سۋرەت: 018.kz
بيىل 274 سارباز وتان الدىندا ادال قىزمەت ەتۋگە سەرت بەرىپ, شەكارا كۇزەتىنە رەسمي تۇردە كىرىستى. ساربازدار ساپ تۇزەپ, اسكەري جارعىعا ساي انت بەرۋى – ولاردىڭ ازاماتتىق ءارى اسكەر جولىنداعى ەڭ جاۋاپتى دا مارتەبەلى مىندەتتەرىنىڭ ءبىرى. سالتاناتتى ءراسىمنىڭ اشىلۋىندا ەڭ ءبىرىنشى بولىپ وبلىستىق ۇقك شەكارا قىزمەتى دەپارتامەنتىنىڭ باسشىسى, پولكوۆنيك اسحات احمەتوۆ قۇتتىقتاۋ ءسوز سويلەدى. ول جاس ساربازداردىڭ انت بەرۋ ءراسىمى ماڭىزدى ەكەنىن جەتكىزدى.
«وتان – ءار ازاماتتىڭ جۇرەگىندەگى ەڭ قاسيەتتى ۇعىم. انت – سول قاسيەتتى ۇعىمنىڭ ايعاعى. سىزدەر ەلىمىزدىڭ شەكاراسىن قورعاۋ جولىندا بەرىك, باتىل جانە ادال بولاسىزدار دەپ سەنەمىز. قادامدارىڭىز نىق, قىزمەتتەرىڭىز ابىرويلى بولسىن!», دەدى اسحات بولات ۇلى.
ءىس-شارا بارىسىندا ماقانشى اۋدانىنىڭ اكىمى داۋرەن قويگەلدين دە ءسوز سويلەپ, جاس ساربازداردى انت بەرۋ راسىمىمەن قۇتتىقتادى. ول شەكارا قىزمەتىندەگى جاۋاپكەرشىلىك پەن ەل تىنىشتىعىن ساقتاۋ جولىنداعى ەرلىك مانىنە توقتالىپ, اسكەري بورىشتى ابىرويمەن اتقارۋعا تىلەكتەستىك ءبىلدىردى.
سالتاناتتى جيىندا اسكەري پوليتسيا باسقارماسىنىڭ باسشىسى, پولكوۆنيك مۇراتبەك تىلەۋليەۆ جاس ساربازداردى ءتارتىپ پەن تاباندىلىققا شاقىردى. سونىمەن قاتار «زاستاۆا تارلاندارى» رەسپۋبليكالىق قوعامدىق بىرلەستىگىنىڭ مۇشەسى, زاپاستاعى پولكوۆنيك ارمان كارىبجانوۆ شەكارا قىزمەتىنىڭ تاريحي ماڭىزىنا توقتالىپ, بابالاردان جالعاسقان قاھارماندىق ءداستۇردىڭ بۇگىنگى بۋىنعا جۇكتەگەن سەنىمى ۇلكەن ەكەنىن جەتكىزدى. ال «انالاردىڭ جۇرەگى» سارباز انالارى كەڭەسىنىڭ اباي وبلىسىنداعى وكىلى مارفۋعا شايمۇراتقىزى جاس ساربازدارعا انالىق اق باتاسىن ارناپ, ولاردىڭ ابىرويلى قىزمەتىن اتقارىپ, وتباسىنا امان-ەسەن ورالۋىنا تىلەكتەس ەكەنىن ايتتى. سونىمەن قاتار تاجىك-اۋعان شەكاراسىنداعى اسكەري قاقتىعىس ارداگەرلەرى رەسپۋبليكالىق قوعامدىق بىرلەستىگىنىڭ كەڭەس توراعاسى نۇربولات جولبولات ۇلى دا ءوز قۇتتىقتاۋىن ايتىپ, جاس ساربازدارعا قاجىر-قايرات پەن ەرىك-جىگەر تىلەدى. ول ءوز بۋىنىنىڭ كۇردەلى كەزەڭىن ەسكە الا وتىرىپ, وتان قورعاۋدىڭ ەشقاشان ماڭىزىن جويمايتىن قاسيەتتى مىندەت ەكەنىن جەتكىزدى.
سالتاناتتى ءراسىم پاتريوتتىق اندەرمەن ارلەندى. مەملەكەتتىك تۋ كوتەرىلىپ, ەلدىك رۋح اسقاقتادى. انت بەرۋ راسىمىنەن كەيىن ساربازدار بولىمشەنىڭ اۋماعىمەن تانىسىپ, العاشقى نۇسقاۋلىقتارىن الدى. وسى ساتتەن باستاپ ولاردىڭ ناعىز اسكەري ءومىرى باستالدى.
اباي وبلىسى,
ماقانشى اۋدانى
