فوتو: جوعارعى سوت
قايعىلى جول اپاتىنا بايلانىستى قىلمىستىق ءىس اباي وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىنا تۇسكەن. قازىرگى تاڭدا ماتەريالدار الدىن الا تىڭداۋ كەزەڭىندە قارالىپ جاتىر.
سوتتىڭ ءباسپاسوز قىزمەتى نەگىزگى وتىرىستاردىڭ ۋاقىتى ءالى بەلگىلەنبەگەنىن حابارلادى.
الدىن الا تىڭداۋ بارىسىندا ءىستىڭ ماتەريالدارى ەگجەي-تەگجەيلى زەرتتەلىپ, تاراپتاردىڭ ءتىزىمى ناقتىلانادى ءارى ءىستى ءمانى بويىنشا قاراۋعا دايىندىق جۇرگىزىلەدى. الداعى سوت وتىرىستارىنىڭ كەستەسى بەكىتىلگەننەن كەيىن قوسىمشا اقپارات ۇسىنىلادى.
ەستەرىڭىزگە سالا كەتەيىك, قايعىلى جاعداي 19 تامىز كۇنى بولعان ەدى. كۇدىكتى جۇرگىزۋشى ۇستالىپ, ۋاقىتشا ۇستاۋ يزولياتورىنا قامالدى.
سونىمەن قاتار قازان ايىندا بەستەرەك اۋىلىندا وسى اپاتتان اۋىر جاراقات العان قىزدىڭ اۋرۋحانادا كوز جۇمعانى بەلگىلى بولدى.
