ينۆەستورعا كلۋبتىڭ سپورتتىق قۇقىقتارى, ونىڭ ىشىندە «Qyzyljar» برەندى, پرەمەر-ليگاعا قاتىسۋ قۇقىعى, قولدانىستاعى كەلىسىمشارتتار جانە ماتەريالدىق-تەحنيكالىق بازا بەرىلدى. بۇل مودەل باسقارۋدىڭ زاماناۋي ادىستەرىن ەنگىزۋگە, قارجىلىق تۇراقتىلىقتى ارتتىرۋعا جانە كلۋبتىڭ ۇزاق مەرزىمدى دامۋىن قامتاماسىز ەتۋگە مۇمكىندىك بەرەدى.
ينۆەستور جىل سايىن كلۋبتىڭ دامۋىنا كەمىندە 1 ملرد تەڭگە ينۆەستيتسيا سالۋعا مىندەتتەمە الادى. بۇل رەتتە مەملەكەتتىك قارجىلاندىرۋ كولەمى كەزەڭ-كەزەڭىمەن قىسقارىپ, ءۇش جىل ىشىندە تولىعىمەن توقتاتىلاتىن بولادى. بىرتىندەپ كوشۋ سپورتتىق كورسەتكىشتەردىڭ تۇراقتىلىعىن ساقتايدى جانە كلۋبقا دەربەس, تۇراقتى ينفراقۇرىلىم قۇرۋعا مۇمكىندىك بەرەدى.
سولتۇستىك قازاقستان وبلىسىنىڭ اكىمدىگىمەن بىرلەسىپ «قاراساي» ستاديونىن كلۋبقا سەنىمدى باسقارۋعا بەرۋ ماسەلەسى قارالىپ جاتىر.
ءوڭىر ءۇشىن بۇل نەگىزگى كوماندانىڭ جاعدايىن جاقسارتۋ عانا ەمەس, سونىمەن قاتار بالالار مەن جاستار ءۇشىن جاڭا مۇمكىندىكتەر بەرىلەتىنىن بىلدىرەدى. دايىندىق نەگىزىنە جەكە دامۋعا, جاتتىعۋدىڭ زاماناۋي ءادىسناماسىنا جانە كاسىبي داعدىلاردى قالىپتاستىرۋعا باعىتتالعان اكادەميالىق مودەل قۇرىلاتىن بولادى.
جەرگىلىكتى تاربيەلەنۋشىلەردى دامىتۋعا ەرەكشە كوڭىل بولىنەتىن بولادى. قۇرىلىپ جاتقان «Qyzyljar» اكادەمياسى سولتۇستىك قازاقستان وبلىسىنىڭ دارىندى بالالارىن ىزدەۋ جانە ولاردى قولداۋ ورتالىعىنا اينالادى. جاس ويىنشىلار كاسىبي ورتادا جاتتىعىپ, جاستار مەن رەزەرۆتىك قۇرامدا ويىن پراكتيكاسى الادى, ال ۇزدىكتەر – پرەمەر-ليگانىڭ نەگىزگى كومانداسىنداعى ورىنعا ۇمىتتەنە الادى. بۇل ءوڭىردىڭ جاس سپورتشىلارى ءۇشىن – بالالار سەكتسيالارىنان باستاپ ەل قۇراماسىنىڭ دەڭگەيىنە دەيىنگى ناقتى الەۋمەتتىك ليفت بولادى.
