سەرىك سارسەمباي ۇلى فۋتبولداعى جولىن «شاحتيور» كلۋبىنىڭ دايىندىق توبىندا باستاعان. 1965 جىلدان باستاپ كوماندانىڭ قوسالقى قۇرامىندا ويناپ, كەلەسى جىلى «ا» كلاسسىنىڭ ەكىنشى توبىمەن ءۇش ماتچقا قاتىسىپ, ءبىر گول سوققان. 1967-1970 جىلدارى تەمىرتاۋدىڭ «مەتاللۋرگ» / «سترويتەل» كوماندالارىندا ونەر كورسەتتى. 1973-1975 جىلدارى قايتا «شاحتيور» ساپىنا ورالىپ, قورعانىس شەبىندە ويىنشى رەتىندە كارەراسىن ءتامامدادى.
باپكەرلىك جولىندا دا بەردالين ايتۋلى تابىستارعا جەتتى. ول 1995 جىلى «شاحتيوردى», 1998 جىلى «ەرتىستى» قازاقستان چەمپيوناتىنىڭ قولا جۇلدەگەرى اتاندىرعان.
«سەرىك سارسەمباي ۇلى شاكىرتتەرىنە سەنىم سىيلايتىن, دەم بەرەتىن جان ەدى. ونىڭ «شاحتيور» كلۋبىنا سىڭىرگەن ەڭبەگى ەلىمىزدىڭ سپورت تاريحىندا ماڭگى قالادى», دەدى «شاحتەر» كومانداسىنىڭ ءباسپاسوز قىزمەتى.
