فوتو: freepik
قما ءباسپاسوز قىزمەتى ءمالىم ەتكەندەي, الاياقتىق ءىستى ۇيىمداستىرۋشىلار ۋاقىتشا جۇمىس ۇسىنعان ءتۇر تانىتىپ, جاستارعا ەكىنشى دەڭگەيلى بانكتەردە ءوز اتىنا شوت اشۋدى ۇسىنعان.
«ينتەرنەت-بانكينگ ءموبيلدى قوسىمشالارىن الاياقتاردىڭ قۇرىلعىلارىنا ورناتقاننان كەيىن, شوتتارعا قول جەتكىزۋ تولىقتاي ولاردىڭ باقىلاۋىنا وتكەن. وسىنداي ارەكەتتەرگە قاتىسقان تۇلعالار, ياعني «دروپپەرلەر», 200-دەن 350 اقش دوللارىنا دەيىن سىياقى العان. بۇل شوتتار ارقىلى ينتەرنەت-الاياقتىق قۇرباندارىنان تۇسكەن قاراجات اۋدارىلىپ وتىرعان», دەلىنگەن حابارلامادا.
اگەنتتىك دەرەگىنشە, زاڭسىز وپەراتسيالاردىڭ جالپى كولەمى 17 ميلليون تەڭگەدەن اسقان.
«وقيعالاردىڭ بىرىندە بانكتىك كارتا بۇعاتتالعاننان كەيىن, ءبىر دروپپەر زاڭسىز ارەكەتتەرگە ءارى قاراي قاتىسۋدان باس تارتقان. قىلمىستىق توپ مۇشەلەرى وعان كۇش قولدانىپ, قورقىتىپ, شوتقا قايتا قولجەتىمدىلىكتى قالپىنا كەلتىرۋدى تالاپ ەتكەن», دەپ ءمالىم قىلدى قما ءباسپاسوز قىزمەتى.
بۇگىندە اتالعان قىلمىستىق ءىستىڭ ۇيىمداستىرۋشىسى كۇدىكتى رەتىندە ۇستالىپ, قاماۋعا الىنعان.
«تەرگەۋ جالعاسىپ جاتىر. وزگە اقپارات قىلمىستىق-پروتسەستىك كودەكسىنىڭ 201-بابىنا سايكەس جاريا ەتىلمەيدى», دەلىنگەن رەسمي حابارلامادا.
ايتا كەتەلىك, بيىل 16 قىركۇيەكتەن باستاپ قىلمىستىق كودەكسكە ەنگىزىلگەن جاڭا 232-1-باپ دروپپەرلىككە – بانكتىك شوتقا, تولەم قۇرالىنا نەمەسە جەكە سايكەستەندىرۋ تاسىلىنە زاڭسىز قول جەتكىزۋدى بەرۋ, ساتۋ نە ساتىپ الۋعا – قىلمىستىق جاۋاپكەرشىلىك بەلگىلەيدى.
اتالعان باپ – جازا رەتىندە مۇلكىن تاركىلەي وتىرىپ, 7 جىلعا دەيىن باس بوستاندىعىنان ايىرۋدى قاراستىرادى.
