دەرەكتەرگە سۇيەنسەك, 1965 جىلدىڭ 1 قىركۇيەگىندە سەمەي تەلەستۋدياسىنىڭ العاشقى رەسمي حابارى ەفيرگە شىقتى. بۇل رەسپۋبليكاداعى الماتى, قاراعاندى, وسكەمەن, اقتوبە تەلەۆيزيالىق ستۋديالارىنان كەيىنگى بەسىنشى, كەڭەس وداعى بويىنشا 116 ستۋديا ەكەن.
بۇگىندە «SEMEI» تەلەارناسى تاۋلىگىنە 14 ساعات حابار تاراتادى. كورەرمەنگە 30-عا جۋىق اۆتورلىق باعدارلاما ۇسىنادى. جاڭالىقتار قىزمەتى كۇنىنە بەس رەت ەفيرگە شىعادى. اقپاراتتىق كەڭىستىكتە ارنا جۇمىسىن جاڭا دەڭگەيگە كوتەرۋ ماقساتىندا «Digital SEMEI» شىعارماشىلىق ءبولىمى اشىلىپ, جاڭا مەديانى دامىتۋ ءىسى باستالدى.
تەلەارنا العاش رەت قىتاي حالىق رەسپۋبليكاسىنان تىكەلەي اقپارات تاراتىپ, حالىقارالىق دەڭگەيدە ەفيرگە شىقتى. ۇلى ابايدىڭ 180 جىلدىق مەرەيتويى كەزىندە ارنا تىكەلەي ەفير ارقىلى جانە الەۋمەتتىك جەلىلەردە جەدەل اقپارات تاراتتى. سونىمەن قاتار, بيىل كوپتەگەن دەرەكتى فيلم مەن «تازا قازاقستان» باعدارلاماسىنا بايلانىستى تاربيەلىك ءمانى بار بەينەروليكتەر ءتۇسىرىلدى. تەلەارنانىڭ مەرەيتويى اياسىندا سەمەي قالاسىنداعى ءبىر كوشەگە قازاقتىڭ «لەۆيتانى» اتانعان راديو جۇرگىزۋشىسى, ديكتور, قازاقستاننىڭ حالىق ءارتىسى انۋاربەك بايجانباەۆتىڭ ەسىمى بەرىلدى.
ءوڭىردىڭ ايناسىنا اينالعان تەلەارنانىڭ 60 جىلدىعىنا ارنالعان سالتاناتتى ءىس-شارا اباي اتىنداعى وبلىستىق كىتاپحانادا ءوتتى. وعان وبلىس اكىمى بەرىك ءۋالي, «Qazaqstan» ۇلتتىق تەلەارناسىنىڭ ديرەكتورى, بەلگىلى جۋرناليست بولات ءمۇرسالىم جانە ارداگەر جۋرناليستەرمەن قاتار قالانىڭ زيالى قاۋىم وكىلدەرى قاتىسى. جيىندا ايماق باسشىسى تەلەارنا ۇجىمىن مەرەيلى مەرەيتويمەن قۇتتىقتادى.
«الپىس جىل – تەك ءبىر ۇجىمنىڭ عانا ەمەس, تۇتاس ءوڭىردىڭ تاريحىنا اينالعان زور بەلەس. ۋاقىتتىڭ سىنىنان وتكەن, ۇلتتىڭ ءۇنىن جەتكىزگەن رۋحاني ارنانىڭ مەرەكەسى! مەملەكەت باسشىسى قاسىم-جومارت توقاەۆ: «تۇپتەپ كەلگەندە, مەملەكەت تە, جۋرناليست تە ۇلت ءۇشىن قىزمەت ەتەدى, ەل تاعدىرىن شەشۋگە اتسالىسادى. ويتكەنى, ۇلت ءباسپاسوزى مەن ۇلت مۇددەسى قاي كەزدە دە وزەكتەس بولعان. قازىر دە سولاي» دەگەن ءسوزى ءبىزدىڭ سەمەي تەلەارناسىنىڭ جولىنا, رۋحىنا ءدوپ كەلەدى. سول العاشقى حابارلاردان باستاپ بۇگىنگە دەيىن حالىقتىڭ ءۇمىتىن, ەلدىڭ تىنىسىن جەتكىزدى. ەل ءۇشىن جاڭا ءداۋىردىڭ باستاۋى بولدى. سول كەزدەن بەرى سەمەي تەلەارناسى – ۋاقىتتىڭ كۋاسى, ەلدىڭ ايناسى, رۋحتىڭ مىنبەرى بولىپ كەلەدى. بۇگىنگى مەرەيتوي – وتكەنگە تاعزىم, بولاشاققا سەنىم سىيلايدى! الپىس جىلدىق ابىرويلى تاريح ەل مەن ەلدى, ۇرپاق پەن ۇلتتى جالعاعان التىن كوپىر! سەمەي تەلەارناسى – سەمەيدىڭ ءۇنى, اباي ەلىنىڭ رۋحى! قۇرمەتتى ارىپتەستەر, بارشاڭىزدى ۇجىمنىڭ مەرەيلى مەرەكەسىمەن شىن جۇرەكتەن قۇتتىقتايمىن!» دەدى وبلىس اكىمى.
سالتاناتتى جيىندا تەلەارنانىڭ ارداگەرلەرى مەن قىزمەتكەرلەرىنە مەرەيتويلىق ماراپاتتار تابىستالدى. تەلەارنا ارداگەرلەرى فاتيما بەگەنباەۆا, زينايدا وماروۆا, مۇراتقازى الين, تىلەگەن احمەتوۆ مادەنيەت جانە اقپارات مينيسترلىگىنىڭ «ەڭبەك ارداگەرى» مەدالىمەن, شەف رەداكتور گۇلناز كاۋكەن, وپەراتور ەلجان ماعزۇموۆ, رەداكتور باقىتگۇل قازەز «اقپارات سالاسىنىڭ ۇزدىگى» توسبەلگىسىمەن ماراپاتتالدى. تەلەارنانىڭ بىرقاتار قىزمەتكەرلەرى مادەنيەت جانە اقپارات مينيسترلىگىنىڭ العىسحاتى جانە «قۇرمەت» گراموتاسىن, وبلىس اكىمىنىڭ العىسحاتىن الدى. ايماق باسشىسى سالتاناتتى كەشتە تەلەارنا ۇجىمىنا وبلىس جۇرتشىلىعى اتىنان اۆتوكولىكتىڭ كىلتىن تابىس ەتتى.
اباي وبلىسى
