قازاقستاننىڭ ۇزدىك تەننيسشىسى الەكساندر بۋبليك 13-ورىننان 11-ورىنعا كوتەرىلىپ, مانسابىنداعى ەڭ جوعارى ناتيجەگە قول جەتكىزدى. ءبىر اپتا بۇرىن ول 16-ورىننان 13-ساتىعا كوتەرىلگەن ەدى. وسىلايشا, بۋبليك الەمنىڭ ۇزدىك وندىعىنا ءبىر قادام جاقىندادى.
قازىر تۋرين قالاسىندا ءوتىپ جاتقان ATP قورىتىندى تۋرنيرىندە قازاقستاندىق تەننيسشى قوسالقى ويىنشى رەتىندە تىركەلگەن.
تاعى ءبىر قازاقستاندىق سپورتشى الەكساندر شەۆچەنكو دا رەيتينگتەگى ورنىن جاقسارتىپ, 97-دەن 95-ساتىعا كوتەرىلدى.
جاڭا تىزىمدە يسپانيالىق كارلوس الكاراس يتاليالىق ياننيك سيننەردى باسىپ وزىپ, الەمدىك رەيتينگتىڭ كوشباسشىسى اتاندى. ۇزدىك ۇشتىكتى گەرمانيالىق الەكساندر زۆەرەۆ تۇيىندەپ تۇر.
ايتا كەتەيىك, بۇعان دەيىن ەلەنا رىباكينا WTA قورىتىندى ءتۋرنيرىن جەڭىپ, بۇل جەتىستىككە قول جەتكىزگەن العاشقى ازيالىق تەننيسشى بولعان ەدى.
