمەيدىڭ ءۇنى, اباي ەلىنىڭ رۋحى!», دەدى وبلىس اكىمى.
جيىندا تەلەارنانىڭ ارداگەرلەرى مەن قىزمەتكەرلەرىنە مەرەيتويلىق ماراپات تابىستالدى. ءوڭىر باسشىسى سالتاناتتى كەشتە تەلەارنا ۇجىمىنا وبلىس جۇرتشىلىعى اتىنان اۆتوكولىكتىڭ كىلتىن تابىس ەتتى.
اباي وبلىسى
