قازاقستاندىق تەننيسشى فينالدا الەمنىڭ 1-راكەتكاسى, «ۇلكەن دۋلىعا» ءتۋرنيرىنىڭ ءتورت دۇركىن جەڭىمپازى, بەلارۋس وكىلى ارينا سوبولەنكومەن چەمپيوندىق اتاقتى ساراپقا سالدى.
ءبىرىنشى پارتيادا ەسەپ 3:2 بولعان مەزەتتە رىباكينا برەيك جاساپ, سول باسىمدىلىعىن ساقتاپ قالدى – 6:3.
تارتىستى وربىگەن ەكىنشى سەتتە تاي-برەيكتە ە.رىباكينا بەت قاراتپادى – 7:6 (7:0).
ءبىر ساعات 48 مينۋتقا سوزىلعان باسەكەدە رىباكينا 13 ەيسپەن بىرگە 6 برەيك-پوينتتىڭ بىرەۋىن ءوز ەسەبىنە جازدى. سوبولەنكو 5 ەيس جاساعانىمەن, 5 برەيك-پوينتتى پايدالانا المادى.
وسىلايشا, ە.رىباكينا اتالمىش جارىس 1972 جىلى ۇيىمداستىرىلعاننان بەرى چەمپيون اتانعان العاشقى ازيالىق تەننيسشى اتاندى. بۇعان دەيىن قىتايلىقتار لي نا (2013 جىلى) مەن چجەن تسينۆەن (2024) تەك فينالعا دەيىن جەتكەن ەدى.
دودا بارىسىندا بارلىق كەزدەسۋىندە جەڭىسكە جەتكەن ەلەنا 1 500 رەيتينگىلىك ۇپايعا قوسا 5,235 ملن دوللار (2,747 ملرد تەڭگە) تابىس تاپتى. وعان قوسا دۇيسەنبىدە جاڭارتىلاتىن WTA رەيتينگىسىندە 5-ورىنعا كوتەرىلەدى.
سونىمەن قاتار ە.رىباكينا 2016 جىلدان بەرى ەيس سانىن 500-دەن اسىرعان ءبىرىنشى تەننيسشى بولدى. 2016 جىلى مۇنداي ناتيجەگە چەحيالىق كارولينا پليشكوۆا قول جەتكىزگەن ەدى.
بۇدان بولەك, ەلەنا بيىلعى ماۋسىمدا توپ-10-عا كىرەتىن 7 تەننيسشىنى قاپى قالدىرىپ, بۇل جونىنەن ۇزدىك شىقتى. رىباكينا سپورتتىق جولىندا ۋيمبلدونداعى جەڭىسىن قوسقاندا, WTA دودالارىندا 11 تيتۋل جەڭىپ الدى. مۇنداي مەجەگە قازاقستاننان ەشكىم جەتكەن ەمەس.
https://kaz.inform.kz/news/ribakina-wta-koritindi-turnirn-utkan-algashki-aziyalik-tennissh-atandi-98f553/
