قازاق ادەبيەتىنىڭ الىپ بايتەرەگى تۇرعان اۋىلدى, ادەبي-مەموريالدىق ءۇيدى ارنايى كورۋگە ەلىمىزدىڭ ءار قيىرىنان اعىلىپ جاتقان ازاماتتار دا جەتكىلىكتى.
شەراعاڭنىڭ شاڭىراعىندا ونىڭ ادەبي مۇراسىنان بولەك, بيليارد ۇستەلى, ءتۇرلى باسىلىم تىگىندىلەرى, وتكەن شاقتان سىر شەرتەتىن ءبىرشاما تاريحي زاتتار ساقتالعان. مۇندا كەلگەندەر مۇراجايداعى ءاربىر قۇندىلىققا ايرىقشا نازار اۋداراتىنى بەلگىلى. سونىڭ ءبىرى – اناسى ايشانىڭ تىگىن ماشيناسى. جىلدار بويى ساقتالعان «زينگەر» تىگىن ماشيناسى كوزگە وتتاي باسىلادى.
«قارا شاڭىراقتا تۇرعان رايحان اپايىمىز بۇل تىگىن ماشيناسىن ءبىراز ۋاقىت بۇرىن ارنايى تاپسىرعان بولاتىن. بىزگە كەلۋشىلەر ايشا اپامىزدان قالعان مۇرانىڭ تاريحىنا تەرەڭىرەك ءۇڭىلىپ جاتادى. «زينگەر» تىگىن ماشيناسى شەراعانىڭ شىعارمالارىندا دا از جازىلعان جوق», دەيدى ادەبي-مەموريالدىق ءۇيدىڭ قىزمەتكەرلەرى.
راسىندا, شەراعا شىعارمالارىندا «زينگەر» تىگىن ماشيناسىن اتاۋ ارقىلى تاعدىرىنىڭ تاقتاسىنداعى اۋىر كۇندەردى ەسىنە تۇسىرەتىنى بارشامىزعا ءمالىم.
«مەنىڭ انام ايشا شەبەر تىگىنشى ەدى. باياعىدا باي بابادان قالعان «زينگەر» ماشيناسىمەن بۇكىل اۋىلدىڭ كيىم-كەشەگىن وسى ايشا تىگەتىن. سوندا ءارتۇرلى ماتادان قالعان قيىقتاردى قۇراستىرىپ, ماقتالاپ, ءتۇرلى ءتۇستى ءاپ-ادەمى كورپەشەلەر جاسايتىن», دەپ شەراعاڭ دا مەحناتقا تولى سول ءبىر شاقتى ەسىنە الۋشى ەدى عوي. قالاي دەسەك تە, جازۋشى شىعارماشىلىعىندا ءجيى كورىنىس تاپقان تاريحي بۇيىمنىڭ قۇندى ەكسپونات رەتىندە ساقتاۋلى تۇرعانى كوڭىل قۋانتادى.
جامبىل وبلىسى,
جۋالى اۋدانى,
تالاپتى اۋىلى
